Ezequiel 45 - Mam Huehuetenango New Ortography

Aju tx'otx' pa'nmaj tu'n tajb'en te Qman Ezequiel 48.9-20

1Ok tkub' kypa'ne tx'otx' tu'n t-xi kyq'o'ne te junjun k'loj kyiyjile, il ti'j tu'n tel kypa'ne jun piẍ tx'otx' te kab'laj kilómetro tuk' mey tnuqb'il ex laj kilómetro twitz, aju tx'otx' lu k'elel kypa'ne tu'n tajb'en te Qman. Tkyaqil tx'otx' lu k'okel te xjan.

2Tujtzun tx'otx' k'elel kypa'ne jun piẍ tu'n tjaw b'inchet tja Dios tuj, aju tx'otx' k'elel kypa'ne te 250 metro junjun pak', ex ti'jele kyjel kyq'o'ne jun piẍ tx'otx' te 25 metro twitz ex minti' at tuj.

3Tuj ju tx'otx' pa'nmaj te Qman kb'el echit jun piẍ tx'otx' te kab'laj kilómetro tuk' mey tnuqb'il ex jwe' kilómetro twitz, ex atzun tx'otx' lu k'okel mas xjanxix: Atzun Kjawil b'inchet tja Dios tuj.

4Aju tx'otx' lu k'ajb'el kye pal, aqeju in che ajb'en tuj tja Qman ex in che ul laq'e' twitz tu'n kyajb'en te. Atzun lugar lu jatum tu'n tjaw kyb'incha'n kyja. K'okel te jun lugar xjan jatum tu'n tkub' ten tja Qman.

5Ax ikx at juntl tx'otx' te kab'laj kilómetro tuk' mey tnuqb'il ex jwe' kilómetro twitz, pa'nmaj te kyetzb'il aj Leví aqeju in che ajb'en tuj tja Dios, tu'ntzun ten kytanmi jatum tu'n kynajan.

6Ax ikx k'elel pa't jun piẍ tx'otx' te kab'laj kilómetro tuk' mey tnuqb'il ex kab'e kilómetro tuk' mey twitz jatum kjawil b'inchet tnam, aju tx'otx' lu tkub' tjaq' tx'otx' xjan jatum kjawil b'inchet tja Dios. Aju tx'otx' lu k'okel te kyetzb'il kykyaqil aj Israel.

Aju tx'otx' pa'nmaj te kawil Ezequiel 48.21-22

7Ax ikx k'elel pa't kab'e piẍ tx'otx' tu'n tajb'en te kawil. Jun piẍ kxel qe' ti'j ju tx'otx' xjan tu'n tpon b'aj ti'j tmojonil tx'otx' tuj tjawitz q'ij, ex juntl piẍ kxel qe' ti'j ju tx'otx' xjan tu'n tpon b'aj ti'j tmojonil tx'otx' tuj telex q'ij. Aju tkub' tumlal tjawitz q'ij tuk'ix ju tkub' tumlal telex q'ij junx echb'inte kynuqb'il ik tza'n qe tx'otx' otoq txi q'o'n kye junjun k'loj kyiyjil aj Israel.

8Aju tx'otx' lu k'okel te tetzb'il kawil kyxol aj Israel tu'ntzun mi'n tkub' kyyajla'n juntl maj qe kawil qe xjal etzan wu'ne; noq o'kx kxel kyq'o'n kytx'otx' teyle junjun k'loj kyiyjil aj Israel.

Aju ley tu'n tajb'en tu'n kawil

9Aqine Dios kxel nma'ne jlu: Nim mya b'a'n ma kyb'inchaye, aqeye kawil kyxol aj Israel. Mi'n che b'iyintle xjal ex mi'n che kub' kyyajla'ne. Kyb'inchame tkyaqil tuj tumel ex tz'aqlxix. Kykolinxe tu'n tel kyelq'a'ne kytx'otx' qe xjal etzan wu'ne. Aqine Dios in chin q'mante jlu.

10Che ajb'en kykyaqil mark ex malb'il cabalxix kyu'ne.

11Aju malb'il triw il ti'j tu'n tten junx ta' tuk'il ju malb'il ta'l twitz uva. Aju malb'il homer tb'i 220 litro tuj, ex atzunju k'ajb'el te ttxuylal. Tuj jun homer in xi' laj bato ta'l twitz uva, ax ikx in xi' laj efa triw tuj jun homer.

12Ax ikx qe mark aqeju che ajb'el te malb'il atzun qe jlu: Winqin gera junx ta' talil tuk'il jun siclo, ex jun siclo ch'ixmi mey ons talil; 60 siclo junx ta' tuk'il mina.

13Atzun qe oyaj lu b'a'n t-xi kyq'o'ne: Aju triw tuk'ix sebad te 60 b'yuj k'elel kyu'ne, ex kxel kyq'o'ne jun b'yuj te oyaj.

14Ax ikx ktelb'a aseyt kyu'ne, te 100 pa'n k'elel, ex kxel kyq'o'ne jun pa'n te kyoyaje.

15Atzun kyi'j qe ẍne'l k'eletz kyi'ne jun kyxol kab' syentchaq, aqeju ulni kynab'l at kyxol aj Israel. Aqeju twitz awal lu che ajb'el te kyoyaje te Dios, ax ikx qe alumaj che ajb'el te chojb'il patun in che kub', ex te chojb'il te mojb'ab'l tib'il, aqeju in che'x q'ot tu'n tnajset kyile. Aqine Dios in chin q'mante jlu.

16Kykyaqil aj Israel il ti'j tu'n t-xi kyq'o'n oyaj lu te kawil at kyxol,

17atzunte kawil kxel q'onte kye alumaj te chojb'il patun in kub', ex qe oyaj twitz awal, ax ikx oyaj ta'l twitz uva aju in xi q'ot ok in che tzaj ke'yin ak'aj xjaw, ex kyuj qe q'ij te ojlab'l ex kyuj kykyaqil ninq'ij in che ik'set kyxol aj Israel. Ax ikx il ti'j kxel tq'o'n chojb'il il, kyuk'ix qe oyaj twitz awal, ex qe chojb'il patun in che kub', ex chojb'il te mojb'ab'l tib'il, tu'ntzun tnajset kyil aj Israel.

Aju ninq'ij te Xjan Q'ij

18Aqine Dios in chin q'mante jlu: Tuj tnejel q'ij te tnejel xjaw kxel kyq'o'ne jun tal tor minti' tpaltil te chojb'il il, tu'ntzun t-saqset tuj tja Dios.

19Ktzajel ti'n pal ch'in tchk'el alumaj aju otoq txi q'ot te chojb'il il, ex k'okel tq'o'n kyi'j tmarkil tlamel tja Dios, ex kyi'j kykyajil tb'utx' altar, ex kyi'j tmarkil tlamel ja ate' tuj tkab'in ttxa'n pe'n.

20Ax jlu kb'antel tuj twuqin q'ij te xjaw, tu'ntzun tnajset kyil xjal, aqeju otoq che b'inchan il mya ximantoq kyu'n, ex tu'nju minti' nne'l kynik' ti'j. Kyja'tzun tten ksaqsetel tja Dios.

21Tuj tkyajlajin q'ij te tnejel xjaw kqeb'il kyu'ne tu'n tik'set ninq'ij te Xjan Q'ij, ex tuj enter wuq q'ij che wa'le pan minti' t-samel tu'n tjaw mal tk'u'j.

22Tuj q'ij lu kxel tq'o'n kawil jun tal tor te chojb'il til, ex te chojb'il kyil kykyaqil aj Israel.

23Teyle junjun q'ij teju wuq q'ij ninq'ij ktzajel tq'o'n kawil wuq tor ex wuq tman ẍne'l minti' kypaltil, te chojb'il te weye, aqeju patun in che kub'. Ax ikx teyle junjun q'ij kxel tq'o'n jun tman chip te chojb'il il.

24Ti'j junjun tor ex junjun tman ẍne'l kxel q'ot kyaje alm triw ex ox litro tuk' mey chib'j aseyt.

Aju ninq'ij ok kyjaw b'inchet tal ja t-xaq tze'yin kywi'

25Ax ikx kyuj ninq'ij ok kyjaw b'inchet tal ja t-xaq tze'yin kywi', aju in kub' ik'set tuj olaj tajlal twuqin xjaw, kxel tq'o'n kawil qe oyaj tuj enter wuq q'ij, aylex qe chojb'il il kxel tq'o'n ik tza'nx otoq txi tq'o'n nej, atzun qe jlu: Qe alumaj patun in che kub', ex qe oyaj twitz triw, ax ikx chib'j aseyt.