Deuteronomio 29 - Mam Huehuetenango New Ortography

Ju yol kyaj b'ant ti'j tu'n Qman kyuk'il aj Israel tuj Moab

1Atzun yol lu kyaj b'ant ti'j tu'n Qman kyuk'il aj Israel, aju tzaj tma'n te Moisés tuj tx'otx' Moab, ex part aju otoq kyaj b'ant ti'j tu'n kyuk'il twi witz Horeb.

2Oktzun tchmo'n Moisés kykyaqil aj Israel ex xi tma'n kye kyja':

O kyile tkyaqilju o tb'incha Qman tuj tx'otx' Egipto ti'j Faraón, ex kyi'j qe xjal at kyoklen ttxlaj ex ti'j tkyaqil ttanmi,

3ex aqeye testiw kyi'j qe nmaq k'ixb'isab'l, qe techal ex qe b'inchb'en nim kyipumal e b'ant.

4Ex asta ja'lo, na'nx ttzaj tq'o'n Qman kynab'le, na'nx ttzaj tq'o'n amb'il tu'n tel kynik'e ti'j, mi tu'n tex tuj kywi'ye ti t-xilen tkyaqil jlu.

5Tuj 40 ab'q'i aqine ma chin ẍaqlunte kyeye tuj tzqij tx'otx'. Tuj tyemp lu minti' o b'aj kyxb'alune ex mi kyxajb'iye,

6minti' o che wa'ne pan in b'ant ti'j triw, minti' o che k'ane ta'l twitz uva, ex minti' o che k'ane q'e'n tu'ntzun tel kynik'e ti'j Qman Dios.

7Tej qul tuj lugar lu, etz tzoqpaj Sehón qi'j, aju rey te tnam Hesbón, tuk'ix Og aju rey te tx'otx' Basán, ex kub' kyi'j qu'n;

8tzyettzun kytx'otx' qu'n, ex o txi qq'o'n te kyetzb'il qe tiyjil Rubén, qe tiyjil Gad, tuk'ix mij tiyjil Manasés.

9Tu'ntzun jlu, kynimanxe ex japunx kyu'ne aju yol ma kyaj b'ant ti'j kyuk'ile, tu'ntzun tel b'a'n kyeye tuj tkyaqilju kb'antel kyu'ne.

10Ja'lo, lu qeye kyb'uyin kyib'e kykyaqile twitz Qman Dios: Qe nejenel kye junjun k'loj kyiyjile, qe tij xjal, qe xjal at kyoklen, ex kykyaqil qe xinaq aj Israel,

11kyuk'ix qe k'wa'l, qe xu'j ex qe stranjer xjal aqeju ax najl kyxole, tza'nx qe xjal tx'emil kysi'ye ax ikx qe xjal iqal kya'ye;

12tu'ntzun tokx kyq'on kyib'e axix tok tjaq' yol kyjel b'ant ti'j tu'n Qman Dios kyuk'ile ja'lo.

13Aju yol kyjel b'ant ti'j kyuk'ile ja'lo atzun jlu: Aqeye che okel te jun k'loj xjal etzan tu'n, atzun te k'okel te Kydiose, ik tza'nx o tma kyeye ex ik tza'nx tzaj ttziyan kye kyxe'chele Abraham, Isaac ex Jacob.

14Ex mya o'kx kyuk'ile kyjel b'ant ti'j yol ma tzaj ttziyan Qman,

15aqeye kykub'sa'ne twitz; ax ikx kyuk'il qeju che ul itz'j te tib'ajxi.

16B'a'n kyu'ne tza'n tten o qo anq'in tuj Egipto, ex tza'n tten o qo ik' kyuj qe nasyon e knet qu'n tuj qb'e.

17Atzun o kyile qe kydios xjal mya ax tok dios qe, ex qe tilb'ilal ik'b'ilxix b'inchamaj ti'j tze', ti'j ab'j, ti'j saq pwaq ex ti'j q'an pwaq, aqeju in che k'ulun xjal lu kywitz.

18Ten kykwente kyi'je, minti'wt jun xinaq ex mi jun xu'j, minti'wt jun ja xjal ex mi jun k'loj kyiyjil aj Israel, kyaj kolinte Qman Dios tu'n tok ten k'ulul kywitz kydios qe nasyon lu. Miwt tz'ok jun kyeye ik tza'n jun k'ul k'a ex venen tlok'.

19Tb'ajlenxi kyb'i'ne qe yol lu kyi'j mya b'a'n ktzajel kyi'je, qa at jun kyeye ok tna'nte puro b'a'n ta' ex ma kub' t-ximan kyja': Tkyaqil k'elel b'a'n weye maske nb'inchaye noq alkyex wajb'ile, qa chi; tu'n tlaj xjal lu, ok che najel kykyaqil xjal.

20Mlay kub' tnajsa'n Qman til xjal lu, mlay kub' tuj twitz aju il otoq tb'incha, noq o'kx ktzajel tq'oj ti'j; ktzajel ti'j xjal lu tkyaqilju mya b'a'n tz'ib'amaj tuj u'j lu, ex b'i'x che najel qe tiyjil twitz tx'otx' tu'n Qman.

21K'elel tpa'n Qman aju xjal lu kyi'j kykyaqil k'loj kyiyjil aj Israel, tu'n ttzaj mya b'a'n ti'j ik tza'nx tkyaqil mya b'a'n ma kyaj b'ant ti'j, aju tz'ib'an tuj u'j te ley lu.

22Qe kyiyjile che ul itz'j tuj q'ijlalil tzul, ax ikx qe stranjer xjal che tzajel kyuj tx'otx' najchaq, ok kyila' qe k'ixb'isab'l ex qe yab'il che tzajel t-sama'n Qman tib'aj tx'otx' lu.

23Tuj tkyaqil tx'otx' lu ok kyila' puro azufre ex atz'an ex otoq b'aj tz'e'y tx'otx', mlay b'ant tu'n tok awal tuj, ex minti' jun ti'xti ktzajel tpoq'sa'n; milpe jun wi' k'ul kch'iyil tuj. Ik k'okel ik tza'n o tenb'a tej kynaj qe tnam Sodoma, Gomorra, Adma ex Seboím, aqeju e b'aj tz'e'y tu'n tq'oj Qman ex tu'n ttx'u'jil.

24Kykyaqiltzun xjal kyuj txqantl nasyon che qanil ti'j kyja': ¿Tiqu'n o tb'incha Dios jlu ti'j tx'otx' lu? ¿Tiqu'n o tzaj nimxix ttx'u'jil?

25Ktzajeltzun tzaq'we'n kye kyja': Tu'nju o kyaj kykolin aju yol kyaj b'ant ti'j tu'n Dios kyuk'il, aju Kydios kyxe'chel, aju b'ant ti'j tu'n kyuk'il tej kyetz q'i'n tu'n tuj Egipto,

26ex tu'nju e k'ulun ex e kub' ẍmeje' kywitz txqantl dios, aqeju minti' ojtzqi'n kyu'n ex minti' o tzaj q'o'n jun ti'xti kye kyu'n.

27Tu'ntzun jlu tzaj tq'oj Dios ti'j tx'otx' lu ex tzaj tq'o'n tkyaqil mya b'a'n tib'aj, aju tz'ib'an tuj u'j lu.

28Tuk'il tq'oj ex nimxix ttx'u'jil, e je'x tlajo'n qe xjal tuj kytx'otx' tu'n kyxi q'i'n tuj juntl tx'otx', ik tza'n in b'aj ja'lo, che chilo xjal kxel kytzaq'we'n.

29Tkyaqilju minti' ma tzaj tyek'un Dios qe, te Qman Dios qe; atzun qeju o che tzaj yek'un, qe qe jlu ex kye qe qk'wa'l te jumajx, tu'ntzun kyjapun qu'n kykyaqil qe mandamyent in tma'n tuj u'j te ley lu.