Zacarías 9 - Mam Huehuetenango New Ortography

Kb'el kycastiw qe nasyon kyvesin kyib' kyuk'il aj Israel

1Atzun tqanil lu o tma Qman ti'j tx'otx' Hadrac ex ti'j tnam Damasco, porke tok twitz Qman kyi'j kykyaqil xjal, ax ikx kyi'j kykyaqil k'loj kyiyjil aj Israel.

2Ax ikx ti'j tnam Hamat aju tvesin tib' tuk'il tnam Damasco, ax ikx ti'j tnam Tiro ex Sidón, maske at nimxix kynab'l.

3Jaw kyb'incha'n aj Tiro ja te kykolb'il kyib' ex b'aj kychmo'n nimxix q'an pwaq ex saq pwaq.

4Ex k'elel ti'n Qman tkyaqilju at kye, kb'elex t-xo'n kyq'inumab'l tuj mar ex k'okel tq'o'n tq'aq'al tkyaqil tnam.

5Oktzun tkyil qe xjal ate' tuj Ascalón, ktzajel nimxix kyxob'il. Ax ikx qeju ate' tuj tnam Gaza kb'ajel kyxqutz'in kyib' tu'n ta'w, ax ikx qeju ate' tuj tnam Ecrón che tzajel lu'lun tu'n tchi tu'nju otoq naj aju q'uql kyk'u'j ti'j. Kymel aju rey tuj tnam Gaza ex minti' xjal kyjel ten tuj tnam Ascalón.

6Tuj tnam Asdod che najal qe xjal t-smon tib' kyiyjil. Chi Qman in tma'n kyja': Kb'el nq'o'ne kycastiw aj Filisteo tu'n mi'n kukx tjaw kyniman kyib'.

7Mlay txi kychyo'ntl chib'j tuk'ix tchk'el, ikx aju chib'j mya q'o'n kye tu'n t-xi kychyo'n. Ex kyxol qe xjal lu at junjun che kyjel ten tu'n kyk'ulun weye ex che okel te nejenel kyxol aj Judá ex che k'metel aj Ecrón ik tza'n o b'ant kyi'j aj Jebuseo atxix ojtxi.

8Atzun weye chin b'el tene xq'uqil tu'n tklet aju tnam etzan wu'ne, tu'ntzun mi'n kyoktz qe aj q'oj kyxol aj Israel. Mlay che ajtz meltz'aj juntl maj qe xjal o che yajlante kye, porke aqine chin b'el tene xq'uqil kyi'j, chi Qman.

Aju rey tzul

9Chi Qman in tma'n kyja': Che tzalajxe nim aqeye aj Sión. Che sch'ine tuk'il tzalajb'il aqeye aj Jerusalén. Lu kyreye tzul kyuk'ile, in tb'incha'n aju tz'aqlxix ex tzul klolte kyeye; mans ex tzul tjax tib'aj jun bur, tal jun ttxu bur.

10Tu'n che b'ajel naj qe carwaj in che ajb'en tuj q'oj kyu'n aj Efraín, ax ikx qe chej in che ajb'en tuj q'oj kyu'n aj Jerusalén. Che b'ajel ttoqin qe xob'l plech in che ajb'en tuj q'oj. Che tel qe nasyon tuj txub'txaj tu'n kyreye. A kkawil tib'aj tkyaqil, ktzajelx qe' tkawb'il ttzi' jun mar ex kpol b'aj ttzi' juntl, ktzajelx qe' ttzi nima Éufrates, kpol b'aj ttxa'npun tx'otx'.

Che k'metel aj Israel juntl maj

11Chi Qman in tma'n kyja': Tu'nju o txi ntziyane jun nyole kyeye ex o kyaj b'ant ti'j tu'n kychk'el alumaj, che kolpetele wu'ne ex che eletz ntzoqpi'ne qe pres kyku'x tuj jul minti' a' tuj.

12Aqeye o che'x q'i'n pres tuj juntl part, ex lu qeye in che ayon, ja'lo kyaj meltz'aje tuj kykolb'il kyib'e. Ex in xi nma'ne kyeye, mas nim nky'iwb'ile kxel nq'o'ne kyib'aje tu'nju o tzik'x kyu'ne.

13Ik che okel aj Judá wu'ne ik tza'n qe xob'l plech in che ajb'en kyu'n soldad tuj q'oj, ex ik che okel aj Efraín ik tza'n qe plech. Ik che okel aj Sión ik tza'n spad, ex kxel nq'o'ne kyipumal tu'n kyxi' q'ojlel kyuk'il aj Grecia, chi Qman.

14Kb'el tyek'un tib' Qman kyib'aj qe xjal etzan tu'n ex che tzajel t-xo'n qe tplech ik tza'n tqan q'ankyoq. Ate Qman Dios k'okel q'ajtzante chun ex tzul tuj jun kyq'iq' nne'tz tuj tnayaj q'ij.

15Ate Qman aju Tajaw Tkyaqil k'okel tkwentin qe xjal etzan tu'n, ex che najel qe aj q'oj kyi'j kyu'n. Kb'ajel kywab'an kyximlal qe aj q'oj, aqeju in che tzaj xo'nte ab'j kyi'j, che jawil sch'in mer ik tza'n k'al q'e'n qe, ex k'elel kychk'el qe aj q'oj kyi'j kyu'n ik tza'n tchk'el jun alumaj tku'x tuj jun laq tu'n t-xi q'ab'aj twi altar te jun chojb'il.

16Tuj tq'ijlalil tzul che kletel tu'n Qman Dios qe xjal etzan tu'n, ik tza'n qe ẍne'l kwentin qe wen tu'nju pastoril kye. Che qoptz'ajel tuj ttx'otx' Qman ik tza'n qe tb'anil ab'j in che qoptz'aj ti'j tcoron jun rey.

17Tb'anilxix che okel ke'yin. Tu'nju nimxix twitz triw ex nimxix ta'l twitz uva, che ch'iyil qe ku'xun ax ikx qe q'apoj.