1Aqeye xjal tz'aqlxix che tzalajxe ti'j Qman; qe xjal in che b'et tuj tumelxix b'a'n tu'n t-xi kyq'o'n chjonte te Dios.
2Kyq'onxe chjonte te Qman tu'n tq'ajq'ajel twi chnab' arpa, che b'itzane tuk'il tq'ajq'ajel kitar.
3Kyb'itzanxe jun b'itz ak'aj te Qman, kyq'ajtza'nke qe chnab' mejorxix wen ex che sch'ine tu'n tzalajb'il.
4Aju tyol Qman axix tok te, ex tu'nju tb'inchb'en nne'l qnik' ti'j qa in japunxix tyol.
5In tzalaj Qman qi'j qa in qb'incha'n aju tz'aqlxix ex qa in qo b'et tuj tumelxix; tkyaqil twitz tx'otx' nojni tu'n tk'ujlalil.
6Tu'n tyol Qman ex tu'n T-xew b'ant kya'j tuk'ix tkyaqilju at twitz.
7Tu'n Qman tchmon tib' a' tuj mar, ex junx in kub' tk'u'n aju nintz mar tuj jun tkub'il.
8Aqeye xjal tuj tkyaqil twitz tx'otx', che xob'e twitz Qman ex che nimane te.
9Ex tej tyolin Qman b'i'x b'ant tkyaqil, ex tej t-xi tma'n tyol ax kyaj ten tkyaqil.
10In b'aj ttzakun Qman aju in kub' kyximan qe txqantl nasyon tu'n tb'inchet kyu'n,
11atzunju ximamaj tu'n Qman in kyaj ten te jumajx.
12At tzalajb'il teju nasyon a Qman ma tz'ok te Kydios, aju ma jaw t-sk'o'n Dios tu'n tok te tekuxix.
13Max tuj kya'j in che tzaj tke'yin Qman kykyaqil xjal;
14max tuj tnajb'il in che tzaj tke'yin qe xjal najl twitz tx'otx';
15a Qman o b'inchante kyanmi ex tok tkwent ti'j tkyaqilju in kyb'incha'n.
16Mi jun rey jaku klet noq tu'nju at nim t-soldad, ex maske at nim kyipun xjal, pero mya tu'nju at kyipun jaku che klet.
17Tuj q'oj noqx gan nno'k qe' kyk'u'j xjal kyi'j chej; maske at nim kyipun pero mlay che klet xjal kyu'n.
18Atzun qeju in che niman te Qman ex in qe' kyk'u'j ti'j tk'ujlalil, kukx kwentin qe tu'n.
19In che klet tu'n te kamik, ex minti' in che kyim tuj tq'ijlalil we'yaj.
20Aqo' q'uql qk'u'j ti'j Qman, a onil qe ex ti'j nno'k qklon qib'.
21In tzalaj qanmi ti'j Qman ex q'uqlxix qk'u'j ti'j tu'nju xjan tb'i.
22Awt tk'ujlalila ten quk'ile Qman, ex atzun q'uql qk'u'je ti'ja.
Who We AreWhat We EelieveWhat We Do
2025 by iamachristian.org,Inc All rights reserved.
