1In yolin Qman Dios aju ma' toklen kywitz qeju nno'k kydiosin xjal, in txokon kyi'j qe xjal najl qe twitz tx'otx' tzajnix tuj tjawitz q'ij ex tu'n tpon b'aj tuj telex q'ij.
2In qoptz'aj Qman Dios max tuj tnam Sión, aju tnam tb'anilxix.
3Tzul Qman Dios, ex mya tuj ewaj tzul; tkub'sa'n jun q'aq' twitz in tz'e'y nimku tu'n; ex ti'jele in jumin jun nintz kyq'iq' kyuwxix wen.
4In txokon Dios ti'j kya'j ex ti'j tx'otx' tu'ntzun tkub' kycastiw qe xjal etzan tu'n, ex chi in tma'n kyja':
5Kychmon oke qe xjal sk'o'maj qe wu'ne, aqeju o b'ant ti'j jun kyyol wuk'ile tej ttzaj kyq'o'n jun chojb'il weye, chi Dios.
6Ate kya'j kq'malte tz'aqlxixte Dios, tu'nju axte kxel b'inchante kyi'j xjal.
7Kyb'intze aqeye aj Israel, aqeye jun tnam etzan wu'ne; kxel nchik'b'a'ne kyeye aju mya b'a'n in kyb'incha'ne. Aqine Dios, aqine Kydiose.
8Mlay che ok nmayo'ne kyi'j qe chojb'il ex qe oyaj patun in che kub', aqeju kukx ttzaj kyq'o'ne weye.
9Minti' in xi nqanine kyeye jun tal tor kyi'j qe kywakẍe, ex mi jun tman chip kyxol qeju ate' tuj kype'ne,
10porke weye kykyaqil qe txkup ate' tjaq' k'ul, ax ikx qe alumaj nim kyajlal ate' tuj tiwitz tx'otx';
11ax ikx weye qe chyu'j ate' tjaq' chk'ul, kyuk'ix kykyaqil qeju in che yukch tuj kojb'il.
12Noqwit in tzaj el nk'u'je, mlaywitlo txi nma'ne teya, porke weye tkyaqil twitz tx'otx' tuk'ix tkyaqilju at twitz.
13¿Baqa in chin wa'ne ti'j kychib'jal qe tor, ex baqa in xi nk'a'ne kychk'el tman chip?
14Aju aq'b'il chjonte tu'na awt tz'ajb'en te jun toyaja te Dios; japunx tu'na aju yol in xi ttziyana te Dios aju ma'xix toklen.
15B'ix chin ttxoka ok ttena tuj yajb'il, jaku kleta wu'ne ex atzun teya ok chin kjawil tnimsa'na.
16Atzun teju xjal mya b'a'n in tma'n Dios kyja': ¿Ti toklena ti'j tu'n tyolina kyi'j qe nleye ex tu'n tyolina ti'j ju yol kyaj b'ant ti'j wu'ne,
17ex minti' in tzalaja ti'j tu'n t-xi nkawina ex minti' in xi tb'i'na nyole?
18In tk'mo'na aju eleq' tuk'il tzalajb'il; nno'k tjunin tib'a kyuk'il qe xjal aj pajil.
19Minti' in tjak'un tib'a tu'n tyolina yol mya b'a'n ex in ximana ti'j tu'n t-sb'una.
20In yolina mya b'a'n ti'j termaniya; ti'j ju tekuya terman in jaw tnik'ana yol.
21Tkyaqil jlu o tb'inchaya ex minti' o chin q'ajte ti'j; kub' t-ximana qa ikx qine ik tza'n teya. Ex twitzkuya kb'el nchik'b'a'ne qe tb'inchb'ena mya b'a'n, chi Dios.
22Tz'elx kynik'e ti'j jlu aqeye nnik' tna'njtz Dios kyu'n, mya yajku che b'aj npaẍu'ne ex mi a'l jun jaku kolin kyi'je:
23Aju in tzaj q'onte jun aq'b'il chjonte weye, in chin jaw tnimsa'n. In klet wu'ne aju xjal in b'et tuj tumelxix, chi Dios.
Who We AreWhat We EelieveWhat We Do
2025 by iamachristian.org,Inc All rights reserved.
