Números 26 - Mam Huehuetenango New Ortography

Jaw juntl ak'aj kyajlal aj Israel

1Tik'lenxi tx'u'j yab'il lu, tzaj yolin Qman tuk'il Moisés ex tuk'il Eleazar aju tky'ajal pal Aarón ex tma:

2Kyi'n jawe kyajlal kykyaqil aj Israel ik tza'nx kyajlal junjun k'loj; ktzajelx qe' kyu'ne kyi'j qeju ma japun winqin ab'q'i kyu'n ex ma b'ant tu'n kyxi' tuj q'oj.

3Tujtzun tchq'ajlajil tx'otx' Moab aju tkub' ttzi nima Jordán, tumlal twitz Jericó, xi tma'n Moisés ex ju pal Eleazar kye aj Israel

4tu'n tjaw kyi'n kyajlal qe xinaq otoq japun winqin ab'q'i kyu'n, ik tza'nx otoq tzaj tma'n Qman te Moisés.

Atzun qe aj Israel e je'tz tuj Egipto jlu:

5Qe k'loj tiyjil Rubén aju nej tky'ajal Israel, atzun qe jlu: qe tiyjil Enoc, qe tiyjil Falú,

6qe tiyjil Hezrón ex qe tiyjil Carmi;

7tza'nx tajlal jaw, japun 43,730 xinaq tiyjil Rubén.

8Aju tky'ajal Falú, atzun Eliab,

9ex qe tky'ajal Eliab atzun qe jlu: Nemuel, Datán ex Abiram. Ate Datán tuk'ix Abiram aqeju attoq kyoklen kyxol qe xjal q'ol nab'l, jaw kyi'n kyib' ti'j Qman ex ti'j Moisés ex Aarón junx tuk'il Coré;

10ex el k'ab'chaj tx'otx' ex e je'x tz'aq kykab'il tuj, tuk'ix Coré xi tz'aq tej kyb'aj kyim qeju mojl kyyol kyuk'il, ex tej kyb'aj kyim 250 xinaq tu'n q'aq'. Ajb'en jlu te jun yek'b'il kye txqantl.

11Maske ikju ex minti' e kyim tk'wa'l Coré.

12Qe k'loj tiyjil Simeón, atzun qe jlu: Qe tiyjil Nemuel, qe tiyjil Jamín, qe tiyjil Jaquín,

13qe tiyjil Zera ex qe tiyjil Saúl.

14Tza'nx tajlal jaw, japun 22,200 xinaq tiyjil Simeón.

15Qe k'loj tiyjil Gad, atzun qe jlu: Qe tiyjil Zefón, qe tiyjil Hagui, qe tiyjil Suni,

16qe tiyjil Ozni, qe tiyjil Eri,

17qe tiyjil Arod ex qe tiyjil Areli.

18Tza'nx tajlal jaw, japun 40,500 xinaq tiyjil Gad.

19Qe tky'ajal Judá e kyim tuj tx'otx' Canaán, atzun qe jlu, Er tuk'ix Onán.

20Qe k'loj tiyjil Judá, atzun qe jlu: Qe tiyjil Sela, qe tiyjil Fares ex qe tiyjil Zera.

21Qe k'loj tiyjil Fares, atzun qe jlu: Qe tiyjil Hezrón ex qe tiyjil Hamul.

22Tza'nx tajlal jaw, japun 76,500 xinaq tiyjil Judá.

23Qe k'loj tiyjil Isacar, atzun qe jlu: Qe tiyjil Tola, qe tiyjil Púa

24qe tiyjil Jasub ex qe tiyjil Simrón.

25Tza'nx tajlal jaw, japun 64,300 xinaq tiyjil Isacar.

26Qe k'loj tiyjil Zabulón, atzun qe jlu: Qe tiyjil Sered, qe tiyjil Elón ex qe tiyjil Jahleel.

27Tza'nx tajlal jaw, japun 60,500 xinaq tiyjil Zabulón.

28Qe k'loj tiyjil José, atzun qe jlu: Manasés ex Efraín.

29Ti'j Manasés, jun k'loj tiyjil Maquir; ti'j Maquir, jun k'loj tiyjil Galaad.

30Qe k'loj kyiyjil Galaad, atzun qe tiyjil Jezer, qe tiyjil Helec,

31Qe tiyjil Asriel, qe tiyjil Siquem,

32qe tiyjil Semida ex qe tiyjil Hefer.

33Ate Zelofehad aju tky'ajal Hefer minti' tky'ajal e tzaj, noq o'kx tme'jel, ex atzun kyb'i lu: Maala, Noa, Hogla, Milca ex Tirsa.

34Tza'nx tajlal jaw, japun 52,700 xinaq tiyjil Manasés.

35Qe k'loj tiyjil Efraín, atzun qe jlu: Qe tiyjil Sutela, qe tiyjil Bequer ex qe tiyjil Tahán.

36Ti'j Sutela at jun k'loj tiyjil Erán.

37Tza'nx tajlal jaw, japun 32,500 xinaq tiyjil Efraín. Atzun qe tiyjil José jlu, tuj k'lojin kyten ik tza'nx kyiyjil.

38Qe k'loj tiyjil Benjamín, atzun qe jlu: Qe tiyjil Bela, qe tiyjil Asbel, qe tiyjil Ahiram,

39qe tiyjil Sufam, ex qe tiyjil Hufam.

40Qe k'loj tiyjil Bela, atzun qe jlu: Qe tiyjil Ard, ex qe tiyjil Naamán.

41Tza'nx tajlal jaw, japun 45,600 xinaq tiyjil Benjamín.

42Ti'j Dan jun k'loj tiyjil Súham.

43Tza'nx tajlal jaw, japun 64,400 xinaq tiyjil Dan.

44Qe k'loj tiyjil Aser, atzun qe jlu: Qe tiyjil Imna, qe tiyjil Isúi ex qe tiyjil Bería.

45Qe k'loj tiyjil Bería, atzun qe jlu: Qe tiyjil Heber ex qe tiyjil Malquiel.

46Ex attoq jun tme'jel Aser, Sera tb'i.

47Tza'nx tajlal jaw, japun 53,400 xinaq tiyjil Aser.

48Qe k'loj tiyjil Neftalí, atzun qe jlu: Qe tiyjil Jahzeel, qe tiyjil Guni,

49qe tiyjil Jezer ex qe tiyjil Silem.

50Tza'nx tajlal jaw, japun 45,400 xinaq tiyjil Neftalí.

51Aju kyajlal aj Israel jaw, japun 601,730 xinaq tu'n tkyaqilx.

Tza'n tten tu'n tkub' sipet kytx'otx'

52Tzaj yolin Qman tuk'il Moisés ex tma:

53Kyxoltzun qe xinaq lu, kb'el sipet tx'otx' ik tza'nx kyajlal ma jaw.

54Te kye qe k'loj mas nim kyb'aj, kxel q'ot jun piẍ kytx'otx' mas matij, atzun kye qe k'loj nik'xi kyb'aj, kxel q'ot jun piẍ kytx'otx' mas nik'xi ch'in. Teyle junjun k'loj kxel q'ot jun piẍ kytx'otx' ik tza'n kyajlal ma jaw.

55Tuj swert kb'ajel sipet tx'otx'. Teyle junjun k'loj kyiyjil tz'ib'an tuj list kxel tetzb'il.

56Kb'ajel sipet kyetzb'il ok tjaw swert kyxol qeju k'loj nim kyb'aj ax ikx qeju mya nim kyb'aj, chi Qman.

Jaw kyajlal aj Leví

57Qe k'loj tiyjil Leví e ok te tajlal tej tjaw kyajlal, atzun qe jlu: Qe tiyjil Gersón, qe tiyjil Coat ex qe tiyjil Merari.

58At txqantl k'loj tiyjil Leví, atzun qe jlu: Qe tiyjil Libni, qe tiyjil Hebrón, qe tiyjil Mahli, qe tiyjil Musi ex qe tiyjil Coré.

Ate Coat tman Amram.

59Jaw moje' Amram tuk'il Jocabed aju tme'jel Leví, ex atzun itz'j Jocabed tej tten Leví tuj Egipto. Ate Amram kyman Aarón, Moisés ex María, ex Jocabed tb'i kytxu'.

60Qe tky'ajal Aarón, atzun qe jlu: Nadab, Abiú, Eleazar ex Itamar.

61Ex otoq kyim Nadab ex Abiú tu'nju kub' kyq'o'n jun q'aq' twitz Qman, aju minti' otoq txi q'ma'n kye tu'n tkub' kyq'o'n.

62Aju kyajlal qe xinaq tiyjil Leví tzaj qe' kyi'j qeju matoq jun xjaw kyul-len itz'j, japun 23,000 tu'n tkyaqilx. Aqe jlu minti' otoq che ok te tajlal kyuk'il txqantl aj Israel, porke minti' jun kyetzb'il tu'n t-xi q'o'n.

63Atzun jun tajlal lu jaw kyi'j aj Israel tu'n Moisés ex tu'n pal Eleazar tuj tchq'ajlajil tx'otx' Moab, tkub' ttzi nima Jordán tumlal twitz tnam Jericó.

64Kyxol kykyaqil jlu mi jun itz'xtoq kyxol qeju ku'x tz'ib'an kyb'i tej tjaw tnejel maj kyajlal kyu'n Moisés ex Aarón tuj tzqij tx'otx' t-xe witz Sinaí,

65tu'nju otoq tma Qman tu'n kykyim tuj tzqij tx'otx'. Kyja'tzun misikyer jun kye kyaj anq'in, noq o'kx te Caleb aju tky'ajal Jefone, tuk'ix Josué aju tky'ajal Nun.