Amós 5 - Mam Huehuetenango New Ortography

Txokb'il tu'n Dios kyi'j xjal tu'n kyajtz meltz'aj tuk'il

1Kyb'intze nyole aqeye aj Israel; kyb'intze b'itz b'isb'ajilxix in chin b'itzane kyi'je:

2Ik kyten aj Israel ik tza'n jun tal q'apoj na'nx tlonte xinaq; ma che kub' tz'aq ex mlay che jaw we'tl; ax ma che kub' tx'aye' twitz kyex kytx'otx' ex mi a'l jun b'a'n tjaw wab'ante kye.

3Chi Qman Dios in tma'n kye aj Israel: Qa at jun tnam ma txi t-sama'n jun mil xinaq tuj q'oj, noq jun syent che ul meltz'aj, ex qa at jun tnam ma txi t-sama'n jun syent, noq lajx che ul meltz'aj.

4Chi Qman kye aj Israel: Chin kyjyome tu'ntzun kyanq'ine.

5Mi'n che'xe qanil onb'il tuj Betel, mi'n che'xe tuj Gilgal ex mi'n che'xe tuj Beerseba, porke qe xjal tuj Gilgal che xel q'i'n pres najchaq ex mlayx tzik'x ti'j, atzunju tnam Betel kb'ajel xitj.

6Che jyone ti'j Qman tu'ntzun kyanq'ine; qatzun mi'n ma b'ant kyu'ne ikju, ktzajel t-sama'n Qman q'aq' kyib'aj aj Israel ex mi a'l jun tuj Betel jaku yupj q'aq' lu tu'n.

7Ay b'ek'b'il kywitze tu'nju minti' in xi kyb'incha'ne kyi'j xjal tuj tumel, ex nno'k kyq'o'ne ley te minti' tajb'en.

8Ate Qman b'inchante kye che'w Wo'tz kyb'i ex qe che'w Tqan Q'inb'il kyb'i, in ch'expaj qonik'an tu'n tu'n tok te q'ijtl, ex aju q'ij tu'n tok te qonik'an puro qlolj; in txokon ti'j a' tu'n tjatz tuj mar, ex in tzaj qojl tu'n tib'aj tx'otx'; Qman, atzun tb'iju.

9Qeju at nim kyipun noq minab'en in che naj tu'n ik tza'n tu'n q'ankyoq, ex in che b'aj naj qe cuartel tu'n.

10Ay b'ek'b'il kywitze aqeye in che el ik'unte kye qeju in che b'inchante ti'j xtis tuj tumelxix, ex nne'l kyik'une aju testiw in yolin tuj tumelxix.

11Mlay che najane tuj kyjaye ab'j xpe'limaj ma jaw kyb'incha'ne, ex mlay txi kynik'b'e'ne ta'l twitz uva tb'anilxix ma ku'x kyawa'ne, tu'nju in che yajlane kyi'j qe meb'a ex nim twitz awal nne'l kyqanine kyi'j te ta'l tx'otx'.

12Ma tz'el nnik'e ti'j nimku mya b'a'n in kyb'incha'ne, nik'lopun il in b'ant kyu'ne: In che yajlane kyi'j qeju tz'aqlxix, in tzaj kyk'mo'ne pwaq noq tu'n mi'n tkub' kysentens xjal kyu'ne ex minti' in xi kyb'incha'ne kyi'j qe meb'a tuj tumelxix tuj jusgad.

13Kyja'tzun, aju xjal at tnab'l minti' in q'ajt, tu'nju mya b'a'n in kyb'incha'n xjal tuj tq'ijlalil lu.

14Kyjyome aju b'a'n ex mya aju mya b'a'n, tu'ntzun kyanq'ine, kyja'tzun ktel Qman kyuk'ile, aju Tajaw Tkyaqil, ik tza'n in kyma'ne.

15Kyik'un ele aju mya b'a'n ex kyk'ujlame aju b'a'n. Kyb'inchanxe ti'j xtis tuj tumelxix tuj jusgad, qapelo jaku tzaj q'aq'an tk'u'j Qman Dios aju Tajaw Tkyaqil kyi'j aj Israel, aqeju otoq che kyaj anq'in.

16Chi Qman Dios aju Tajaw Tkyaqil, in tma'n kyja': Tuj tkyaqil part k'okel oq'el, ex tuj tkyaqil cay che sch'il qe xjal tu'n ta'w k'ixk'oj. Che tzajel txko'n aq'nal xjal tu'n kyoq' junx kyuk'il, kyuk'ix qe aj oq'el tu'n kyul oq'el.

17Tjaq' tkyaqil tqan uva k'okel oq'el ok wule q'olte castiw kyib'aje, chi Qman.

18Ay b'ek'b'il kywitz qeju in kyajb'e'n tu'n tul tq'ijlalil tu'n ttzaj castiw tu'n Qman. ¿B'a'npe kyu'ne tza'n ktelb'a q'ij lu te kyeye? Aju tq'ijlalil lu puro qlolj ex mya spik'un.

19Ik ktelb'a ik tza'n ok nne'l oq jun xjal twitz jun b'alun tu'n tklet, ex nno'k tk'ulb'an naj tib' twitz jun txkup oso, ex qa ik tza'n jun xjal nno'kx oq tuj tja tu'n tklet, ex ok tok tq'o'n tq'ab' twitz ja, nno'k tx'a'n tu'n jun lob'aj.

20Ax tok, tuj tq'ijlalil Qman kb'el qloljxix twitz tx'otx' ex minti' spik'un, puro qxopin k'okel ex minti'x ch'in spik'un ktel.

21Chi Qman kyja': Ik'un wu'ne qe ninq'ij in kub' kyik'sa'ne ex minti'x in chin tzalaje ti'j b'uyj tib'il ma' t-xilen nno'k kyu'ne.

22Maske kub' kypatune alumaj te nimb'il weye, ex maske tzul kyi'ne twitz kyawale te kyoyaje te weye, minti' waje kyi'j; mlay nk'ame qe tal wakẍ ulni kynab'l ok tul kyi'ne te kyoyaje te mojb'ab'l tib'il.

23Kyel laq'e'ye wi'je tu'n mi'n nb'inteye tq'ajq'ajel kyb'itze; nk'i'ye tu'n nb'inteye tq'ajq'ajel twi kychinb'e arpa.

24Atzun waje, tu'n kyb'inchanteye tz'aqlxix tkyaqil q'ij ik tza'n jun nima minti' nna'j tzqij, ex kukx tu'n kyb'ete tuj tumelxix ik tza'n jun twi' a' kukx in pulwin.

25Aqeye aj Israel, ¿baqa weye tzaj kyq'o'ne chojb'il ex kyoyaje tb'anilxix tej kytene 40 ab'q'i tuj tzqij tx'otx'?

26Noq o'kx xi kyiqane tilb'ilal Sicut aju ok kyq'o'ne ik tza'n jun kyreye, ex ju tilb'ilal che'w Quiún, aqeju tilb'ilal kydiose lu, kyu'nxe e b'ant.

27Kyja'tzun, che xel wi'ne pres max ti'jxi Damasco, chi Qman aju Dios Tajaw Tkyaqil; atzun tb'iju.