Hebreo 10 - Mam Huehuetenango New Ortography

1Porke ate tley Moisés noq t-xlekumal aju tb'anil attoq tulel, mya aku te ley q'olte tb'anil; kyja'tzun, aqeju in che pon k'ulul mlay che ok tz'aqlxix tu'nju aylex chojb'il kukx in kyq'o'n tkyaqil ab'q'i.

2Ex noqwit at tumel tu'n kyok xjal te tz'aqlxix tu'n ley, owtlo kyaj kykolin tu'n kyq'onte chojb'il; porke b'i'xwitlo kyaj saqix tuj kyanmi qeju in che k'ulun, ex miwtlo in tzaj kyna'ntl ju kyil.

3Pero tu'nju kukx in kyq'o'n chojb'il tkyaqil ab'q'i, kyja'tzun, kukx in tzaj kyna'n kyil tkyaqil ab'q'i.

4Ex mlay najset ju il tu'n kychk'el tor ex kychk'el tman chip.

5Kyja'tzun, tej tul Crist twitz tx'otx' xi tma'n te Dios:

Minti' taja kyi'j alumaj in che'x q'o'n te chojb'il, ex mi kyi'j qe oyaj ti'j twitz awal, pero ma tb'inchaya jun nximlale.

6Minti' tzalaja kyi'j qe chojb'il in che kub' patit ex qe chojb'il il.

7Xitzun nma'ne: Lu qine lu Dios, ma chin ule b'inchalte ju tajb'ila ik tza'n ju yol tz'ib'an wi'je tuj Tu'jil, chi Crist.

8Tnejel in tma'n: Minti' taja kyi'j qe chojb'il ex qe oyaj ex qe chojb'il in che kub' patit ex qe chojb'il il, ex minti' tzalaja kyi'j. Aqe jlu in che q'onjtz ik tza'n in tma'n ley.

9Ex te tkab'in in tma'n: Lu qine lu, Dios, ma chin ule tu'n nb'inchanteye aju tajb'ila. Atzun jlu in tma'n, ma tz'el ti'n Dios ju chojb'il aju in tma'n ojtxi ley; ex aju t-xel ma tz'ok tq'o'n, ax te Crist ma tz'ok te chojb'il.

10Ex tu'nju tb'incha Crist tajb'il Dios, ma qo el tpa'n tu'n qajb'en o'kx te, tu'nju noq junx maj xi tq'on tib' Jesucrist tu'n tkyim te chojb'il il.

11Ax tok tkyaqil q'ij in che ajb'en qe pal judiy, ex kukx in xi kyq'o'n axju chojb'il nimku maj, ex mlay b'ant tu'n tnajset il kyu'n qe chojb'il lu.

12Atzunte Jesucrist noq junx maj xi tq'on tib', ok te jun chojb'il tu'n tnajset il, ex kub'tzun qe' tuj tb'anq'ab' Dios,

13ex atzun in ayon ti'j ja'lo tu'n tkub' kyi'j aj q'oj ti'j.

14Porke tu'n junx chojb'il ma che ok tz'aqlxix tu'n te jumajx aqeju ma che el tpa'n Dios tu'n kyajb'en o'kx te.

15Ex ax in tchik'b'a'n Xewb'aj Xjan qe; porke nej in tma'n ju yol lu:

16Atzunju yol lu kyjel b'ant ti'j wu'ne kyuk'il tuj tq'ijlalil tzul, chi Qman: K'okex nq'o'ne nleye tuj kyanmi, ex kb'el ntz'ib'ane tuj kynab'l.

17Ax ikx in tma'n:

Ex te jumajx mlay tzaj nna'ntle kyil tuk'ix ju kyb'inchb'en mya b'a'n, chi Qman.

18Kyja'tzun, qa ma kub' najset kyil, ya mya il ti'j tu'n tchjet juntl maj il.

B'a'n tu'n qpon laq'e' ttxlaj Dios

19Kyja'tzun, erman, at qoklen tu'n qokx tuj ju Lugar Mas Xjanxix noq tu'nju tchk'el Jesucrist.

20Atzun qo okex tuj ju b'e ak'aj te chwinqlal, aju o tb'incha Crist qe tu'n qokx ti'jxi ju xb'alun te maqb'il tkub' tuj tmij tja Dios; aju xb'alun te maqb'il atzun in yolin ti'j t-ximlal Crist.

21Ate Jesús jun qpal ma' toklen kawil qib'aj, aqo' etzan tu'n Dios.

22Kyja'tzun qo laq'e'x ttxlaj Dios tuk'il qanmi axix tok, ex q'uqlxix qk'u'j ti'j tu'n qokslab'l, ex tx'jo'maj tuj qanmi tu'n Crist tu'n mi'n ttzaj qna'ntl qil, ex tx'jo'maj qximlal tu'n a' saq.

23Kukx tqe' qk'u'j ti'j Dios, ex mi'n jawje' qk'u'j ti'j, porke te Dios in japunxix tyol tu'n.

24Qo ximan ti'j tu'n qkyuwsante qib' qxolx tu'n qk'ujlante qib' ex tu'n qb'inchante b'a'n.

25Ex mi'n txi qkolin tu'n tok qb'uyin qib', ik tza'n junjun ma che naq'et minti' in nno'k kyb'uyin kyib'; ex qq'om qnab'l qxolx, axixpe jlu tu'n qb'inchante, porke in laq'ex ttzaj tq'ijlalil tu'n tul Qajaw.

26Ex qa tu'n qex qgan kukx in qo b'inchan il ex otoq tz'el qnik' ti'j ju yol axix tok, minti' juntl chojb'il tu'n tchjet il.

27Noq o'kx tzul nim xob'ajil qib'aj, porke tzul jwisi ex ktzajel tq'oj Dios kyi'j kykyaqil qeju in che q'ojin ti'j Dios tu'n kynaj tuj q'aq'.

28Porke ojtxi qa at jun xjal minti' in xi tniman tley Moisés, ex qa at kab' ox xjal testiw ti'j qa ax tok minti' in xi tniman xjal ley, b'i'x in kub' t-sentens xjal tu'n tkyim, minti' tumel tu'n tko'pj.

29¿Yajtzun ja'lo, chi tok kyu'ne? ¿Myapelo mas kyuw tcastiw xjal tzul, aju xjal nne'l ik'un Xewb'aj Xjan tu'n, aju q'ol xtalb'il, ex qa in kub' yajan Tk'wa'l Dios tu'n, ex qa nno'k tq'o'n tchk'el Crist te minti' tajb'en? Porke aju tchk'el Crist atzunju in kyuwsante ju yol ma kyaj b'ant ti'j tu'n Dios kyuk'il xjal, ex tu'nju tchk'el Crist otoq kyaj saqix tanmi xjal.

30Porke b'a'n qu'n, ate Qman o q'mante: Wu'ne k'ajel t-xel, aqine chin q'olte castiw, chi Qman. Ax ikx in tma'n tuj Tu'jil: Qe xjal etzan tu'n Qman kb'el kycastiw tu'n.

31Puro xob'ajilxix qa ma kub' tz'aq jun xjal tjaq' tcastiw Dios.

32Pero kyna'ntze tkyaqilju o b'aj kyi'je k'itzqetoq spik'b'anjtz tuj kynab'le tu'n tyol Dios; nim e yajlanjtze kyu'n xjal, ex ik'x kyu'ne.

33At junjun maj e ok yaso'ne ex e b'aj yajla'ne kywitz kykyaqil xjal, ex at junjun majtl tzajxix kyb'ise kyi'j kyuk'ile tej kylonteye in che yajlanjtz.

34Tzajxix kyb'ise kyi'j kyuk'ile e okx tuj pres; ex tej ttzaj orden tu'n tel kyi'n xjal tkyaqilju at kyeye, ik'x kyu'ne ex e tzalaje, porke b'a'n kyu'ne at jun kyetzb'ile tuj kya'j mas tb'anilxix ex mlay naj.

35Kyja'tzun, kukx qe'k kyk'u'je ti'j Dios, ex qa kukx in qe' kyk'u'je ti'j Dios, ma'xix jun oyaj ktzajel tq'o'n Dios kyeye.

36Il ti'j tu'n tten kypasense, tu'ntzun kyb'inchanteye aju tajb'il Dios; oktzun kyk'ma'ye aju ma tzaj ttziyan Dios kyeye.

37Porke in tma'n tuj Tu'jil:

Aju xjal at tulel, ch'ix tul. Mlay we', tzul naj.

38Ex aju xjal ma tz'ok te tz'aqlxix wu'ne, noq tu'n tokslab'l k'anq'il. Ex qa ma kyaj tkolin tokslab'l, mlay chin tzalaje ti'j, chi Dios.

39Atzun qe' mya junx ato' kyuk'il qeju in kyaj kykolin kyokslab'l ex in che naj. Atzun ato' kyuk'il qeju junx qokslab'l kyuk'il tu'n tklet qanmi.