Levítico 23 - Mam Huehuetenango New Ortography

Qe ninq'ij tu'n kyk'ulun qe aj Israel twitz Dios

1Tzaj yolin Qman tuk'il Moisés ex tma:

2Q'manxa kye aj Israel kyja': Qe ninq'ij nim kyoklen te weye tu'n tkub' kyb'uyin kyib'e ex tu'n kyk'ulune nwitze, atzun qe jlu.

Aju q'ij te ojlab'l

3Qaq q'ij che aq'nale tuj seman, atzunju twuqin q'ij mi jun aq'untl kb'antel kyu'ne, ex q'ij xjan te b'uyj tib'il jlu. Atzun jun q'ij lu te ojlab'l kxel kyq'o'ne te nimb'il weye noq jaxja che tele.

4Ax ikx kb'el kyb'uyin kyib'e tuj q'ij b'anin ti'j ex kb'el kyik'sa'ne qe q'ij lu nimxix toklen te nimb'il weye:

Aju ninq'ij Xjan Q'ij

5Tuj kyajlaj tajlal tnejel xjaw te qale, atzun q'ij tu'n tkub' kyik'sa'ne Xjan Q'ij te nimb'il weye.

Aju ninq'ij ti'j pan minti' t-samel tuj tu'n tjaw mal tk'u'j

6Atzun tuj t-olajin q'ij tex xjaw lu, atzun q'ij tu'n tkub' kyik'sa'ne tq'ijlalil pan minti' t-samel tuj tu'n tjaw mal tk'u'j. Wuq q'ij che wa'le kyi'j pan lu te nimb'il weye.

7Ex tuj tnejel q'ij te ninq'ij lu, k'okel jun b'uyj tib'il xjan kyu'ne, ex minti' jun aq'untl kb'antel kyu'ne.

8Tuj enter wuq q'ij lu kb'el kypatune chojb'il te Qman, atzun tuj twuqin q'ij k'okel juntl b'uyj tib'il xjan kyu'ne ex mi jun aq'untl kb'antel kyu'ne.

Aju ninq'ij ti'j tnejel twitz awal Números 28.26-31

9Tzaj yolin Qman tuk'il Moisés ex tma:

10Q'manxa kye aj Israel kyja': Ok kypone tuj tx'otx' kxel nq'o'ne kyeye, ok tjaw triw kyu'ne, ktzajel kyi'ne aju tnejel che'l te pal.

11Te juntl q'ij tb'ajlenxi q'ij te ojlab'l, kxel tyukun pal tnejel twitz awal lu nwitze, tu'ntzun tk'met wu'ne kyeye.

12Ax q'ij ok ttzaj kyq'o'ne tnejel twitz awal weye, ktzajel kyi'ne jun tal tman ẍne'l minti' tpaltil ex te jun ab'q'i, tu'n tkub' patit te jun oyaj weye.

13Ax ikx ktzajel kyi'ne kyaje libr arin tb'anilxix smo'n tuk'il aseyt, tu'n ttzaj kyq'o'ne weye te jun oyaj patun in kub' at tk'ok'jal tb'anilxix. Ax ikx ktzajel kyi'ne jun litr ta'l twitz uva tu'n tkub' qet te jun oyaj weye.

14Ttzajlenxi kyq'o'ne oyaj lu weye, b'a'n tu'n kywa'ne ti'j twitz kyawale, qa triw tx'i'limaj ex qa cha'x, ex qa pan, ex nej otoq tzaj kyq'o'ne kyoyaje weye. Atzun jun ley lu kyjel ten kyuk'ile te jumajx ex wiqinwiq kyjel kyma'ne kye kyk'wa'le noq jaxja che tele.

Aju ninq'ij ok kyjapun b'aj wuq seman

15Tujx q'ij t-xilen kyq'o'ne kyoyaje otoq txi yuket nwitze, ex qa ewtoq tb'ajlen q'ij te ojlab'l, kxel kyajla'ne wuq seman cabal.

16Oktzun tjapun wuq seman tb'ajlen q'ij te ojlab'l, tuk'ix juntl q'ij, atzun ktz'aqetel 50 q'ij. Maxitzun ktzajel kyi'ne ak'aj kyoyaje twitz awal weye.

17Ex kyb'inchan b'aje kab'e pan ma kyjaye, te kyaje libr talil junjun ex at t-samel tuj tu'n tjaw mal tk'u'j, tu'n ttzaj yukut nwitze, ex a arin k'ajb'el kyu'ne te pan aju mas tb'anilxix, atzun jun kyoyaje ktzajel kyq'o'ne weye ti'j tnejel twitz kyawale.

18Junx kyuk'il qe pan ktzajel kyi'ne wuq tal tman ẍne'l minti' kypaltil, te jun ab'q'i qe, tuk'ix jun tal tor ex kab'e tman ẍne'l, tu'ntzun kykub' patit te oyaj weye at tk'ok'jal in chin tzalaje ti'j. Atzun kyoyaje jlu ktzajel kyi'ne te tmoj twitz awal ex ta'l twitz uva.

19Ax ikx ktzajel kyq'o'ne jun tman chip te chojb'il kyile ex kab'e tal tman ẍne'l te jun ab'q'i qe, te jun oyaj te mojb'ab'l tib'il.

20Che xel tyukun pal qe kab'e tal tman ẍne'l lu nwitze junx tuk'il pan ti'j tnejel twitz awal, ex che xjansetel qe oyaj lu te weye, tu'ntzun tajb'en te pal.

21Ax q'ij lu kb'el kyb'uyin kyib'e tuj jun b'uyj tib'il xjan ex mi jun aq'untl kb'antel kyu'ne. Atzun jun ley lu kyjel ten kyuk'ile te jumajx, ex wiqinwiq kyjel kyma'ne kye kyk'wa'le noq jatum che tele.

22Ok tjaw kychmo'ne twitz kyawale, il ti'j kyjel kyq'o'ne ch'in ttxa'nile kojb'il ex mi'n che aje sakwilte aju otoq kyaj tz'aq. Kyq'onkje jlu kye meb'a ex kye b'etin xjal. Aqine Kymane ex Kydiose.

Aju ninq'ij tu'n kyok q'ajtzet chun

23Tzaj yolin Qman tuk'il Moisés ex tma:

24Q'manxa kye aj Israel qe yol lu: Tuj tnejel q'ij te twuqin xjaw k'okel jun ninq'ij te ojlab'l kyu'ne, tuk'ix jun b'uyj tib'il xjan, tu'n ttzaj kyna'ne t-xtalb'il Dios tuk'il tq'ajq'ajel twi chun.

25Kb'el kypatune jun oyaj te weye ex mi jun aq'untl kb'antel kyu'ne.

Aju q'ij tu'n tnajset kyil xjal Números 29.7-11

26Ax ikx tzaj yolin Qman tuk'il Moisés ex tma:

27Tuj tlajin q'ij tex ju twuqin xjaw, atzun q'ij tu'n tnajset kyile. Atzun q'ij lu tu'n tok kyb'uyin kyib'e tuj jun b'uyj tib'il xjan, ex tuj q'ij lu kb'el kyyo'ne we'yaj ex kb'el kypatune oyaj te nimb'il weye.

28Mi jun aq'untl kb'antel kyu'ne tuj q'ij lu, ex atzun q'ij tu'n tnajset kyile nwitze, aqine Kymane ex Kydiose.

29Qa at jun xjal minti' ma txi tniman tu'n tkub' tyo'n we'yaj tuj q'ij lu, b'i'x k'elex lajet tu'ntzun mi'n ttentl kyxol t-xjalil.

30Ex qa at jun xjal ma tz'aq'nan tuj q'ij lu, b'i'x knajel wu'ne tu'ntzun mi'n ttentl kyxol t-xjalil.

31Mi jun aq'untl kb'antel kyu'ne tuj q'ij lu. Atzun ley lu kyjel ten kyuk'ile te jumajx, ex wiqinwiq kyjel kyma'ne kye kyk'wa'le noq jatum che tele.

32Aju q'ij lu, q'ij te ojlab'l te kyeye ex tu'n tkub' kyyo'ne we'yaj, ktzyetel te qale tuj b'elaj tajlal xjaw ex kpol b'aj tuj juntl q'ij te qale.

Ninq'ij kyi'j tal ja t-xaq tze'yin kywi' Números 29.12-40

33Tzaj yolin Qman tuk'il Moisés ex tma:

34Q'manxa kye aj Israel kyja': Tuj t-olajin tajlal twuqin xjaw, ktzyetel ninq'ij kyi'j tal ja t-xaq tze'yin kywi', ex wuq q'ij kb'el kyik'sa'ne te nimb'il weye.

35Tuj tnejel q'ij ninq'ij k'okel jun b'uyj tib'il xjan ex mi jun aq'untl kb'antel kyu'ne tuj q'ij lu.

36Wuq q'ij ktzajel kyq'o'ne oyaj weye patun in che kub', atzun tuj twajxaqin q'ij k'okel juntl b'uyj tib'il xjan kyu'ne, ax ikx ktzajel kyq'o'ne oyaj weye patun in kub'. Atzun jun ninq'ij lu ma' toklen ex mi jun aq'untl kb'antel kyu'ne tuj q'ij lu.

37Atzun qe ninq'ij jlu ma'xix kyoklen te weye; kyujtzun qe ninq'ij lu k'okel b'uyj tib'il xjan te weye kyu'ne, ex kyujtzun qe q'ij lu ktzajel kyq'o'ne weye oyaj patun in che kub', qe oyaj te chojb'il kyile, qe oyaj ti'j twitz kyawale, qe oyaj te chojb'il weye, tuk'ix oyaj ti'j ta'l twitz uva; teylex te junjun kxel kyq'o'ne tuj q'ij b'anin ti'j.

38Atzun qe ninq'ij lu part qe, part qe ninq'ij te ojlab'l, ex atzun qe oyaj lu tu'n ttzaj kyq'o'ne weye, part qe, part ju oyaj tziyimaj kyu'ne ex qe oyaj ktzajel kyq'o'ne tu'n kyexe kygan.

39Tuj t-olajin tajlal twuqin xjaw, ok tjaw b'aj kychmo'ne twitz kyawale, k'okel wuq q'ij ninq'ij kyu'ne te weye. Aju tnejel q'ij jun q'ij te ojlab'l, ax ikx twajxaqin q'ij, ax juntl q'ij te ojlab'l.

40Tuj tnejel q'ij ktzajel kyi'ne tq'ab' tze' tb'anilxix tuk'ix twitz, kyuk'ix qe tq'ab' xa'j, kyuk'ix qe tq'ab' tze' puro pin kyxaq, kyuk'ix qe tq'ab' chjaj at ttzi a' ex wuq q'ij che tzalajele nwitze. Aqine Kymane ex Kydiose.

41Tkyaqil ab'q'i k'okel wuq q'ij ninq'ij kyu'ne nwitze tuj twuqin xjaw. Atzun jun ley lu kyjel ten kyuk'ile te jumajx ex wiqinwiq kyjel kyma'ne kye kyk'wa'le.

42Kyujtzun qe wuq q'ij te ninq'ij lu, kykyaqil aj Israel ax che itz'jel tuj tx'otx' jatum che najale che tel kyuj tal ja t-xaq tze'yin kywi',

43tu'ntzun tel kynik' kykyaqil kyiyjile ti'j, aqeju che ul itz'j te tib'ajxi, tej kyetz wi'ne kyxe'chel tuj Egipto noq kyuj tal ja t-xaq tze'yin kywi' e najan wu'ne. Aqine Kymane ex Kydiose.

44Atzun qe yol lu xi tma'n Moisés kye aj Israel kyi'j qe ninq'ij ma' kyoklen te Qman.