2 Crónicas 1 - Mam Huehuetenango New Ortography

Xi tqanin Salomón te Dios tu'n ttzaj q'o'n tnab'l 1 Reyes 3.3-15

1O kyuwsanjtz Salomón aju tky'ajal David tuj tkawb'il, porke ate Qman aju Tdios o ten tuk'il, kyja'tzun o ch'iyxix toklen.

2E tzajtzun ttxko'n Salomón kykyaqil aj Israel: Qe nejenel kye soldad, aqeju at jun milchaq soldad tuj kykwent ex qeju at jun syentchaq soldad tuj kykwent, qe jwes, ex kykyaqil qe nejenel te junjun k'loj aj Israel at kyxilen kyxolx.

3Kykyaqil xjal otoq che chmet tuk'il Salomón e je'x tuj lugar te k'ulb'il tuj Gabaón, ex atzun ta'toq ja xb'alun te mojb'ab'l tib'il tuk'il Dios, aju otoq b'ant tu'n tmajen Dios Moisés tuj lugar tzqij tx'otx'.

4Ex otoq tzaj ti'n David ju kax k'ub'l tley Dios tuj tnam Quiriat-jearim, ex ul ti'n tuj Jerusalén tuj lugar jatum otoq b'ant tten tu'n, tu'nju otoq jaw tb'incha'n jun ja xb'alun tu'n tokx ten kax tuj.

5Aju altar q'an k'uxb'il, aju otoq b'aj tb'incha'n Bezaleel aju tky'ajal Uri ex tal tchman Hur, ax ikx axtoq ta' tuj Gabaón, tkub' twitz ja xb'alun te Qman. Tujtzun lugar lu xi' Salomón ex kykyaqil xjal k'ulul te Qman.

6Jaxtzun Salomón jatum ta' altar q'an k'uxb'il, aju tkub' twitz Qman twitz ja xb'alun te mojb'ab'l tib'il tuk'il Dios; tib'ajtzun altar lu kub' tpatun Salomón jun mil alumaj te jun oyaj te Qman.

7Tujx ju qonik'an lu, kub' tyek'un tib' Dios twitz Salomón ex tma: Qanintza weye alkye tajb'ila ex jaku txi nq'o'ne.

8Atzunte Salomón xi ttzaq'we'n te Dios kyja': Nimxix o tk'ujlaya David aju qtzan nmane, ex a qine ma chin ok tq'o'na kawil te t-xel.

9Atzun ja'lo Nman Dios, japunx tu'na aju tzaj tma'na te David aju qtzan nmane, tu'nju ma chin ok tq'o'na te rey kyib'aj tnam xjal nimxix kyajlal ex mlay b'ant kyajlanjtz.

10Kyja'tzun q'ontza nnab'le ex wojtzqib'le tu'ntzun kyxi nẍaqlune qe tnam xjal lu; ex ¿alkye jun jaku b'ant tkawin kyib'aj qe xjal etzan tu'na nim kyajlal? Chi Salomón.

11Tzajtzun tzaq'we'n Salomón tu'n Dios kyja': Tu'nju ma tzaj tqanina jlu weye, ex minti' ma tzaj tqanina tu'n tten tq'inumab'la, mi tu'n tjaw nimsa'na, mi tu'n kykyim qe aj q'oj ti'ja, ex mi tu'n t-xi laq'e' tuj tanq'ib'la, noq o'kx ma tzaj tqanina tnab'la ex tojtzqib'la tu'n tb'ant tkawina kyib'aj qe xjal etzan wu'ne, ex wu'ne ma tz'ok nq'o'na te rey tu'n tkawina kyib'aj,

12kyja'tzun kxel nq'o'ne tnab'la ex tojtzqib'la, ax ikx kxel nq'o'ne tq'inumab'la, ex kjawil nimsa'na; ktel mas tnab'la ex tq'inumab'la kywitz qe rey aqeju e ten nej na'nxtoq tok teya te rey, ex kywitz qeju che okel te rey te tib'ajxiya.

13Te tib'ajxi ajtztzun Salomón tuj lugar te k'ulb'il tuj Gabaón, aju tkub' twitz ja xb'alun te mojb'ab'l tib'il tuk'il Dios, pon tuj Jerusalén ex o kawin kyib'aj aj Israel.

Ok ten Salomón xk'a'mil kyi'j carwaj ex chej cabay 1 Reyes 10.26-29; 2 Crónicas 9.25-28

14B'ajtzun tchmo'n Salomón qe carwaj ex qe chej cabay. Attoq jun mil tuk'il kyaje syent tcarwaj ex kab'laj mil tchej cabay. Aqe jlu e okx tq'o'n Salomón kyuj qe tnam jatum ate' qe cuartel kye carwaj te q'ojb'il, ex at carwaj ex cabay ax e okx tq'o'n tuj lugar niqayin ttxlaj tuj Jerusalén.

15O chmet nimxix saq pwaq ex q'an pwaq tuk'il rey Salomón tuj Jerusalén, mer ik tza'n ab'j; ex nim tze' wi'ten o chmet, mer ik tza'n tqan higo in tzaj ch'iy tuj k'ul tuj chq'ajlaj t-xe witz.

16Qe chej cabay te Salomón atzun in che tzaj q'i'n tuj Egipto ex tuj Cilicia, porke qe comersyant te Salomón in tzaj kylaq'o'n ma chixin.

17Ok in tzaj kylaq'o'n jun carwaj tuj Egipto, qaq syent saq pwaq twi', ex atzun twi' jun chej, jun syent tuk'il 50. Ex kykyaqil qe rey kye aj Heteo ex kye aj Siria in xi kylaq'o'n qe jlu kyuk'il qe tmajen Salomón.