Proverbios 8 - Mam Huehuetenango New Ortography

In yolin aju nab'l

1Aju ojtzqib'l in jaw tq'ajq'ajel twi' kyuwxix wen, ex aju nab'l in q'ajt twi'.

2In kub' we' kywi' qe witz, ex in kub' ten jatum in b'aj kypa'n kyib' qe b'e,

3in q'ajt kytzi tlamel tnam, ax ikx jatum nno'kx b'e tuj tnam, ex in tma'n kyja':

4Aqeye xinaq, te kyeye aju nyole lu:

5Aqeye ku'xun minti' ch'in b'a'n kyu'ne ex minti' kynab'le, kyxnaq'tzam kyib'e tu'n tten kynab'le ex tu'n tel kynik'e ti'j alkye tu'n tb'ant kyu'ne.

6Kyq'ontz kywi'ye ti'j ju yol kxel nma'ne ma' toklen ex tz'aqlxix.

7Ax tok aju yol kxel nma'ne, ex mi'n waje tu'n t-xi nma'ne nik'aj yol.

8Tkyaqil nyole kxel nma'ne puro tz'aqlxix; mi jun mya ax tok ex mi jun ẍo'k ti'j.

9Clarxix qe nyole ex tz'aqlxix tuj twitz ju xjal at tnab'l ex elni tnik' ti'j.

10Te t-xel saq pwaq ex q'an pwaq, kyjyome aju xnaq'tzb'il ex aju ojtzqib'l.

11Aju nab'l mas wi'yilxix kywitz qe tal ab'j tb'anilxix, ex aju ti'xti nim in pon kyk'u'j xjal ti'j mlayx pon ik tza'n ju nab'l.

12Aqine nab'l, junx najl qine tuk'il ojtzqib'l, at nnab'le ex mejorxix consej at wuk'ile.

13Aju tu'n qniman te Qman, atzun tu'n tel qik'un ju mya b'a'n. Aju xjal in jaw tniman tib', aju xjal jawni twitz, aju kyb'inchb'en xjal mya b'a'n ex ju nik'aj yol, ik'un qe wu'ne.

14Aqine in chin kub' ximante tu'n tb'ant jun ti'xti ex in japun wu'ne; ex wuk'ile ta' nab'l ex ipumalj.

15Wu'ne in b'ant kykawin qe rey ex wu'ne in che b'ant qe ley tuj tumelxix kyu'n kawil.

16Wu'ne in b'ant kykawin qe nejenel kye nasyon, ex wu'ne in xi kyb'incha'n jwes ti'j kyxtis xjal.

17K'ujla'n qe xjal wu'ne, aqeju k'ujla'n qine kyu'n, ex qeju in che jyo'n wi'je, in chin knete kyu'n.

18Wu'ne in xi nq'o'ne kyq'inumab'l xjal ex nimb'il kye, ex wu'ne nne'l b'a'n tkyaqilju in kyb'incha'n.

19Aju in xi nq'o'ne kye mas b'a'n twitz q'an pwaq tb'anilxix, ex aju in xi woyine kye mas b'a'n twitz saq pwaq tb'anilxix.

20In chin b'ete tuj b'e jiqun ti'j, ex in chin b'ete tuj b'e tz'aqlxix.

21Kxel nq'o'ne kyetzb'il qeju in che k'ujla'n weye.

22A Qman o b'inchante weye t-xe tnejel, tej na'nxtoq tb'ant jun ti'xti tu'n.

23In b'inchanjtze tu'n atxix t-xe tnejel, tej na'nxtoq tb'ant jun ti'xti tu'n.

24In itz'je tu'n tej na'nxtoq kyb'ant qe nintz mar, ex tej na'nxtoq kyjaw jlet qe nima ex qe twi a'.

25Tej na'nxtoq kyb'ant qe nmaq witz ex qe tal witz, otoq chin itz'je tu'n Qman;

26ex tej na'nxtoq tb'inchet tx'otx', mi qe kojb'il mi ch'in tquqil tx'otx'.

27Tej tb'ant twitz kya'j, aju tjaw tib'aj nintz mar, lu qine atine.

28Tej kyb'ant qe muj twitz kya'j, ex tej kyjaqet qe twi a' max t-xe mar,

29ex tej tkub' tq'o'n tmojonil ex tej t-xi tma'n te tu'n mi'n tex qojl tuj tlugar ex tej tkub' tq'o'n tq'uqb'il tx'otx',

30lu qine atine ttxlaj tu'n tkub' ximet alkye tu'n tb'ant. Tkyaqil q'ij o tzalaj wi'je ex kukx in chin tzalaje twitz.

31In chin tzalaje ti'j twitz tx'otx' otoq b'ant tu'n, ex in chin tzalaje kyi'j qe xjal.

32Atzun ja'lo, aqeye nky'ajal, chin kyb'intze; kyb'inchame aju in xi nma'ne kyeye, ex tu'n jlu che tele tuj tzalajb'il.

33Kyq'onx kywi'ye ti'j xnaq'tzb'il ex mi'n tz'el kyik'une ju nab'l.

34At tzalajb'il teju xjal in tzaj tq'o'n twi' ti'j nyole, ex tkyaqil q'ij in ayon ttzi njaye tu'n nknete tu'n.

35Ex qa ma chin knete tu'n, knetel tchwinqlal ex knetel t-xtalb'il Qman tu'n;

36ex qa ma tz'el tpa'n tib' xjal wi'je, tu'nx kb'ajel tk'ixb'isan tib', ex kykyaqil qeju in chin el ik'une kyu'n in che jyon ti'j kamik.