1Tejtzun qsqix, kykyaqil nejenel kye pal kyuk'ix kytijil xjal judiy e yolin ti'j kyxolx tza'n tten tu'n tkyim Jesús kyu'n.
2B'aj kyk'alo'n, xi kyi'n ex pon kyi'n twitz Poncio Pilato aju gobernador.
Kub' tb'yon tib' Judas3Ate Judas xi q'onte Jesús tuj kyq'ab' xjal, tejtzun tlonte otoq kub' t-sentens Jesús tu'n tkyim, tzaj ta'w tuj tanmi, aj tq'o'n aju 30 saq pwaq kye nejenel kye pal ex kye kytijil xjal ex tma:
4—Ma chin b'inchane il, ma txi nq'o'ne tuj kyq'ab'e jun xjal minti' til, chi Judas.
Atzun kye kyma:
—Minti' qe qaj ti'j, malomte tib'.
5Kyajtzun t-xo'n Judas aju saq pwaq tuj tja Dios, etztzun, xi'tzun, jaw tyob'in tib' ex ok tk'alo'n tqul tu'n tkyim.
6Atzun kye nejenel kye pal jaw kyi'n aju saq pwaq ex kyma:
—Mya q'o'n tu'n ley tu'n tku'x qq'o'n tuj k'ub'l te oyaj, porke aju pwaq lu chojb'il twi' jun xjal tu'n tkyim, che chi.
7Tejtzun kyb'aj yolin ti'j, ajb'entzun pwaq kyu'n tu'n tlaq'et jun piẍ tx'otx' tok tb'i tx'otx' te b'inchb'il ẍoq', atzun tu'n kyku'x maqut qe b'etin xjal tuj tx'otx' lu.
8Kyja'tzun ok q'o'n tb'i tx'otx': Tx'otx' twi' tchk'el jun xjal, ex ax tb'i tok ja'lo.
9Kyja'tzun japun aju q'ma'maj tu'n Jeremías aju t-sanjel Dios. Chi Jeremías: Xitzun kyi'n aju 30 saq pwaq, atzun twi' jun xjalju kyaj b'ant ti'j kyu'n aj Israel.
10Xi kyq'o'n pwaq lu twi tx'otx' te b'inchal ẍoq', ik tza'nx tzaj tma'n Qman weye.
Ok Jesús tuj xjel twitz Pilato Marcos 15.2-5; Lucas 23.3-5; Juan 18.33-3811Atzunte Jesús wa'ltoq twitz gobernador; xitzun tqanin gobernador te:
—¿Apeya ju Rey kye xjal judiy? Chi gobernador.
—Aqine ik tza'n ma tmaya, chi Jesús xi tma'n te.
12Tejtzun kyok ten qe nejenel kye pal kyuk'ix qe kytijil xjal tx'olb'alte til, minti' jun yol tma Jesús.
13Xitzun tma'n Pilato te:
—¿Minti'pe in tb'i'na nimku in q'manjtz ti'ja kyu'n?
14Pero te Jesús mi jun yol xi ttzaq'we'n; tu'ntzunju nim o lab'in gobernador ti'j.
Kub' t-sentens Jesús tu'n tkyim Marcos 15.6-20; Lucas 23.13-25; Juan 18.38—19.1615Kykyaqil ab'q'i in b'ant tu'n gobernador tu'n tetz ttzoqpi'n jun pres tuj ninq'ij, noq alkye kyajb'il tnam xjal tu'n tetz tzoqpi'n.
16Attoq jun xinaq tokx tuj pres, Barrabás tb'i, b'i'maj kyu'n kykyaqil xjal.
17Tej tb'aj kychmon kyib' qe xjal, xi tma'n Pilato kye:
—¿Alkye kyajb'ile tu'n tex ntzoqpi'ne? ¿Kyajpeye tu'n tex ntzoqpi'ne Barrabás ex qa a Jesús aju Crist tb'i? Chi Pilato.
18Porke b'i'ntoq tu'n Pilato, pon q'i'n Jesús kyu'n noq tu'nju at tlo'ch kyk'u'j ti'j.
19Kub'tzun qe' Pilato tuj q'uqb'il tu'n tkawin, tzaj sama'n jun xjal tu'n t-xu'jil q'malte te kyja': Mi'n tz'ok tq'on tib'a ti'j ju xjal tz'aqlxix lu, porke tuj nwitzik'e qonik'an may' nim ma tzik'x wu'ne tu'n tlaj, chi t-xu'jila, chi xjal.
20Atzun qe nejenel kye pal kyuk'ix qe kytijil xjal kub' ti'j kynab'l xjal kyu'n tu'n t-xi kyqanin tu'n tetz tzoqpi'n Barrabás, atzunte Jesús tu'n tkyim.
21Xitzun tqanin juntl maj gobernador:
—¿Alkye jun kyajb'ile tu'n tex ntzoqpi'ne?
Atzun kye xjal kyma:
—Ate Barrabás tu'n tetz ttzoqpi'na.
22Xitzun tma'n Pilato kye:
—¿Titzun ok nb'incha'ye ti'j Jesús aju Crist tb'i?
Kymatzun kykyaqil xjal:
—E tjaw twitz crus.
23Atzunte Pilato xi tma'n kye:
—¿Alkyetzun jun mya b'a'n ma tb'incha?
Atzun kye xjal mas e jaw sch'in:
—E tjaw twitz crus, che chi.
24Tejtzun tlonte Pilato minti' tu'n tb'ant ti'j, noq mas in che jaw tilj xjal, tzaj ti'n Pilato ch'in a', el ttx'jo'n tq'ab' kywitz kykyaqil xjal ex tma:
—Minti' wile ti'j ju xjal tz'aqlxix lu qa ma kyim. Kyke'yinxe ti k'okel, chi Pilato.
25Xi kytzaq'we'n kykyaqil xjal:
—Aqeqo' at qile kyuk'ix qk'wa'le qa ma kyim xjal lu.
26Etztzun tzoqpi'n Barrabás tu'n Pilato; atzunte Jesús b'aj asyalin ex xi q'o'n tu'n Pilato tuj kyq'ab' soldad tu'n tjaw kyq'o'n twitz crus.
27Xitzun q'i'n Jesús kyu'n t-soldad gobernador, okx kyi'n tuj cuartel, b'aj kytxolb'an kyib' kykyaqil soldad ti'j.
28El kyi'n t-xb'alun Jesús, ok kyq'o'n jun kyaq xb'alun ti'j,
29ex b'aj kyb'incha'n jun coron ch'i'x, jax kyq'o'n tuj twi', ex xi kyq'o'n jun ajlaj tuj tb'anq'ab'. E kub'tzun ẍmeje' twitz ex e xmayin ti'j:
—In xi qq'olb'ene aya Rey kye xjal judiy, kukxwit tel tq'ija, che chi.
30Ok kytzub'an tuj twitz, el kyi'n ju ajlaj te ex ok kyb'ju'n ti'j twi'.
31Tejtzun kyb'aj xmayin ti'j, el kyi'n ju kyaq xb'alun ti'j, ok kyq'o'n axju t-xb'alun, ex xi kyi'n tu'n tjaw kyq'o'n twitz crus.
Jaw q'o'n Jesús twitz crus Marcos 15.21-32; Lucas 23.26-43; Juan 19.17-2732Tejtzun kyetz, ok noj jun xjal kywitz, Simón tb'i ex aj Sirene, ok kyjwersin tu'n t-xi tiqan tcrus Jesús.
33E pontzun tuj jun lugar Gólgota tb'i; aju yol Gólgota atzun in tma'n: Jun lugar Tb'aqil Wib'aj.
34Tej kypon tuj lugar lu, xi kyq'o'n tk'a' vinagre smo'n tuk'il ta'l k'ul puro k'a; ex tej t-xi tnik'b'e'n Jesús, minti' xi tk'an.
35Tej tjaw q'o'n Jesús twitz crus, b'aj kysipan soldad qe t-xb'alun kyxolx, ex e ok ten q'il swert kyi'j, alkye tu'n t-xi ti'n junjun.
36E kub'tzun qe' in che xq'uqin ti'j Jesús.
37Kub' kytz'ib'an alkye til, jax kyq'o'n twitz crus tib'aj twi', in tma'n kyja': Atzun Jesús jlu, aju Rey kye xjal judiy.
38Ax ikx jaw kyq'o'n kab'e eleq' twitz crus junx tuk'il Jesús, jun tuj tb'anq'ab' ex jun tuj tnayaj.
39Atzun kye xjal in che ik' twitz crus in che xmayin ti'j Jesús, in xi kyyukun kywi',
40ex in kyma'n:
—Aya in tma'na tu'n tkub' t-xituna tja Dios ex tuj ox q'ij tu'n tjaw tb'incha'na juntl maj, klom tib'a tu'nx tib'a. Qa Tk'wa'l Diosa, tku'tza twitz crus, che chi xjal.
41Ax ikx qe nejenel kye pal, kyuk'ix qe xnaq'tzal ti'j ley, kyuk'ix qe fariseo ex kyuk'ix qe kytijil xjal, in che xmayin ti'j ex in kyma'n:
42—Qe txqantl xjal e klet tu'n, atzun te minti' in b'ant tklonte tib'; qa rey jlu kye aj Israel, b'a'n tu'n tku'tz twitz crus ja'lo tu'ntzun qokslan ti'j.
43O qe' tk'u'j ti'j Dios; e tklet tu'n Dios ja'lo qa axix tok taj Dios ti'j; porke o tma qa Tk'wa'l Dioste, che chi xjal.
44Ax ikx qe eleq' e ok ten ilil ti'j, aqeju e jaw q'o'n twitz crus junx tuk'il.
Tej tkyim Jesús Marcos 15.33-41; Lucas 23.44-49; Juan 19.28-3045Kub' qloljxix tkyaqil twitz tx'otx', xe't-x te chilkuq'ij, maxitzun el spik'e' te las tres te qale.
46Ch'ixtoq tpon las tres te qale, jaw tq'ajq'ajel twi Jesús kyuwxix ex tma:
—Elí, Elí, ¿lama sabactani? Atzun in tma'n ju yol lu: Nman Dios, Nman Dios, ¿tiqu'n ma chin kyaj tkolina? Chi Jesús.
47Tej kyb'inte junjun xjal ax ate'toq, kyma kyxolx:
—Ate jlu in txokon ti'j Elías, che chi.
48Jurat naj xi qelan jun kye, tzaj ti'n jun esponja ex ku'x tmu'n tuj vinagre, ex ok tq'o'n twi' jun ajlaj, jax tq'o'n tu'n tel ttz'ub'an Jesús.
49Atzun kye txqantl kyma:
—E tten nej; qo ke'yin ti'j qa tzul Elías klol te.
50Atzunte Jesús jaw tq'ajq'ajel twi' juntl maj kyuwxix, jawtzun b'aj t-xew.
51Atzunju xb'alun te maqb'il tkub' tuj tmij tja Dios kub' sb'it'j, kab'e piẍ ela, tzaj sb'it'j twi', kub'il t-xe'. Tzaj lu'lun tx'otx' ex qe nmaq ab'j e je'x pax;
52ex qe pantyón e jaqet; ex nimku kyximlal okslal otoq che kyim e jaw anq'in,
53e je'tz tuj pantyón, e ul tuj Jerusalén aju tnam xjan, ex kub' kyyek'un kyib' kywitz nimku xjal tjatzlenxi anq'in Jesús.
54Aju capitán kyuk'ix qeju ate' tuk'il in che xq'uqin ti'j Jesús, tej kylonte kyaqnajnab' ex tkyaqilju o b'aj, tzaj nim kyxob'il, ex kyma:
—Axix tok Tk'wa'l Dios te jlu, che chi.
55Nimku xu'j axtoq ate' in che ke'yin najchaq, otoq che tzaj lpe' qe xu'j lu ti'j Jesús tej ttzaj tuj Galilea, ex otoq che ajb'en te.
56Kyxol qeju xu'j lu attoq Mariy aj Magdala, tuk'ix Mariy kytxu' Jacobo ex José, ex tuk'ix kytxu' tky'ajal Zebedeo.
Tej tku'x maqu'n Jesús Marcos 15.42-47; Lucas 23.50-56; Juan 19.38-4257Tejtzun tqoqax, ul jun xinaq q'inun, José tb'i ex aj Arimatea, otoq tz'ok te t-xnaq'tzb'en Jesús.
58Xi' José tuk'il Pilato, xi tqanin t-ximlal Jesús. Xi tq'o'n Pilato orden tu'n t-xi q'o'n t-ximlal Jesús te.
59Xitzun ti'n José t-ximlal Jesús, okx tb'alq'i'n tuj jun saq xb'alun,
60okx tq'o'n tuj jun pantyón ak'aj, texte José tpantyón, otoq tz'okx tlaku'n tuj pik; tzaj ttolin jun ab'j ma tij, ok tq'o'n ttzi pantyón ex ajtzun.
61Axtoqtzun ate' Mariy aj Magdala, tuk'ix juntl Mariy, q'uql qe twitz pantyón.
In che xq'uqin soldad ttzi pantyón jatum okx q'o'n Jesús62Tuj juntl q'ij b'aj kychmon kyib' qe nejenel kye pal twitz Pilato kyuk'ix qe fariseo, ewtoq tb'antlen kyten xjal tu'n tik'set ju q'ij te ojlab'l.
63Xi kyma'n te Pilato:
—Tat, ma tzul ti'j qk'u'je at jun yol o tma aju sb'ul lu tej itz'xtoq: Ok tel ox q'ij chin jawil anq'ine, chi xjal lu.
64Kyja'tzun q'onxa orden tu'n tkyuwset ju pantyón tuj ox q'ij, mya yajku che ul qe t-xnaq'tzb'en te qonik'an, ex k'eletz kyelq'a'n t-ximlal, ex kxel kyma'n kye xjal: Ma jaw anq'in kyxol kyimni, che chilo. Tu'n jlu mas che b'ajel sb'u'n xjal ja'lo twitzju nej, che chi.
65Xitzun tma'n Pilato kye:
—Lu jun k'loj soldad lu tu'n kyxi' kyuk'ile; kyxi'ye, ex kykyuwsan oke ttzi pantyón ik tza'nx b'a'n kyu'ne.
66E je'xtzun, b'aj kykyuwsa'n ttzi pantyón, ok kyq'o'n jun sey ti'j ab'j, ex e kyaj kyq'o'n qe soldad te xq'uqil.
Who We AreWhat We EelieveWhat We Do
2025 by iamachristian.org,Inc All rights reserved.
