1Aqeye wermaniye, qa ax tok ma txi kyoksla'ne Qajaw Jesucrist, aju at nim tajwalil, mi'n tz'ok ten kywitze ti'j kyxilen xjal.
2Porke qa at jun xjal ma tz'okx kyxole tuj k'ulb'il, tok t-xmulq'ab' q'an pwaq ex tok t-xb'alun in yotz'in twitz, ax ikx qa ma tz'okx jun xjal tal yaj tok t-xb'alun ttx'aqan,
3ex qa ma kyk'ame tuk'il tzalajb'il aju tok t-xb'alun in yotz'in twitz, ex qa ma txi kyma'ne te: Qe'kuya tzalu tuj jun q'uqb'il tb'anilxix; ex qa ma txi kyma'ne teju tal meb'a xjal: Ax we'kuya, ex qa qe'kuya twitz tx'otx', qa che chiye,
4tu'n jlu mya junx ta' kyk'u'je kyi'j kyaqil, ex ma tz'ok kyq'on kyib'e te jwes tu'n kyximb'etze mya b'a'n.
5Erman, aqeye at nk'u'je kyi'je, kyb'inxe nyole: ¿Myapetzun tu'n Dios ma che jaw sk'o'n qe tal meb'a xjal twitz tx'otx' tu'n kyok te q'inun tuj kyokslab'l ex tu'n kyk'monte tkawb'il Dios ik tza'n jun etzb'il, aju tziyimaj tu'n Dios tu'n ttzaj tq'o'n kye qeju in che k'ujlan te?
6Atzun kyeye ma tz'el kyik'une aju tal meb'a xjal ex tu'n jlu in tzaj tch'ixwi. ¿Myapetzun kyu'n q'inun in che yajlanjtze? ¿Myapetzun aqe in che'x jawonte kyeye tu'n kypon q'i'ne kywitz jwes?
7¿Myapetzun ax qe in che xmayin ti'j tb'i Crist tb'anilxix, aju ma txi kyoksla'ne?
8Qa ax tok ma japun tley ju Qrey kyu'ne ik tza'n in tma'n tuj Tu'jil, b'a'n in kyb'incha'ne. Porke in tma'n: Kyk'ujlame qe kyuk'ile ik tza'n kyeye in kyk'ujlan kyib'e.
9Qatzun mya junx ta' kyk'u'je kyi'j xjal, at kyile ex ma che ik'e tib'aj tley Dios, ax tley in q'mante.
10Alkye jun xjal qa ma japun tkyaqilju ley tu'n, pero qa atx taj jun mandamyent minti' ma japun tu'n, at til ti'j, mer ik tza'n kykyaqil mandamyent minti' ma japun tu'n.
11Porke ate Dios o q'mante: Mi'n tb'inchaya aj pajil, ex ax Dios o q'mante: Mi'n b'iyuna. Kyja'tzun, qa in b'iyuna, ma tzik'a tib'aj ley, maske minti' ma tb'inchaya aj pajil.
12Che yoline tuj tumel ex kyb'inchame b'a'n, porke ok che okele tuj xjel tu'nju ley at tzoqpib'l tu'n.
13Porke ok tkub' kysentens xjal, mlay tzaj q'aq'an tk'u'j Dios ti'j jun xjal minti' in tzaj q'aq'an tk'u'j ti'j tuk'il, pero qe xjal in tzaj q'aq'an kyk'u'j kyi'j txqantl xjal, tzul q'aq'an tk'u'j Dios kyi'j tuj tq'ijlalil jwisi.
Aju qokslab'l tuk'ix ju qaq'unb'en14Aqeye wermaniye, ¿ti tajb'en qa at jun xjal in tma'n at tokslab'l, pero qa minti' jun b'a'n in tb'incha'n? ¿Jakupe klet tu'n tokslab'l?
15Qa at jun erman xinaq ex qa jun erman xu'j ma tzul, minti' t-xb'alun ex minti' twa te junjun q'ij,
16ex qa at jun kyxole ma txi tma'n te: Txi'ya, mi'n b'isuna; txa'yink ti'ja ex wa'na, qa chi, pero qa minti' ma txi tq'o'n aju in ajb'en te t-ximlal; ¿ti tajb'en jlu?
17Ikxtzun tten qokslab'lju; qa minti' ma txi qyek'un qa at qokslab'l tu'nju b'a'n in qb'incha'n, tu'n jlu minti' tajb'en qokslab'l.
18Pero jaku tma jun xjal te juntl: In tma'na qa at tokslab'la, ex minti' taq'unb'ena; atzun weye at waq'unb'ene ex at wokslab'le. Teya, qa minti' taq'unb'ena, ¿tza'ntzun tten tu'n tel nnik'e ti'j qa ax tok at tokslab'la? Atzun weye jaku tz'el tnik'a ti'j qa ax tok at wokslab'le, tu'n waq'unb'ene, chilo xjal te juntl.
19Oksla'n tu'na qa o'kx jun Dios at; b'a'n in tb'incha'na. Ax ikx qe ju'ẍ oksla'n kyu'n qa o'kx jun Dios at, ex in che jaw lu'lun tu'n kyxob'il.
20Aya xjal minti' tnab'la, ¿jtoj b'a'n tel tnik'a ti'j jlu? Qa minti' in tyek'una qa at tokslab'la tu'nju b'a'n in tb'incha'na, tu'n jlu minti' tajb'en tokslab'la.
21Ik tza'n te qxe'chel Abraham, ¿Myapetzun tu'n taq'unb'en ok q'o'n te tz'aqlxix tu'n Dios tej tkub' tq'o'n tk'wa'l aju Isaac tb'i tib'aj altar te jun chojb'il te Dios?
22¿Minti'pe nne'l tnik'a ti'j jlu, at tokslab'l Abraham ex at taq'unb'en, ex tu'nju taq'unb'en o tz'aqet-xix ju tokslab'l?
23Japuntzun ju yol in tma'n tuj Tu'jil: Xi toksla'n Abraham tyol Dios, kyja'tzun ok q'o'n te tz'aqlxix tu'n Dios, chi tuj Tu'jil. Ex ok q'o'n tb'i tamiw Dios.
24Tz'elxtzun kynik'e ti'j, aju xjal nno'k q'o'n te tz'aqlxix tu'n Dios tu'n taq'unb'en, ex mya noq o'kx tu'n tokslab'l.
25Ax ikx teju xu'j jawni twitz kyuk'il xinaq, Rahab tb'i, ¿myapetzun tu'n taq'unb'en ok q'o'n te tz'aqlxix tu'n Dios tej t-xi tq'o'n kyposad qe xjal sanjel, ex e je'x t-sama'n tuj juntl b'e?
26Porke ik tza'n tten qximlal, qa minti' qanmi, kyimni ju qximlal; ikxtzun tten qokslab'lju; qa minti' ma txi qyek'un qa at qokslab'l tu'nju b'a'n in qb'incha'n, tu'n jlu minti' tajb'en qokslab'l.
Who We AreWhat We EelieveWhat We Do
2025 by iamachristian.org,Inc All rights reserved.