Apocalipsis 18 - Mam Huehuetenango New Ortography

B'i'x ma naj tnam Babilonia

1Tb'ajlenxitzun jlu o wile juntl anjel nim tipumal ku'tz tuj kya'j ex kub' spik'e' twitz tx'otx' tu'n t-spik'umal.

2Ex jaw tq'ajq'ajel twi' kyuwxix, ex tma:

Ma kub' xitj, ma kub' xitj aju nintz tnam Babilonia, ex ma tz'ok te kynajb'il kykyaqil txkaj ju'ẍ puro ploj qe, ex ma tz'ok te kyja kykyaqil jil in che lipan twitz kya'j tzu'w kyi'j ex ik'b'ilxix qe.

3Porke kykyaqil nasyon ma che ok k'al q'e'n tu'n Babilonia tu'nju vin xi tq'o'n kye; aju vin atzun in yolin ti'j ju tyaẍb'il Babilonia; ex qe rey twitz tx'otx' ma che yaẍin tuk'il, ex qe comersyant twitz tx'otx' ma che q'inumax tu'nju nimxix tachb'il.

4Ex o nb'iye juntl tq'ajq'ajel wib'aj tzaj tuj kya'j in tma'n:

—Aqeye xjal etzan wu'ne, kyetze tuj tnam lu tu'n mi'n kyb'inchane il junx tuk'il, ex tu'n mi'n kyk'ixb'isanjtze junx tuk'il.

5Porke ma chmet nimxix til, ex ma tzaj tna'n Dios ju tb'inchb'en mya b'a'n.

6Kyq'onxe te ik tza'nx te tzaj tq'o'n kyeye, ex kyq'onxe kab' maj t-xel ik tza'nx tb'inchb'en; tuj ju vas jatum ku'x tq'o'n ju k'ab'j kye txqantl, kyb'inchame kab' maj t-xel, kyq'onxe te tk'a'.

7Ik tza'n te ma jaw tniman tib' ex ma anq'in tuj achb'il, ikxtzun kyq'onxe k'ixb'isab'l te ex tu'n tjaw oq'; porke in tma'n tuj tanmi: Rey qine, q'uql qine tu'n nkawine, ex mya meb'a xu'j qine, mlay tzaj oq'el wi'je, chi xu'j.

8Kyja'tzun, tuj junx q'ij ktzajel k'ixb'isab'l tib'aj; ktzajel kamik tuk'ix oq'el tuk'ix we'yaj ti'j, ex k'okex patun tuj q'aq'; tu'nju at tipumal Qman Dios aju ma kub' q'onte tcastiw.

9Ex qe rey twitz tx'otx', aqeju ma che yaẍin tuk'il ex ma che anq'in tuk'il tuj achb'il, che oq'el ex che wu'yil ti'j ok kylonte t-sib'el tq'aq'al.

10Najchaq che tzajel we' tu'n xob'ajil tu'nju k'ixb'isab'l te, ex ok kyma:

—B'ek'b'il twitza, b'ek'b'il twitza, nintz tnam Babilonia, aya jun tnam at tipuna, porke tuj junx or ma tzaj jwisi tib'aja.

11Ex qe comersyant twitz tx'otx' che oq'el ex che wu'yil ti'j tnam lu, ex mi a'l jun xjal tu'n tlaq'onte kyk'a'ẍ.

12Atzun kyk'a'ẍ jlu: Q'an pwaq, tuk'ix saq pwaq, tuk'ix tal ab'j tb'anilxix, tuk'ix tal ab'j perla tb'i, tuk'ix xb'alun saqxix ex tz'umin twitz b'incha'maj ti'j noq' lino, tuk'ix xb'alun tb'anilxix b'incha'maj ti'j noq' seda, tuk'ix xb'alun ẍjulin ex kyaq ke'yin, tuk'ix tkyaqil tze' at tk'ok'jal, tuk'ix tkyaqil ti'xti b'incha'maj ti'j marfil, ex tkyaqil ti'xti b'incha'maj ti'j tze' tb'anilxix, ex ti'j q'an k'uxb'il, ex ti'j k'uxb'il, ex ti'j saq ab'j mármol tb'i,

13tuk'ix canela, tuk'ix tk'ok'jal t-sem tib', tuk'ix storak, tuk'ix tq'olil tze' mirra tb'i, tuk'ix perjum, tuk'ix vin, tuk'ix aseyt, tuk'ix arin, tuk'ix triw, kyuk'ix wakẍ, kyuk'ix ẍne'l, kyuk'ix chej, kyuk'ix carwaj, kyuk'ix qe xjal majen in che'x k'a'yin.

14Ex kxel kyma'n xjal teju nintz tnam kyja':

—Tkyaqilju tb'anil lob'j pon tk'u'ja ti'j minti'tl in k'ayinjtz ja'lo; tkyaqilju achb'il ex ju tb'anil at teya ma che kub' naj, mlayx che knet juntl maj tu'na, che chi.

15Aqeju k'ayil tkyaqil jlu ex ma che ok q'inun tu'n nintz tnam lu, najchaq che tzajel we' tu'nju in che xob' tu'n tlaj ju k'ixb'isab'l te, in che oq' ex in che wu'yin,

16in kyma'n:

—B'ek'b'il twitz, b'ek'b'il twitz aju nintz tnam lu, aju tok t-xb'alun saqxix ex tz'umin twitz b'incha'maj ti'j noq' lino, tok t-xb'alun ẍjulin ex kyaq ke'yin, ex tb'inchan tib' tok q'an pwaq ti'j kyuk'ix qe tal ab'j tb'anilxix kyuk'ix qe tal ab'j perla kyb'i,

17porke tuj junx or ma naj tkyaqil tq'inumab'l.

Kykyaqil qe yukul barc, kyuk'ix qe onil kye, kyuk'ix qeju in che b'et tuj barc, kyuk'ix kykyaqil qeju in che aq'nan tuj mar, e tzaj we' najchaq;

18ex tej kylonte t-sib'el tq'aq'al e jaw sch'in:

—¿Atpe juntl tnam ik tza'n ju nintz tnam lu? Che chi.

19Ex jax kychitun quq tuj kywi', ex e jaw sch'in, in che oq' ex in che wu'yin, in kyma'n:

—B'ek'b'il twitz ju nintz tnam. Ex kykyaqil qe tajaw barc tuj mar ma che q'inumax tu'n tq'inumab'l, ex tuj junx or b'i'x ma naj.

20Aya kya'j, tzalajxa ti'j, ax ikx kyeye okslal, ex apostol, ex t-sanjel Dios, che tzalajxe ti'j; porke ma kub' t-sentens tu'n Dios tu'n tlaj e k'ixb'isanjtze tu'n, che chi.

21Ex at jun anjel nim tipumal, jaw ti'n jun ab'j ik tza'n jun kya' ma'xix te cheb'l triw, ex xi t-xo'n anjel ju ab'j tuj mar, ex tma:

—Ikxtzun kxel xo'na aya nintz tnam Babilonia, ex mlayx kneta juntl maj.

22Ex mlay b'injtz juntl maj tq'ajq'ajel twi' chnab' arpa kyuj qe cay ate' tuja, mi tq'ajq'ajel b'itz, mi tq'ajq'ajel twi' xux, ex mi tq'ajq'ajel twi' chun; ex mlay che tentl tuja qe xjal junxilchaq kyaq'un, ex mlay b'injtz juntl maj tq'ajq'ajel twi' kya' tuja.

23Mlay spik'b'anjtz juntl maj tuja tu'n t-spik'umal kandil, ex minti'tl ninq'ij te mejeb'le'n k'okel tuja. Qe comersyant ate'toq tuja nej, atzun qeju ma' kyoklen ate' twitz tx'otx', ex tu'n kyky'ab'ene ma che sb'unjtz kykyaqil nasyon.

24Ex atzun ma knet kychk'el qe t-sanjel Dios ex kychk'el qe okslal, ex kychk'el kykyaqil qeju o che kub' b'yo'n twitz tx'otx' tu'n tlaj kyokslab'l ti'j Dios.