Jeremías 29 - Mam Huehuetenango New Ortography

Aju u'j xi t-sama'n Jeremías kye xjal otoq che'x q'i'n tuj Babilonia

1Atzun qe yol lu xi t-sama'n Jeremías aju t-sanjel Dios tuj u'j, tu'n tpon max tuj Babilonia kyuk'il qe kytijil xjal aqeju itz'xtoq qe, kyuk'il qe pal, kyuk'il qe t-sanjel Dios ex kyuk'il txqantl xjal aj Jerusalén, aqeju otoq che'x q'i'n tu'n rey Nabucodonosor,

2texlenxi q'i'n rey Jeconías tuj ttanmi, tuk'ix ttxu' ex qeju at kyoklen ttxlaj rey, kyuk'ix qe nejenel tuj Judá ex tuj Jerusalén, kyuk'ix qeju b'a'n che b'inchan tkyaqil ti'xti tb'anilxix, ex kyuk'ix qe tx'inol k'uxb'il.

3Aju u'j lu, a Elasa xi q'inte te, aju tky'ajal Safán, tuk'ix Gemarías aju tky'ajal Hilcías. Aqe jlu, tu'n Sedequías aju rey te Judá e je'x sama'n tu'n kypon tuj Babilonia tuk'il rey Nabucodonosor. Ex chi tyol u'j kyja':

4Ate Qman aju Tajaw Tkyaqil ex Kydios aj Israel in tma'n kye kykyaqil aj Jerusalén o che pon q'i'n tuj Babilonia, chi kyja':

5Kyb'inchan jaw kyjaye ex che anq'ine kyuj, kyawan ku'xe kyawale ex che nik'b'ene ti'j kywitz.

6Che moje'ye ex e ttzaj kyky'ajale ex kyme'jele, ikx kye kyk'wa'le e kyjaw moje' ex e ttzaj kyk'wa'l, chmet-x kyb'aje ma chixin ex mya noq tu'n tkub' naj kyajlale.

7Tz'ok tilil kyu'ne tu'n kyten xjal tuj txub'txaj tuj tnam jatum o che pon nsama'ne ex che kub'sane nwitze ti'j tnam lu, ex qa ma che ten xjal tuj txub'txaj tuj tnam lu, ax ikx kyeye che tele tuj txub'txaj.

8Aqine Dios Tajaw Tkyaqil ex Kydios aj Israel kxel nma'ne jlu kyeye: Mi'n txi kyq'o'ne amb'il tu'n kykub' sb'u'ne kyu'n qeju nno'k kyq'on kyib' te nsanjele, mi kyu'n qe chman najl kyxole ex mi'n txi kyb'i'ne kywitzik' nno'k yek'un tuj kywitz.

9Aju in kyma'n kyeye qa wu'ne o txi nma'ne kye, puro nik'aj yol jlu. Aqine Dios in chin q'mante jlu.

10Chi Qman kyja': Okxi tjapun b'aj 70 ab'q'i kyu'ne tuj Babilonia, ok nb'incha'ye b'a'n kyeye ex kjapunel nyole tu'n kyajtz meltz'aje juntl maj wu'ne tuj lugar lu.

11Porke b'a'n wu'ne alkye nximb'etze kyi'je; ximan wu'ne tu'n nb'inchanteye b'a'n kyi'je ex mya tu'n nb'inchanteye mya b'a'n. In xi nma'ne jlu tu'ntzun tqe' kyk'u'je ti'j oyb'il, ex mas b'a'n che tele te yajxitl. Aqine Dios in chin q'mante jlu.

12Che kub'saltzune nwitze ex che tzajel yoline wuk'ile tuj na'j Dios, atzun weye che tzajel nb'i'ne.

13Che jyole wi'je ex chin knetele kyu'ne, ok che jyole wi'je tu'n tkyaqil kyanmiye.

14Axix tok chin knetele kyu'ne; che ajetz wi'ne jatum ate'ye ja'lo, che eletz wi'ne kyuj kykyaqil nasyon ex kyuj kykyaqil lugar jatum o che b'aj nsputune; che okel nchmo'ne ex che ajetz wi'ne tu'n kyule juntl maj tuj lugar lu jatum e ex nlajo'ne. Aqine Dios in chin q'mante jlu.

15Kyeye in kyma'ne kyja': O che ul t-sama'n Qman qe t-sanjel quk'il tzalu tuj Babilonia, che chiye.

16Atzunte Qman in tma'n ti'j rey aju q'uql tuj tq'uqb'il David, ex kyi'j qe xjal najlqe'x tuj tnam Jerusalén ex kyi'j qe kyermaniye, aqeju minti' e je'x q'i'n kyuk'ile:

17Kxel nsama'ne q'oj, we'yaj ex tx'u'j yab'il kyib'aj. Che okel wu'ne ik tza'n qe twitz higo q'aynaj qe, ex tu'nju jumajx mya b'a'n qe, mlay b'ant tu'n kyxi' lo'n. Aqine Dios Tajaw tkyaqil in chin q'mante jlu.

18Chin xel lpe'ye q'ojlel kyi'j ex ktzajel nsama'ne we'yaj ex tx'u'j yab'il kyib'aj. Wu'ne che jawil sek'paj kykyaqil nasyon kyi'j, ktzajel qanin mya b'a'n kyib'aj, che jawil lab'in xjal kyi'j ex che okel nq'o'ne te kytzeb'l ex te kyxmayb'il kykyaqil nasyon jatum che b'ajel nsputune,

19tu'nju minti' xi kyb'i'n nyole, aju xi q'ma'n kye kyu'n nsanjele ela'xi maj che'x nsama'ne. Ax ikx kyeye, minti'x xi kyb'i'ne. Aqine Dios in chin q'mante jlu.

20Atzun kyeye, aqeye o che ex q'i'n tuj Jerusalén ex o che pon nsama'ne tuj Babilonia, kyb'inxe nyole.

21Atzun jlu in tma'n Qman aju Tajaw Tkyaqil ex Kydios aj Israel ti'j Acab aju tky'ajal Colaías, ex ti'j Sedequías aju tky'ajal Maasías, aqeju in che q'mante nik'aj yol kyeye ex in kyma'n qa wu'ne in xi nma'ne yol kye: Che xel nq'o'ne tuj tq'ab' Nabucodonosor aju rey te Babilonia, ex kywitzxtzune che b'el b'yo'n.

22Kyja'tzun qe aj Judá, aqeju otoq che pon q'i'n tuj Babilonia, qa kyaj tzaj kyqanin jun mya b'a'n kyib'aj kyuk'il, kxel kyma'n kyja': B'a'nwt tb'incha Qman ti'ja ik tza'n o tb'incha ti'j Sedequías ex ti'j Acab tej kykub' b'aj tz'e'y tuj q'aq' tu'n rey te Babilonia.

23Atzunju kb'ajel kyi'j, tu'nju kyb'incha mya b'a'n kyxol aj Israel: Kyb'incha aj pajil kyuk'il kyxu'jil kyuk'il, in che nik'an yol, in kyma'n qa wu'ne xi nma'ne qe yol kye, aju in kyma'n kyeye ex minti' xi nma'ne kye. B'a'n jlu wu'ne ex o wile. Aqine Dios in chin q'mante jlu.

Aju tqanil tu'n tpon tuk'il Semaías

24Xi tma'n Qman te Jeremías tu'n t-xi tma'n te Semaías aju aj Nehelam kyja':

25Ate Qman aju Tajaw Tkyaqil ex Kydios aj Israel chi kyja': Aya xi samante jun u'j kye kykyaqil tnam xjal ate' tuj Jerusalén ex te pal Sofonías aju tky'ajal Maasías, ex kye qe txqantl pal, ex chi u'j kyja':

26Ate Qman ma tz'ok q'onte toklena te pal te t-xel Joiada, tu'ntzun tkyaj ten tja Dios tuj tkwenta. Qa at jun lok ma tz'ok ten yolil ik tza'n jun t-sanjel Dios, q'o'nkxa qe tqan tuj toy' tze' ex k'alo'nka tu'n caden.

27¿Tiqu'ntzun na'nx tmayet Jeremías tu'na, aju aj Anatot, aju in yolin kywitze ik tza'n jun t-sanjel Dios?

28Porke ma tzul t-sama'n jun u'j quk'ile tzalu tuj Babilonia chi kyja': Nim ab'q'i che tele ma chixin, kyja'tzun kyb'inchan jaw kyjaye ex che tene kyuj ex kyawan ku'xe kyawale ex che nik'b'ene kyi'j kywitz, chi Jeremías qeye tuj u'j, chi Semaías.

29Atzunte pal Sofonías jaw t-sch'in ju u'j lu twitz Jeremías.

30Tzajtzun yolin Qman tuk'il Jeremías kyja':

31Samanxa jun u'j kye kykyaqil qeju o che'x q'i'n tuj Babilonia, tu'n kyb'inte qa aqine Dios in chin q'mante jlu: Ate Semaías aju aj Nehelam ma yolin kyuk'ile qa wu'ne otoq txi nsama'ne, ex noq tten tu'n, ex ma kub' ti'j kynab'le tu'n tu'n tok qe' kyk'u'je ti'j nik'aj yol ma tma.

32Kyja'tzun aqine Dios kxel nma'ne jlu: Kb'el tcastiw Semaías wu'ne, kyuk'ix qe tiyjil. Mlay che ten qe tiyjil kyxol qe xjal etzan wu'ne ex mi tu'n ky-achin ti'j tzalajb'il kxel nq'o'ne kye xjal etzan wu'ne, porke kyu'n qe tyol ma jaw kyi'n kyib' qe xjal etzan wu'ne tu'n kyq'ojin wi'je. Aqine Dios in chin q'mante jlu.