1 Reyes 15 - Mam Huehuetenango New Ortography

Tej tkawin Abiam tuj Judá 2 Crónicas 13.1-22

1Tuj twajxaqlajin ab'q'i ttzyetlen tkawin rey Jeroboam aju tky'ajal Nabat, tzyet tkawin Abiam tuj Judá.

2Ox ab'q'i o kawin tuj Jerusalén. Aju ttxu' Maaca tb'i ex tme'jel Abisalom.

3Ax il tb'incha Abiam ik tza'nju il otoq tb'incha qtzan tman, ex minti' ajb'en te Qman aju Tdios tu'n tkyaqil tanmi ik tza'n te David aju qtzan t-xe'chel.

4Maske ikju, noq tu'nju tk'ujlalil Qman ti'j David, minti' kub' yupj tiyjil tu'n, kyja'tzun tkyimlenxi Abiam, ax jun tky'ajal ok tq'o'n te rey te t-xel, ex kyaj tkyuwsa'n ju tnam Jerusalén;

5porke ate David otoq b'et tuj tumelxix twitz Qman, ex tuj tkyaqil tanq'ib'l minti' el tpa'n tib' ti'j aju otoq tzaj tma'n Qman te; o'kxku jun mya b'a'n tb'incha ti'j Urías aju aj Heteo.

6Tej itz'xtoq Roboam, kukx ok q'oj kyxol tuk'il Jeroboam, ex tej tkyim Roboam,

7ax ikx ok q'oj kyxol Abiam tuk'il Jeroboam. Aju ch'intl tx'olb'ab'en ti'j Abiam ex ti'j tkyaqil aju tb'incha, atzun tz'ib'an tuj u'j jatum ta' tkyaqil tx'olb'ab'en kyi'j kyaq'unb'en qe rey te Judá.

8Ex tejtzun tkyim Abiam, ku'x maqu'n tuj ju tnam Ttanmi David tb'i. Te tib'ajxi, aju o kawin te t-xel atzun Asa aju tky'ajal.

Tej tkawin Asa tuj Judá 2 Crónicas 14.1-5; 15.16-19

9Otoq b'ant winqin ab'q'i ttzyetlen tkawin Jeroboam aju rey kye aj Israel, tej ttzyet tkawin Asa tuj Judá.

10O kawin tuj Jerusalén 41 ab'q'i. Aju tya' Maaca tb'i ex tme'jel Abisalom.

11Qe tb'inchb'en Asa b'a'n e ela tuj twitz Qman, ik tza'nx qe tb'inchb'en David aju qtzan t-xe'chel.

12E je'x tlajo'n tuj tx'otx' aqeju xinaq in che yaẍin ax tuk'il juntl xinaq, ex el ti'n kykyaqil qe tilb'ilal otoq che b'aj kyb'incha'n qe t-xe'chel.

13Ax ikx el ti'n toklen Maaca aju tya' ex t-xu'jil qtzan rey Roboam, tu'nju otoq txi tma'n Maaca tu'n tb'ant jun tilb'ilal xu'j dios Asera. Kub' t-xitun Asa aju tilb'ilal lu, ex kub' tpatun tuj tq'ab' xaq Cedrón.

14Maske minti' e je'l q'i'n qe ja te kyk'ulb'il xjal mya nimal Dios qe, ex kukx ajb'en Asa te Qman tu'n tkyaqil tanmi,

15ex okx tq'o'n tuj tja Qman kykyaqil q'an pwaq ex saq pwaq aju toyaj otoq txi tq'o'n te Dios, ex tuk'ixju otoq txi tq'o'n qtzan tman.

B'ant ti'j jun kyyol Asa tuk'il Ben-adad 2 Crónicas 16.1-10

16Kukx ok q'oj kyxol Asa tuk'il Baasa aju rey kye aj Israel.

17Tej t-xi' Baasa tu'n tok tzoqpaj kyi'j qe tnam te Judá, ok tq'o'n muro ti'j tnam Ramá, tu'ntzun mi jun xjal tu'n tpon tuj tx'otx' Judá ex mi jun aj Judá tu'n tetz tuj ttanmi.

18Tzajtzun ti'n Asa tkyaqil q'an pwaq ex saq pwaq aju atxtoq tuj tja Qman ex tuj tja rey, ex xi tq'o'n kye qe xjal ma' kyoklen ate' ttxlaj, tu'n t-xi kyi'n tuk'il Ben-adad aju rey te Siria, aju tky'ajal Tabrimón ex tal tchman Hezión ex atzun najltoq Ben-adad tuj Damasco. Ax ikx xi t-sama'n jun tqanil kyja':

19E tb'ant ti'j jun qyol qkab'il ik tza'n kyb'incha qe qtzan qman. Lu ma txi nsama'ne q'an pwaq ex saq pwaq te jun oyaj teya. Q'uchin kub'a aju yol kyajni b'ant ti'j tu'na tuk'il Baasa aju rey kye aj Israel, tu'ntzun mi'n kukx tq'ojin wi'je.

20Atzunte Ben-adad kub' tuj twitz aju otoq kub' t-ximan rey Asa, e je'xtzun t-sama'n qe nejenel kye qe t-soldad q'ojlel kyi'j qe tnam kye aj Israel. Kyja'tzun e tzyet qe tnam lu tu'n: Ijón, Dan, ex Abel-bet-maaca, tuk'ix tkyaqil tx'otx' Cineret ex tkyaqil tx'otx' kye aj Neftalí.

21Tejtzun tb'inte Baasa jlu, xi tkolin tu'n tok tq'o'n muro ti'j tnam Ramá ex aj meltz'aj tuj tnam Tirsa.

22E txkettzun kykyaqil aj Judá tu'n rey Asa, mi jun tu'n tkyaj ten, ex xi kyi'n qe ab'j kyuk'ix qe tze', aqeju otoq che ajb'en tu'n Baasa tu'n tok tq'o'n muro ti'j tnam Ramá, ex kyu'ntzun qe ab'j ex qe tze' lu, jaw tb'incha'n rey Asa tnam Geba tuj kytx'otx' tiyjil Benjamín, tuk'ix ju tnam Mizpa.

Tej tkyim Asa 2 Crónicas 16.11-14

23Aju ch'intl tx'olb'ab'en cabalxix ti'j Asa ex ti'j tb'inchb'en ma'xix toklen, ex ti'j tkyaqilju o tb'incha ex kyi'j qe tnam e jaw tb'incha'n, atzun tz'ib'an tuj u'j jatum ta' tkyaqil tx'olb'ab'en kyi'j kyaq'unb'en qe rey te Judá.

Tej ttijin wen, ok jun yab'il kyi'j qe tqan.

24Tejtzun tkyim, ku'x maqu'n kyuk'il qtzan t-xe'chel tuj tnam Ttanmi David tb'i. Te tib'ajxi aju o kawin te t-xel, atzun Josafat aju tky'ajal.

Tej tkawin Nadab kyxol aj Israel

25Otoq b'ant kab' ab'q'i ttzyetlen tkawin Asa tuj Judá tej ttzyet tkawin Nadab kyxol aj Israel. Ate jlu tky'ajal Jeroboam ex noq kab' ab'q'i o kawin.

26Ex mya b'a'n e ela qe tb'inchb'en tuj twitz Qman. O tb'incha ik tza'nx qe il otoq tb'incha qtzan tman, ex kyu'ntzun qe jlu e b'inchan aj Israel il.

27Atzunte Baasa aju tky'ajal Ahías aju tiyjil Isacar, b'aj tchmo'n jun k'loj xjal junx kyximb'etz tuk'il tu'n kyq'ojin ti'j Nadab, ex kub' b'yo'n Nadab kyu'n tuj tnam Gibetón, aju tnam lu kye aj Filisteo. Ate Nadab kyuk'ix kykyaqil soldad aj Israel otoq b'aj kytxolb'an kyib' ti'j tnam Gibetón tu'n kyq'ojin ti'j.

28Otoq b'ant ox ab'q'i ttzyetlen tkawin Asa tuj Judá tej tkub' b'yo'n Nadab tu'n Baasa, ex ax te Baasa kyaj ten kawil te t-xel Nadab kyxol aj Israel.

29Ex noq o'kx tej ttzyet tkawin e kub' tb'yo'n kykyaqil qe xjal at kyxilen tuk'il Jeroboam; mi jun kyaj anq'in tu'n ik tza'nx otoq tma Qman te Ahías aju aj Silo.

30B'ant ikju tu'n kylaj il e tb'incha Jeroboam, ex kyu'ntzun qe jlu e b'inchan aj Israel il, ex kyja'tzun tzaj tq'oj Qman aju Kydios aj Israel.

31Aju ch'intl tx'olb'ab'en ti'j Nadab ex ti'j tkyaqil aju tb'incha, atzun tz'ib'an tuj u'j jatum ta' tkyaqil tx'olb'ab'en kyi'j kyaq'unb'en qe rey kye aj Israel.

32Kukx ok q'oj kyxol Asa tuk'il Baasa aju rey kye aj Israel.

Tej tkawin Baasa kyxol aj Israel

33Otoq b'ant ox ab'q'i ttzyetlen tkawin Asa tuj Judá tej ttzyet tkawin Baasa tuj tnam Tirsa kyib'aj kykyaqil aj Israel. Ate Baasa tky'ajal Ahías, ex o kawin 24 ab'q'i.

34Ex qe tb'inchb'en mya b'a'n e ela tuj twitz Qman, ex ax qe il e tb'incha ik tza'n qeju tb'incha Jeroboam, ex tu'n jlu e b'inchan aj Israel il.