1Aqeye erman at nk'u'je kyi'je, mi'n txi kyoksla'ne kyyol kykyaqil pakb'al yol in kyma'n qa tu'n Dios sama'n qe, noq o'kx kyq'o'nke kwent kyi'j, tu'ntzun tel kynik'e kyi'j qa te Dios qe ex qa mi'n. Ex nimku pakb'al nik'al yol in che b'et kyxol xjal, in kyma'n qa tu'n Dios sama'n qe.
2Pero k'eleltzun kynik'e ti'j qa ax tok tu'n T-xew Dios in che yolin; porke kykyaqil pakb'al yol, qa in kychik'b'a'n qa ax tok xjal te Jesucrist tej tul tzalu twitz tx'otx', tetzun Dios xjal lu.
3Pero kykyaqil pakb'al yol, qa in kyma'n, mya ax tok xjal te Jesucrist tej tul tzalu twitz tx'otx', myatzun te Dios xjal lu. Atzun in tzaja ju yol lu tuk'il ju aj q'oj ti'j Crist, aju o kyb'iye qa tzul; ex lu at kyxol xjal ja'lo.
4Aqeye tal nk'wa'le, te Dios qeye ex ma kub' kyi'j pakb'al nik'al yol kyu'ne; ex mas ma' toklen Dios aju at tuj kyanmiye twitz ju tajaw il at kyxol xjal.
5Kye xjal qe, kyja'tzun in che yolin ti'j ju kye xjal, ex in xi kyb'i'n xjal kyyol.
6Atzun qe te Dios qo'. Aju xjal ojtzqi'n Dios tu'n, in xi tb'i'n qyol; atzunju xjal mya te Dios, minti' in xi tb'i'n qyol. Kyja'tzun nne'l qnik' ti'j alkyeju in yolin ax tok ex alkyeju minti' in yolin ax tok.
Ate Dios at tk'ujlalil7Aqeye erman at nk'u'je kyi'je, qk'ujlam qib' qxolx, porke aju qk'ujlalil te Dioste; ex kykyaqil qeju at kyk'ujlalil, tk'wa'l Dios qe ex ojtzqi'n Dios kyu'n.
8Alkye minti' tk'ujlalil, na'nx tel tnik' ti'j Dios, porke ate Dios at tk'ujlalil.
9Tu'n jlu ma tzaj tyek'un Dios tk'ujlalil qi'j; tu'nju tzaj t-sama'n Dios o'kxku jun Tk'wa'l, ul tzalu twitz tx'otx' tu'ntzun tten qchwinqlal noq tu'n.
10Tu'ntzun jlu nne'l qnik' ti'j ju tk'ujlalil: Mya aqeqo' ma qo k'ujlante Dios, noq o'kx ate Dios ma qo tk'ujla ex tzaj t-sama'n aju Tk'wa'l tu'n tok te chojb'il qil.
11Aqeye erman at nk'u'je kyi'je, qa ik tten tk'ujlalil Dios qi'j, ax ikx qe qk'ujlam qib' qxolx.
12Mi jun xjal o til twitz Dios, pero qa ma qk'ujla qib' qxolx, axtzun najl Dios tuj qanmi, ex aju tk'ujlalil Dios ma tz'aqet-xix tuj qanmi.
13Tu'ntzun jlu nne'l qnik' ti'j qa ax najl qo' tuk'il Dios, ax ikx te najl tuj qanmi, porke ma tzaj tq'o'n Dios aju T-xew qe.
14Ax qo'ye ma qile ex in xi qchik'b'a'ne ma tzaj t-sama'n Qman Dios aju Tk'wa'l tu'n tok te Kolol kye xjal.
15Alkye in tchik'b'a'n qa ax tok Tk'wa'l Dios te Jesús, ax najl Dios tuj tanmi, ax ikx te ax najl tuk'il Dios.
16Kyja'tzun nne'l qnik' ti'j tk'ujlalil Dios qi'j ex ma txi qoksla'n. Ate Dios at tk'ujlalil, ex alkyeju at tk'ujlalil tuj tanmi, ax najl tuk'il Dios, ax ikx te Dios ax najl tuj tanmi.
17Tu'n jlu in tz'aqet-xix qk'ujlalil tu'ntzun tqe'xix qk'u'j ok tul tq'ijlalil jwisi; ex kqeb'il qk'u'j, porke ik tza'n tten Jesucrist, ikxtzun qtenju tzalu twitz tx'otx'.
18Qa at qk'ujlalil mlay qo xob', ex qa tz'aqlxix qk'ujlalil, tu'n jlu nne'l ti'n ju xob'ajil. Porke aju xob'ajil in tzaj tu'n tlaj ju castiw kyja' ttzaj; kyja'tzun alkye in xob', na'nx ttz'aqet tk'ujlalil tuj tanmi.
19In qk'ujla'n Dios, porke tnejel ma qo k'ujlanjtz tu'n.
20Ex qa at jun xjal in tma'n: In nk'ujla'ne Dios, qa chi, ex qa nne'l tik'un terman, nik'al yol te; ex qa minti' in tk'ujla'n xjal terman aju nno'k tke'yin, ax mlay b'ant tu'n tk'ujlanjtz Dios tu'n, aju na'nx tok tke'yin.
21Ex atzun mandamyent jlu ma qk'am te Jesucrist, in tma'n: Alkyeju k'ujla'n Dios tu'n, ax ikx k'ujlam terman.
Who We AreWhat We EelieveWhat We Do
2025 by iamachristian.org,Inc All rights reserved.
