1 Crónicas 23 - Mam Huehuetenango New Ortography

Qe aj Leví ex aju kyaq'un tu'n tb'inchet

1Tej otoq ten David nim ab'q'i ex otoq tijin wen, oktzun tq'o'n toklen Salomón aju tky'ajal tu'n tok te rey kye aj Israel.

2Ex e ok tchmo'n kykyaqil qe nejenel kye aj Israel, ax ikx qe pal ex qe aj Leví,

3ex e b'aj ajla'n qe aj Leví, aqeju otoq japun 30 ab'q'i kyu'n ex qa mastl, ex japun jun kyajlal tu'n tkyaqil te 38 mil xinaq.

4Kyxol qe jlu e el pa'n 24 mil tu'n kyajb'en tuj aq'untl tuj tja Qman, qaq mil tu'n kyok te ma' kyoklen ex te jwes,

5kyaje mil tu'n kyok ten kwentil ttzi tja Dios, ex juntl kyaje mil tu'n tjaw kynimsa'n tb'i Qman ex tu'n kyajb'en qe chnab' kyu'n, aqeju otoq che b'aj chmet tu'n David tu'n kyajb'en te nimb'il tb'i Qman.

6E b'ajtzun pa'n qe tu'n David tuj ox k'loj, ik tza'n kyiyjil ox tky'ajal Leví, ex atzun qe jlu: Gersón, Coat ex Merari.

7Qe tky'ajal Gersón, atzun qe jlu: Laadán ex Simei.

8Qe tky'ajal Laadán ox kyb'et ex atzun qe jlu: Jehiel tb'i tnejel, Zetam tb'i tkab'in ex Joel tb'i toxin.

9Ex qe tky'ajal Simei ax ikx ox kyb'et ex atzun qe jlu: Selomit, Haziel ex Harán. Atzun qe jlu e ok te nejenel kyxol qe tiyjil Laadán.

10Qe tky'ajal Simei kyaje kyb'et ex atzun qe jlu: Jahat, Ziza, Jeús ex Bería.

11Aju tnejel, atzun Jahat, ex atzun tkab'in, atzun Ziza, ex ate Jeús ex Bería, mya nim kyk'wa'l tzaj, kyja'tzun e je'x ajla'n mer ik tza'n jun ja xjal qe.

12Qe tky'ajal Coat kyaje kyb'et ex atzun qe jlu: Amram, Izhar, Hebrón ex Uziel.

13Qe tky'ajal Amram, atzun qe jlu: Aarón ex Moisés. Ate Aarón jaw sk'o'n tu'n Dios tu'n t-xi tq'o'n qe oyaj xjansa'maj, tu'n tkub' tpatun storak twitz Qman, tu'n tajb'en te, ex kukx tu'n tqanin ky'iwb'il kyib'aj xjal. Aju aq'untl lu, tu'n Aarón tu'n tb'ant ex kyu'n tiyjil te jumajx.

14Atzunte Moisés aju xinaq sk'o'maj tu'n Dios, kyuk'ix qe tky'ajal, ax xi q'i'n kyajlal kyuk'il qe tiyjil Leví.

15Qe tky'ajal Moisés atzun qe jlu: Gersón ex Eliezer.

16Ate Sebuel tky'ajal Gersón ex nejenel kyxol terman.

17Ate Eliezer junx tky'ajal tzaj, atzun Rehabías, ex minti' txqantl tk'wa'l tzaj, atzunte Rehabías nim tky'ajal tzaj.

18Ate Selomit tky'ajal Izhar ex nejenel kyxol terman.

19Qe tky'ajal Hebrón atzun qe jlu: Jeraías tb'i tnejel, Amarías tb'i tkab'in, Jahaziel tb'i toxin, ex Jecamán tb'i tkyajin.

20Qe tky'ajal Uziel atzun qe jlu: Micaías tb'i tnejel, ex Isías tb'i tkab'in.

21Qe tky'ajal Merari atzun qe jlu: Mahli ex Musi. Qe tky'ajal Mahli atzun qe jlu: Eleazar ex Cis.

22Ate Eleazar kyim minti' jun tky'ajal tzaj, noq o'kx qe tme'jel e tzaj, ex e b'aj najan kyuk'il qe tky'ajal Cis aju terman kyman.

23Qe tky'ajal Musi ox kyb'et ex atzun qe jlu: Mahli, Edar ex Jeremot.

24Kykyaqil qe jlu tiyjil Leví qe. Tej tjaw kyajlal, ku'x tz'ib'an kyb'i qeju otoq japun winqin ex qa mastl ab'q'i kyu'n. Nejenel qe te junjun k'loj kyiyjil, ex in che aq'nantoq tuj tja Qman.

25Otoq tma David: Tu'n Qman aju Kydios aj Israel ma kub' kyi'j aj q'oj, tu'ntzun kyten qe xjal etzan tu'n tuj txub'txaj, ex axtzun tu'n tnajan te jumajx tuj Jerusalén.

26Kyja'tzun ya mlay tzik' kylaq'b'a'n aj Leví aju ja xb'alun te mojb'ab'l tib'il tuk'il Dios, ax ikx qe makb'il in che ajb'en tuj k'ulb'il, chi David.

27Kyja'tzun, ik tza'nx ju yol kyaj tma'n David tej na'nxtoq tkyim, jaw jun kyajlal aj Leví, aqeju otoq japun winqin ex qa mastl ab'q'i kyu'n,

28ex e kyaj ten tjaq' kykawb'il pal aqeju tiyjil Aarón, tu'n tb'ant aq'untl kyu'n tuj tja Qman, kyuj qe ttxa'n pe'n ex kyuj qe tal cuart, ex tu'n tb'aj kytx'jo'n kyi'j qe makb'il xjansa'maj qe, ax ikx ti'j txqantl aq'untl tuj tja Qman.

29Tuj kykwent ta' qe pan xjansa'maj, aqeju in che kub' q'o'n tuj txolin, ax ikx aju arin tu'n tajb'en te oyaj, ex qe tal pan xaxj minti' t-samel kyuj tu'n tjaw mal kyk'u'j, ex qe oyaj tzq'ajsa'maj tuj sartén ex tuj xk'o'n. Ax ikx kykyaqil txkaj malb'il ex echb'il tuj kykwent ta' kykyaqil.

30Ax ikx il ti'j tu'n kyten tuj tja Qman kykyaqil q'ij te prim ex te qale, tu'n t-xi kyq'o'n chjonte te Qman ex tu'n tjaw kynimsa'n tb'i,

31ex tu'n t-xi kyq'o'n te Qman qe oyaj patun in che kub' kyuj qe q'ij te ojlab'l, kyuj qe ninq'ij, ok ttzaj ke'yin juntl ak'aj xjaw, ex kyuj qe ninq'ij nim kyoklen; kukx tu'n kyajb'en te Qman ik tza'n kyajlal ex tumel kyajni b'ant ti'j.

32Ex tuj kykwent ta' tu'n tok kykwentin ja xb'alun te mojb'ab'l tib'il tuk'il Dios, ax ikx ju Lugar Xjan ex tu'n kyonin kye qe kyerman aqeju tky'ajal Aarón ti'j aq'untl tuj tja Qman.