Deuteronomio 16 - Mam Huehuetenango New Ortography

Qe ninq'ij tu'n kyik'set teyle junjun ab'q'i Éxodo 23.14-17; 34.18-24

1Ok tul kanun xjaw Abib, kyik'san kub'e aju Xjan Q'ij te nimb'il te Qman Dios, porke tuj jun qonik'an te xjaw lu e jetz q'i'ne tuj Egipto tu'n Qman Dios.

2Tuj Xjan Q'ij kb'el kyb'yo'ne wakẍ ex qa ẍne'l te chojb'il te Qman Dios tuj lugar kjawil t-sk'o'n te nab'l tb'i.

3Kxel kychyo'ne tuk'il pan minti' t-samel tuj tu'n tjaw mal tk'u'j. Wuq q'ij che wa'le pan minti' t-samel tuj tu'n tjaw mal tk'u'j; pan te b'is k'okel tb'i, porke noq elakyim e je'tze tuj Egipto. Akux itz' qeye tzalu twitz tx'otx' kyna'ntze aju q'ij tej kyetze tuj Egipto.

4Kyuj wuq q'ij lu minti' tu'n tten t-samel pan tu'n tjaw mal tk'u'j tuj tkyaqil kytanmi, ex mi'n kyaj kyq'o'ne tuj juntl q'ij ch'intl tchib'jal alumaj otoq txi kyq'o'ne te chojb'il te qale tuj tnejel q'ij.

5Mi'n txi kyq'o'ne chojb'il tuj Xjan Q'ij noq tuj alkyechaqx tnam ktzajel tq'o'n Qman Dios kyeye,

6noq o'kx tuj lugar kjawil t-sk'o'n te nab'l tb'i, ex atzun kxel kyq'o'ne chojb'il okxi tex q'ij, ex atzun or lu tej kyetze tuj Egipto.

7K'okex kytxo'ne alumaj twitz q'aq' ex kxel kychyo'ne tuj lugar kjawil t-sk'o'n Qman Dios, ex te prim tuj juntl q'ij che ajel meltz'aje kyjaye.

8Kyuj qaq q'ij che wa'le pan minti' t-samel tuj tu'n tjaw mal tk'u'j, ex tuj twuqin q'ij k'okel jun b'uyj tib'il tb'anilxix kyu'ne te nimb'il te Qman Dios; tuj q'ij lu minti' aq'untl kb'antel kyu'ne.

9Kb'el kyajla'ne wuq seman, ktzajel qe' tajlet tuj q'ij ok ttzyet tu'n tjaw chmet twitz triw,

10kb'eltzun kyik'sa'ne jun ninq'ij te nimb'il te Qman Dios ok kyjapun b'aj qe wuq seman, ex che xe'l kyq'o'ne kyoyaje tu'n kyexe kygan, ik tza'nx tky'iwb'il Qman Dios otoq kyk'ame.

11Che tzalajele twitz Qman Dios tuj lugar otoq jaw t-sk'o'n te nab'l tb'i, junx kyuk'il qe kyky'ajale, qe kyme'jele, qe kymajene xinaq, qe kymajene xu'j, kyuk'ix qe aj Leví, qe stranjer xjal, qe k'wa'l minti' kyman ex kytxu', ex qe meb'a xu'j najl tuj kytanmiye.

12Kyna'ntze, ikx kyeye o che tene te majen tuj Egipto; tu'ntzun jlu japunx kyu'ne kykyaqil qe ley lu.

13Oktzun tb'aj kychmo'ne twitz triw ex ok tb'aj kyyatz'o'ne ta'l twitz uva, kb'el kyik'sa'ne wuq q'ij ninq'ij kyuj qe tal ja t-xaq tze'yin kywi'.

14Che tzalajxe tuj ninq'ij lu junx kyuk'il qe kyky'ajale, qe kyme'jele, qe kymajene xinaq, qe kymajene xu'j, kyuk'ix qe aj Leví, qe stranjer xjal, qe k'wa'l minti' kyman ex kytxu', ex qe meb'a xu'j najl tuj kytanmiye.

15Wuq q'ij kb'el kyik'sa'ne ninq'ij lu te nimb'il te Qman Dios tuj lugar kjawil t-sk'o'n; ok che b'el ky'iwla'ne tu'n Qman Dios kyi'j kykyaqil kywitz kyawale ex kyi'j kykyaqil kyaq'unb'ene, ex che tzalajelxixe wen.

16Ox maj tuj ab'q'i tu'n kypon kykyaqil xinaq aj Israel twitz Qman Dios tuj lugar kjawil t-sk'o'n. Atzun tu'n kypon kyuj qe ninq'ij lu: Tuj ninq'ij kye pan minti' kysamel kyuj tu'n tjaw mal kyk'u'j, tuj ninq'ij kye seman, ex tuj ninq'ij kye tal ja t-xaq tze'yin kywi'. Mi jun jaku pon twitz Qman qa minti' q'i'n tu'n;

17teyle te junjun kxel ti'n toyaj ik tza'nx tky'iwb'il Qman Dios otoq tk'am.

Qe tumel tu'n t-xi b'inchet kyi'j xjal

18Kyq'on oke qe jwes ex qe ajkal kyuj kykyaqil tnam che tzajel tq'o'n Qman Dios te teyle junjun k'loj kyiyjile, tu'ntzun kykawin tuj tumelxix kyib'aje.

19Mi'n b'aj kych'expu'ne qe ley; mi'n tz'ok kyke'yine kyxilen xjal ex mi'n txi kyk'mo'ne pwaq tu'n mi'n tkub' kysentens xjal b'inchal mya b'a'n, porke tu'ntzun pwaq lu in moẍsanjtz kywitz qe xjal at kynab'l, ex in b'aj tzpet-sa'n kyyol qe xjal tz'aqlxix.

20Tuj tumelxix kxel kyb'inchane kyi'j xjal, tu'ntzun kyanq'ine ex tu'n kyoke tajwil tx'otx' ktzajel tq'o'n Qman Dios kyeye.

21Mi'n ku'x kyawa'ne jun tze' te nimsab'l te tilb'ilal xu'j dios Asera ttxlaj t-altar Qman Dios, aju otoq jaw kyb'incha'ne,

22ex mi'n jaw kywab'ane jun ab'j tu'n kyk'ulune twitz, porke ik'un jlu tu'n Qman Dios.