Proverbios 16 - Mam Huehuetenango New Ortography

1In b'aj t-ximan xjal alkye tu'n tb'ant tu'n, pero a Dios in q'mante alkye tu'n tb'ant.

2Tuj twitz xjal qa b'a'n tkyaqilju in tb'incha'n, ex ate Qman in b'aj malonte t-ximb'etz xjal qa b'a'n ex qa mi'n.

3Q'onxa tuj tq'ab' Qman tkyaqil aju in b'ant tu'na, ex b'a'ntzun k'elel aju ma kub' t-ximana tu'n tb'ant.

4Tkyaqil o tb'incha Qman tu'n tjapun b'aj, aju ximamajtl tu'n; ax ikxpe qe xjal b'inchal mya b'a'n tu'n kyten tuj q'ij te k'ixb'isab'l.

5Ik'un tu'n Qman qe xjal in jaw kyniman kyib'; ax tok mlay tzik'x ti'j tu'n mi'n tkub' kycastiw.

6Qa at tk'ujlalil xjal ex qa in yolin axix tok, jaku najset til; qa in niman xjal te Qman, nne'l tpa'n tib' ti'j ju mya b'a'n.

7Qa in tzalaj Qman ti'j tb'inchb'en jun xjal, kyuk'ixpe qe aj q'oj ti'j in b'ant kyten tuk'il.

8Mas b'a'n noq ch'in at qe, ex tuj tumelxix otoq knet qu'n, twitzju nimku at qe, ex mya tuj tumel otoq knet.

9In b'aj t-ximan xjal alkye tu'n tb'ant tu'n, atzunte Qman ẍaqlul te.

10Mlay kub' tq'o'n rey kysentens xjal mya tuj tumel, porke a Dios in q'onte tnab'l.

11Atzun taj Dios tu'n tb'aj malet tkyaqil tuj balans cabalxix, ex tu'n o che b'inchet qe mark in che ajb'en te malb'il.

12Ik'un kyu'n rey qe xjal b'inchal mya b'a'n, porke aju kykawb'il rey in kyuwsanjtz tu'nju kyb'inchb'en tuj tumelxix in b'ant.

13Qe xjal in che yolin tuj tumelxix, k'ujla'n qe tu'n rey, ax ikx in tzalaj kyi'j qeju axix tok kyyol.

14Qa ma tzaj tq'oj rey, tqanil kamik jlu, atzunju xjal at tnab'l, nno'k tilil tu'n tu'n tchewix tq'oj rey.

15Qa in tzalaj twitz rey ti'j ju xjal in pon twitz, at tchwinqlal xjal tu'n jlu, ex aju xtalb'il in tq'o'n ik tten ik tza'n muj in tzaj jb'al tu'n.

16Aju tu'n tok qnab'l, mas ma' t-xilen jlu twitz q'an pwaq; ex aju tu'n tten qojtzqib'l, mas ma' t-xilen jlu twitz saq pwaq.

17Aju kyb'e qe xjal tz'aqlxix tpa'n tib' ti'j ju mya b'a'n; ex qa tok tkwent xjal ti'j tb'inchb'en, in kub' tkwentin tib'.

18Tu'nju in jaw tniman tib' xjal in tzaj xitb'il ti'j; ex tu'nju jawni twitz in kub' tz'aq.

19Mas b'a'n tu'n tkub' qmansin qib' kyxol qe xjal meb'a twitzju tu'n qok te q'inun kyuk'il qe xjal in jaw kyniman kyib'.

20Qa ma txi tniman xjal aju xnaq'tzb'il in xi q'o'n te, b'a'n nne'la te te; ex aju xjal q'uql tk'u'j ti'j Qman, at tzalajb'il te.

21Aju xjal at tnab'l nne'l tqanil ti'j qa at tnab'l; kyu'n qe yol b'a'n tb'inx in kub' ti'j kynab'l xjal tu'n.

22Aju xjal at tnab'l, jun chwinqlal jlu te te; atzunju xjal minti' tnab'l, in tzaj tcastiw tu'n jlu.

23Aju xjal at tnab'l, tok tkwent ti'j tyol, ex in kub' ti'j kynab'l xjal tu'n tyol.

24Aju yol b'a'n tb'inx ik tten ik tza'n ta'l kab' puro chi' wen: chi'xix in pon ti'j tk'u'j xjal tu'n, ex in tq'o'n ak'aj tipumal.

25At b'e jiqun ti'j tuj twitz xjal, ex aju b'ajsb'il te in pon tuj kamik.

26Tu'nju in tzaj el tk'u'j xjal, kyja'tzun in aq'nan; ex ok tna'nte xjal we'yaj in jaw we' tu'n taq'nan;

27Aju b'inchal mya b'a'n, o'kx in ximan ti'j tu'n tb'inchante mya b'a'n ti'j juntl, ex qe tyol ik kyten ik tza'n tqan q'aq'.

28Aju xjal tq'on tib' jumajx tuj mya b'a'n, noq q'oj in jyon ti'j; ex aju xjal si'mil yol, noq ik'b'il in tq'o'n kyxol xjal kyamiwxix kyib'.

29Aju xjal mya b'a'n in kub' t-sb'u'n tuk'il ex in xi ti'n tuj b'e mya b'a'n;

30in kub' t-xmutz'in ttzi twitz ok in kub' ten ximal tu'n tb'inchante mya b'a'n; ex in che kub' tb'etz'an qe ttxo'w ttzi' kyu'n qe twitz te' ok tb'inchante mya b'a'n.

31Ok t-saqix twi' jun xjal, nno'k ik tza'n jun coron te nimb'il te, ma tkamb'a jlu tu'nju b'a'n tb'inchb'en.

32Mas b'a'n qa mya jurat in qo jaw q'ojl twitzju tu'n qok kyuw qk'u'j; mas b'a'n qa ma qjak'unte qib' qu'nx qib' twitzju tu'n tkub' ti'j jun tnam qu'n.

33In jaw ti'n xjal swert ti'j tu'n tlonte alkye tu'n tb'ant tu'n; ex ate Qman in tzaj yek'unte te alkye tu'n tb'ant tu'n.