Proverbios 13 - Mam Huehuetenango New Ortography

Tnejel u'j tu'n Salomón jatum tz'ib'an qe tyol

1Aju k'wa'l at tnab'l, b'a'n nne'l tuj twitz tu'n tok mayo'n tu'n tman ti'j mya b'a'n; atzunju xjal jawni twitz, minti' in xi tniman aju mayb'il te.

2Qe xjal b'a'n in kyk'mo'n jun oyaj ti'j ju yol b'a'n in kyma'n, atzun qeju in che ok meltz'aj kyi'j kyuk'il, mas kyaj tu'n kyyajlan kyi'j xjal.

3Aju xjal tok tkwent ti'j tyol, nno'k tkwentin tib', atzunju xjal jawni yolin, tu'nx tib' in naj.

4Aju xjal ky'aj, nim tgan tu'n tten jun ti'xti te, ex minti' in knet tu'n, atzunju xjal aq'nal in knet nim tu'n.

5Aju xjal tz'aqlxix, ik'un nik'aj yol tu'n, atzunju xjal mya b'a'n, tu'nx in tzaj ti'n tch'ixwi ex ik'b'il te.

6Aju xjal minti' til, kwentin tu'nju in b'et tuj tumel, atzunju xjal aj il, tu'nx tb'inchb'en mya b'a'n in naj.

7At junjun xjal minti'x ch'in at kye ex nno'k kyq'on kyib' ik tza'n q'inun; ex at junjuntl tkyaqil at kye, ex nno'k kyq'on kyib' ik tza'n meb'a.

8Aju xjal q'inun in klet tu'n tq'inumab'l tu'n mi'n tkub' b'yo'n, atzunju xjal meb'a mlay che pon qe eleq' xob'tzal te.

9Qe xjal tz'aqlxix ik kyten ik tza'n jun spik'un in qoptz'aj, atzun qe xjal mya b'a'n, ik kyten ik tza'n jun kandil in ku'x yupj.

10Aju xjal in jaw tniman tib', noq q'oj in jyon ti'j, atzun qeju in xi kyb'i'n consej, at kynab'l.

11Aju q'inumab'l jurat naj in knet, noq ch'in in ten, atzunju cheb'a in knet, in ch'iy.

12Qa at jun ti'xti in qo ayon ti'j ex qa minti' ma tzul, tzul b'is tuj qanmi tu'n, ex qa ma qk'am aju at qgan ti'j, qo tzalajel.

13Aju xjal minti' in xi tniman aju xnaq'tzb'il, tzul tilil tu'n, atzunju xjal in xi tniman ju mandamyent, tzul q'o'n t-xel te.

14Aju xnaq'tzb'il tu'n xjal at tnab'l in tzaj tq'o'n qchwinqlal ex in qo klet tu'n, tu'n mi'n qtzyet tu'n kamik.

15Aju xjal b'a'n tnab'l in che tzalaj xjal ti'j, atzun qe xjal in che ok meltz'aj kyi'j kyuk'il, kyja' kyxi' tuj najen.

16Aju xjal at tnab'l in tb'incha'n jun ti'xti tu'n tojtzqib'l, atzunju xjal minti' tnab'l, tu'nx in tyek'un qa minti' b'a'n tu'n.

17Aju sanjel mya b'a'n in tzaj ti'n xitb'il kyib'aj xjal, atzunju sanjel in japunxix tu'n, in onin tu'n kyten xjal tuj txub'txaj.

18Meb'ayil ex ch'ixb'ajil tzul tib'aj ju xjal nne'l tik'un consej b'a'n, atzunju xjal in kub' tuj twitz ok tok mayo'n ti'j mya b'a'n, nimxix kjawil nimsa'n.

19Aju in pon tk'u'j xjal ti'j ex in knet tu'n, in tq'o'n tzalajb'il te. Qe xjal minti' kynab'l minti' nnik'x kyu'n tu'n tel kypa'n kyib' ti'j mya b'a'n.

20Qa ma tz'ok tjunin tib'a kyuk'il qe xjal at kynab'l, ktel tnab'la, qatzun ma tz'ok tjunin tib'a kyuk'il qe xjal minti' kynab'l, knajela.

21Qe xjal aj il in che yajlanjtz tu'n mya b'a'n; atzun qe xjal tz'aqlxix in kyk'mo'n ju b'a'n te chojb'il kye.

22Aju xjal b'a'n tmod in kyaj tq'o'n kyetzb'il qe tal tchman; atzun tq'inumab'l ju xjal aj il, k'u'n te kye qe xjal tz'aqlxix.

23Tuj kykojb'il qe xjal meb'a at nim twitz awal, ex jaku kub' naj jlu tu'nju minti' in kyb'incha'n xjal aju tz'aqlxix.

24Aju xjal minti' in xi tkawin tk'wa'l, nne'l tik'un; atzunju k'ujla'n tk'wa'l tu'n, in xi tkawin.

25Aju xjal tz'aqlxix in wa'n ex in noj tk'u'j, atzunju xjal b'inchal mya b'a'n in wa'n ex minti' in noj tk'u'j.