Daniel 4 - Mam Huehuetenango New Ortography

Tej te'l tuj twitz rey Nabucodonosor

1Xi t-sama'n rey Nabucodonosor jun u'j kye kykyaqil xjal kyuj kykyaqil tnam ex kykyaqil nasyon ex kykyaqil k'loj yol in che yolin xjal ti'j tuj tkyaqil twitz tx'otx', ex in tma'n u'j kyja': Kuchiwt che tene tuj txub'txaj ex tuj b'a'n.

2Waje tu'n kyb'inteye aju b'inchb'en ma'xix t-xilen ma b'ant wi'je tu'n Dios ma'xix toklen.

3Ma'xix t-xilen tb'inchb'en ex qe techal in che b'ant tu'n, aju tkawb'il ax kyjel ten te jumajx ex kukx ktel tipumal tuj tkyaqil tab'q'iyil te jumajx.

4Aqine Nabucodonosor, atintoqe tuj txub'txaj tuj njaye ex in chin tzalajtoqe tu'nju b'a'n nne'la tkyaqil weye.

5Pero at jun aq'b'il, tej in chin tane at jun nwitzik'e ok, ex tzaj nim nximb'etze tu'nju at jun o wile mer ik tza'n tuj witzik', kyja'tzun tzaj nim t-xob'il wi'je.

6E tzajtzun ntxko'ne kykyaqil aj nab'l ate' tuj Babilonia, tu'n ttzaj kytx'olb'a'n alkye t-xilen nwitzik'e.

7E ultzun kykyaqil qe chman, qe aj q'ij, qe aj nab'l ex qeju in che xnaq'tzan kyi'j che'w, ex xi nma'ne nwitzik'e kye, ex minti' tzaj kyma'n ti t-xilen.

8Te mankb'ilxitzun pon Daniel, ex xi nma'ne aju nwitzik'e te. Ate Daniel at kyxew qe dios xjan tuk'il, ex ax juntl tb'i Daniel Beltsasar, ik tza'nx tb'i ndiose.

9Aya Beltsasar nejenel kye aj q'ij, b'a'n wu'ne at T-xew Dios tuj tanmiya, aju Dios xjan, ex nne'l tnik'a ti'j yol kyuw tu'n tel nik'b'aj ti'j. B'intza aju ma wile tuj nwitzik'e ex q'mantza ti t-xilen.

10Atzun jlu ma wile mer ik tza'n tuj witzik' tej koẍltoq qine twi nwatb'ile. Tuj tmijil tx'otx' attoq jun tze' ma' twa'l.

11Aju tze' o ch'iyxix wen ex ma' ok tk'itz; aju tunin japun takl max twitz kya'j ex o q'ancha'lin max ttxa'npun tx'otx'.

12Qe t-xaq puro mejorxix che ke'yin ex at nimxix twitz; cabal in che wa'n kykyaqil tu'n. Qe txkup tuj kojb'il ax in che ojlan tjaq' t-xlekumal, qe chyu'j ax in b'aj kyb'incha'n kyq'u' ttxa'n tq'ab' ex kykyaqil qeju ate' twitz tx'otx' in che anq'in tu'n.

13Ex mer ik tza'n tuj witzik', tej koẍltoq qine twi nwatb'ile, minab'en o wile jun anjel tok te xq'uqil, ku'tz twitz kya'j,

14ex jaw tq'ajq'ajel twi' kyja': Kytx'emin jawe tze' lu, kytx'emin ela qe tq'ab' tuk'ix t-xaq ex kysputun b'aje qe twitz. E kyel oq qe txkup ate' tjaq' t-xlekumal, ax ikx qe chyu'j ate' ttxa'n tq'ab'.

15O'kx kyq'on kyaje ttronc tuk'ix tlok' ex kyk'alon oke tu'n caden k'uxb'il ex caden q'an k'uxb'il, ex e tkyaj ten tuj k'ul tuj kojb'il. E tkub' tq'ab' che'w tib'aj, e tten kyuk'il txkup ex e twa'n k'ul junx kyuk'il.

16E tb'aj tzaksit tnab'l ex e tok tnab'l ik tza'n tnab'l jun txkup, ex aju tyab' twi' ktel wuq ab'q'i.

17Atzun castiw lu ma tzaj q'ma'n kyu'n qe anjel xjan kyok te xq'uqil, tu'ntzun tel kynik' kykyaqil xjal ti'j qa ate Dios ma' toklen ex at nim tipumal tu'n tkawin kyib'aj kykyaqil kykawb'il xjal ex a Dios nno'k q'onte toklen jun xjal tu'n tkawin, noq alkye tajb'il tu'n tok tq'o'n, ex nno'k tq'o'n junjun xjal mas ch'in kyoklen te nejenel kyuj junjun nasyon, chi anjel.

18Atzun nwitzik'e ok jlu; aqine rey Nabucodonosor; ex xi nma'ne te Beltsasar: Q'mantza ti t-xilen, ex mi jun aj nab'l tuj nkawb'ile ma tz'el tnik' ti'j, ex jaku tz'el tnik'a ti'j, ex tuk'ila ta' T-xew Dios, aju Dios xjan, nchiye te Beltsasar.

19Atzunte Daniel, aju ax juntl tb'i Beltsasar, kub' ten nim ximal ti'j, ex b'i'x b'aj tzpet tnab'l, ex aqine rey xi nma'ne te: Beltsasar, mi'n jaw sek'paja tu'n tlaj nwitzik'e ex tu'n tlaj pujb'il ti'j. Tzajtzun tma'n Beltsasar weye: Ay, aju t-xilen twitzik'a lu kyib'ajxwit qe tajq'oja kub' tz'aq.

20Aju tze' matij twa'l ex matij tk'itz xtila, aju max in japun tunin twitz kya'j ex q'anchal twi' max ttxa'npun tx'otx',

21aju puro tb'anilxix qe t-xaq ex nim twitz, cabal in kanun tu'n kywa'n kykyaqil ti'j, aju in che kub' b'une' txkup tuj kojb'il tjaq' t-xlekumal ex in b'ant kyq'u' qe tal chyu'j ttxa'n tq'ab',

22aju tze' lu, atzun in yolin ti'ja, Tat Rey, tu'nju ma ch'iy toklena ex ma tz'ok tipumala. Aju toklena ma'xix ma tz'ok ex ma japun kanun max twitz kya'j, ex aju tkawb'ila ma pon max tuj tkyaqil twitz tx'otx'.

23Ax ikx ma tila jun anjel xjanxix kyja' tku'tz twitz kya'j ex in tma'n: Kytx'emin jawe tze' lu ex kytoqen b'aje, noq o'kx e tkyaj ten ttronc tuk'ix tlok' ex kyk'alon oke tu'n caden k'uxb'il ex caden q'an k'uxb'il ex ax e tten tuj k'ul tuj kojb'il, e tkub' tq'ab' che'w tib'aj ex e twa'n k'ul kyuk'il txkup tuj kojb'il okxi tjapun wuq ab'q'i.

24Aju t-xilen jlu, atzun castiw ma tzaj tma'n Dios ma'xix toklen tu'n ttzaj tib'aja, Tat Rey.

25K'elex lajo'na kyxol xjal ex knajalaya junx kyuk'il qe txkup; k'ul kxel twa'na ik tza'n kye wakẍ, ex kb'el tz'aq tq'ab' che'w tib'aj t-ximlala. Atzun kb'ajel ti'ja tuj wuq ab'q'i, okxi tel tnik'a ti'j qa ate Dios ma' toklen, ex kykyaqil kykawb'il xjal ate' tjaq' tkawb'il, ex a nno'k q'onte kye kawil, noq alkye taj tu'n tok tq'o'n.

26Aju tronc ex tlok' tze' tu'n tkyaj ten, atzun in tma'n tu'n tk'monteya toklena juntl maj okxi tel tnik'a ti'j qa ate Dios mandaril tib'aj tkyaqil.

27Tu'ntzun jlu, Tat Rey, nimanxa aju yol kxel nma'ne teya: Kawina tuj tumelxix, mi'n b'inchantla il; kolin kyaja aju mya b'a'n, ex onina kye meb'a. Qa ma tb'inchaya ikju, b'alo jaku tz'anq'ina tuj txub'txaj ex tkyaqil jaku tz'el b'a'n teya, chi Daniel, tzaj tma'n weye, chi rey.

28Tkyaqil aju o q'manjtz te rey Nabucodonosor o japun.

29Tel-lenxi jun ab'q'i, matoq in b'et rey twi tja tuj Babilonia,

30tma: Kyke'yinxe aju nintz tnam Babilonia tb'anilxix. Tu'n wipumale ma jaw nb'incha'ne jlu tu'n nnajane tuj ex tu'ntzun kyke'yinte xjal aju woklene ma'xix.

31Kukxtoq tyolin rey tej ttzaj q'ajt jun tq'ajq'ajel tuj kya'j ex tma: B'intza ju yol lu aya rey Nabucodonosor: Aju toklena te rey ma tz'el q'i'n;

32k'elex lajo'na kyxol xjal ex k'anq'ila junx kyuk'il qe txkup; k'ul kxel twa'na ik tza'n kye wakẍ tuj wuq ab'q'i, ex maxi tzul tnab'la okxi tel tnik'a ti'j qa ate Dios ma' toklen kyib'aj kykyaqil tnam ate' twitz tx'otx' ex a nno'k q'onte kye kawil noq alkye taj tu'n tok tq'o'n.

33Tujxtzun or lu japun aju t-sentens otoq q'manjtz; ex lajo'n Nabucodonosor kyxol xjal; k'ul xi twa'n ik tza'n kye wakẍ, ex kub' tq'ab' che'w tib'aj t-ximlal; o ch'iy t-xyanil ti'j ik tza'n ttzmal t'iw, ax ikx o ch'iy t-xpak'il tq'ab' ex tqan ik tza'n t-xpak'il tqan t'iw.

Tej tb'anix Nabucodonosor

34Tej tjapun b'aj nsentense, aqine Nabucodonosor jax nke'yine twitz kya'j ex in b'anixe. Xitzun nq'o'ne chjonte te Dios ma'xix toklen ex jaw nnimsa'ne aju Dios itz' te jumajx tu'n yol lu:

Aju tipumal kukx ktel te jumajx; ex aju tkawb'il ax ktel tuj tkyaqil tab'q'iyil.

35Minti' kyoklen kykyaqil xjal ate' twitz tx'otx' tuj twitz. In tb'incha'n aju te tajb'il ik tza'nx tuj kya'j ax ikx twitz tx'otx'. Mi jun xjal jaku b'ant tmayet Dios tu'n, ex mlay tma jun xjal te: ¿Tiqu'n in tb'incha'na jlu? Chiwt.

36Tujx or lu in b'anixe, ax ikx o nk'ame juntl maj woklene te rey ex e niman juntl maj xjal weye. Qe xjal at kyoklen ntxlaje ex qeju mas ma' kyoklen tuj nkawb'ile e ul jyolte weye, ok q'o'n juntl maj woklene te rey tuj ntanmiye, ex mas nim woklene o nk'ame ik tza'n tej ntene nej.

37Ja'lotzun, aqine Nabucodonosor in xi nq'o'ne chjonte teju Rey at tuj kya'j, in chin nimane te ex in jaw nnimsa'ne tb'i, ex tkyaqilju in tb'incha'n, ax tok ex tz'aqlxix, ex jaku b'ant tu'n tu'n kykub' manset qe xjal in jaw kyniman kyib'.