Números 27 - Mam Huehuetenango New Ortography

Aju kyetzb'il kyme'jel aj Israel

1Kyxol qe tiyjil Manasés attoq jwe' xu'j kyerman kyib', ex atzun kyb'i jlu: Maala, Noa, Hogla, Milca ex Tirsa. Aqe jlu tme'jel Zelofehad aju tky'ajal Hefer, atzunte Hefer tky'ajal Galaad, atzunte Galaad tky'ajal Maquir, atzunte Maquir tky'ajal Manasés ex atzunte Manasés tky'ajal José.

2E je'x qe xu'j lu ttzi ja xb'alun te mojb'ab'l tib'il tu'n kyyolin tuk'il Moisés, tuk'il pal Eleazar ex kyuk'il qe nejenel kye tnam xjal, ex xi kyma'n kye kyja':

3Aju qmane kyim tuj tzqij tx'otx', pero mya ajun ok tq'on tib' kyuk'il jun k'loj xjal e je'x lpe' ti'j Coré, aqeju jaw kyi'n kyib' ti'j Qman. O kyim te, pero tu'n tex til, ex minti' jun tky'ajal tzaj.

4Pero mya tuj tumel tu'n tnaj tb'i qtzan qmane kyxol txqantl k'loj tiyjil noq tu'nju minti' jun tky'ajal o tzaj. Kyq'ontze jun piẍ tx'otx' qeye kyxol terman qtzan qmane, che chi xu'j lu.

5Atzunte Moisés xi tqanin te Qman alkye tu'n tb'ant tu'n ti'j jlu.

6Tzajtzun ttzaq'we'n Qman te Moisés kyja':

7Tuj tumelxix ta' aju in kyma'n qe tme'jel Zelofehad. Q'onxa jun piẍ kytx'otx' kyxol qe terman qtzan kyman, ex q'onxtzuna tetzb'il qtzan kyman kye.

8Q'manxa kye aj Israel kyja': Ok tkyim jun kye ex qa minti' jun tky'ajal otoq tzaj, tetzun tme'jel kxel q'ot tetzb'il;

9qatzun minti' jun tme'jel, kyetzun terman kxel q'ot tetzb'il;

10qatzun minti' jun terman, kyetzun terman tman kxel q'ot tetzb'il,

11ex qatzun minti' jun terman tman, tetzun jun xjal mas at t-xilen tuk'il kxel q'ot tetzb'il. A jlu jun ley kyjel ten kye aj Israel, ik tza'nx ma txi nma'ne teya, chi Qman te Moisés.

Jaw sk'o'n Josué tu'n Dios tu'n tok te t-xel Moisés Deuteronomio 31.1-8

12Tzaj tma'n Qman te Moisés kyja':

—Tjaxa twi witz Abarim, ex ke'yinxa aju tx'otx' kxel nq'o'ne kye aj Israel.

13Tb'ajlenxitzun tke'yina tx'otx', kymeltzuna ex kpola kyuk'il qtzan tchmana ik tza'n qtzan ttzika Aarón,

14tu'nju kykab'ile e ik'e tib'aj nyole xi nma'ne kyeye tuj tzqij tx'otx' Zin, tej kyok ten tnam xjal yolil mya b'a'n wi'je, ex minti' inx kynimane kywitz xjal tej kyok ten qanil kyk'a a', chi Dios. Atzun o b'aj jlu ttxlaj twi a' Meriba tuj Cades tuj tzqij tx'otx' Zin.

15Xitzun tma'n Moisés te Qman:

16—Nman Dios, aya in tzaj q'onte kychwinqlal kykyaqil xjal; ja'lo sk'o'n jawa juntl nejenel kye tnam xjal etzan tu'na, tu'n tkub' nej kywitz

17ok kyex tuj q'oj ex ok kyajtz meltz'aj, ex tu'n tok te ẍaqlul kye noq jatum tu'n kyxi', tu'ntzun mi'n kyok ik tza'n ẍne'l minti' pastor kyi'j, chi Moisés.

18Atzunte Qman tzaj ttzaq'we'n te Moisés:

—Q'intza Josué aju tky'ajal Nun, aju xinaq lu at nim tnab'l wu'ne; q'o'n kub' tq'ab'a tib'aj,

19q'onkuya twitz pal Eleazar ex kywitz kykyaqil tnam xjal, q'onxa toklen kywitz kykyaqil xjal

20ex q'onx mij toklena te, tu'ntzun t-xi kyniman kykyaqil tnam xjal aj Israel.

21Ex il ti'j tu'n t-xi' Josué tuk'il pal Eleazar, tu'ntzun ttzaj tqanin Eleazar weye tu'n Urim alkye tu'n tb'ant. Te tib'ajxi, atzunte Josué kxel q'mante kye kykyaqil xjal alkye kb'antel kyu'n, chi Qman.

22Tb'inchatzun Moisés ik tza'nx otoq tzaj tma'n Qman te. Tzaj q'i'n Josué tu'n Moisés ex kub' tq'o'n twitz pal Eleazar ex kywitz kykyaqil tnam xjal,

23kub'tzun tq'o'n tq'ab' Moisés tib'aj, ex xi tq'o'n toklen ik tza'nx otoq tma Qman te.