1Tuj tq'ijlalil tej minti'toq rey kyxol aj Israel, attoq jun aj Leví najl mas najchaq tuj tiwitz tx'otx' kye aj Efraín tzaj ti'n jun xu'j aj Belén tuj kytx'otx' aj Judá, tu'n tok te tkab' t-xu'jil.
2Ex tzaj tq'oj xu'j ti'j tchmil ex aj juntl maj najal tuk'il tman tuj Belén. Tb'ajlenxi kyaje xjaw tponlen xu'j ma chixin,
3xi'tzun aj Leví max tuk'il tu'n tkub' tk'u'j tu'n, ex tu'n tajtl juntl maj t-xu'jil tuk'il. Xi tuk'in jun tmajen ex xi ti'n kab'e bur, ex o k'monjtz tu'n xu'j tuj tja tman.
4Ax ikx o k'monjtz tu'n tman xu'j tuk'il tzalajb'il, ex xi tma'n tu'n tkyaj ten kyuk'il. Atzunte aj Leví tuk'ix tmajen e kyaj ten ox q'ij tja tman xu'j, in che wa'n, in che k'an ex ax e tan.
5Tuj tkyajin q'ij e jaw we' primxix tu'n tkub' b'e kyu'n, ex tej ch'ixtoq kyaj, xi tma'n tman txin te tji':
—Wa'na nej na'nxtoq taja, tu'ntzun tok tipuna, ex te tib'ajxi jlu b'a'ntzun tu'n taja.
6E kub'tzun qe' kykab'il ex e ok ten wa'l ex k'al, ex atzunte tman xu'j xi tma'n te tji' tu'n tkyaj ten juntl aq'b'il tu'ntzun ttzalaj.
7Jawtzun we' aj Leví tu'n taj meltz'aj, ex tu'nju ok q'o'n il ti'j tu'n tji', kyja'tzun kyaj ten juntl qonik'an.
8Tuj tjwe'yin q'ij jaw we' aj Leví primxix tu'n tkub' b'e tu'n, ex ok ten juntl maj tman xu'j kub'sal twitz te tu'n twa'n na'nxtoq taj meltz'aj, tu'ntzun tok tipun; kyja'tzun e wa'n junx akux in b'et t-xi' q'ij.
9Tejtzun tjaw we' aj Leví tu'n tkub' b'e tu'n tuk'ix t-xu'jil ex tuk'ix tmajen, atzunte tji' xi tma'n te kyja': Ma tz'ok qax ex ch'ix qok yupj, ax tkyaj tena juntl qonik'an tu'ntzun ttzalaja, ex te prim nchi'j jaku kub' b'e kyu'ne tu'n kyaje kyjaye.
10Atzunte aj Leví minti' kub' tuj twitz tu'n tkyaj ten juntl qonik'an, noq o'kx tzyet b'e tu'n, tuk'ix t-xu'jil, ex kyuk'ix qe kab'e tbur toksa'n kysiy.
11Tejtzun kykanun ttxlaj tnam Jebús ex qa Jerusalén, xi tma'n tmajen aj Leví te:
—¿Myape b'a'n tuj twitza tu'n tex aq'b'il qu'n tuj tnam lu, aju kytanmi aj Jebuseo?
12Atzunte aj Leví xi ttzaq'we'n:
—Mi'n, mlay qo kyaj ten tuj jun tnam qa mya kye aj Israel. B'a'n tu'n t-xi qi'n qb'e tu'n qpon tuj tnam Gabaa.
13Qo' ch'intl tu'n tex aq'b'il qu'n tuj tnam Gabaa ex qa tuj Ramá.
14Kyja'tzun xi kyi'ntl kyb'e, ex ch'ixtoq tex q'ij tej kypon tuj Gabaa jun tnam kye tiyjil Benjamín.
15Eltzun kypa'n kyib' ti'j b'e q'i'n kyu'n, ex e okx tuj tnam Gabaa tu'ntzun tex aq'b'il kye, ex e kub' qe' tuj plas tuj tnam ex mi jun tzaj q'onte kyposad.
16Tej otoq tz'ok qonik'an, ik' jun tij xjal ajnintz tuj taq'un tuj kojb'il. Aju tij xjal lu atzun ta'toq ttanmi tuj tiwitz tx'otx' kye aj Efraín, ex atzun najltoq tuj tnam Gabaa ik tza'n jun b'etin xjal, porke aqeju najlqe tuj tnam Gabaa tiyjil Benjamín qe.
17Tejtzun ttil tij xjal aju b'etin xjal q'uqltoq tuj plas, xi tqanin te:
—¿Jatum tzajniya ex tza'n t-xi'ya?
18Atzunte aj Leví xi ttzaq'we'n:
—Noq b'etin xjal qo'ye. Tzajni qo'ye tuj Belén tuj tx'otx' Judá, ex ma qo'xe tuj tiwitz tx'otx' mas najchaq kye aj Efraín jatum najl qine. Ma chin tene tuj Belén, atzun ja'lo ma chin ajtz meltz'aje tu'n nxi'ye njaye, ex na'nx tknet jun xjal wu'ne tzalu tu'n ttzaj q'o'n ch'in nposadiye tu'n.
19Q'i'n kywa nburre qu'ne, tuk'ix ttxa triw, ex q'i'n pan ex ta'l twitz uva qu'ne tu'n tajb'en te qeye; te nxu'jile, te nmajene ex te weye. Minti' juntl atx taj qeye.
20Atzunte tij xjal xi ttzaq'we'n:
—B'a'nwt ma tzula. Jaku wile tkyaqil aju at tajb'en teya. Mlay txi nq'o'ne amb'il teya tu'n tex aq'b'il tu'na tuj plas.
21E je'xtzun q'i'n tu'n tij xjal max tja ex xi tq'o'n kywa qe bur. Te tib'ajxi b'aj kytx'jo'n qe b'etin xjal kyqan ex e oktzun ten wa'l ex k'al junx.
22Ex tej matoq in che tzalaj, attoq junjun xinaq jumajx mya b'a'n qe ate' tuj tnam, b'aj kytxolb'an kyib' ti'jele ja, ex e ok ten q'ajtzal kyuw twitz tlamel ja, ex xi kyma'n te tij xjal aju tajaw ja:
—Q'i'metza aju xinaq ma tzul tuk'ila. Qajb'ile tu'n qkub' tane tuk'il.
23Atzunte tajaw ja etz, ok ten kub'sal kywitz ex tma:
—Aqeye wuk'il mi'n kyb'inchaye ikju. Mi'n kyb'inchaye aju mya b'a'n lu, aju xinaq lu ma nk'ame tu'n tposadiyin wuk'ile.
24Kyb'intze, lu nme'jele lu na'nx tlonte xinaq, ax ikx lu t-xu'jil xinaq lu. Che elex wi'ne ex kyb'inchame kyi'j noq alkye kyajb'ile, atzun te xinaq lu mi'n kyb'inchaye mya b'a'n ti'j.
25Atzun kye minti' xi kyb'i'n tyol tij xjal, kyja'tzun tzaj ti'n aj Leví t-xu'jil ex ex tq'o'n tuj cay, atzun kye xinaq lu b'aj kyyajla'n, ex e ok ten ti'j xu'j tuj enter qonik'an tejxi tkub' q'ij. Ex kyajtzun kyq'o'n.
26Ch'ixtoq tkub' q'ij tej tul meltz'aj xu'j tja tij xjal jatum ta'toq tchmil, ex axtzun kub' tz'aq ttzi ja ex kyim.
27Tejtzun tjaw we' tchmil, okx tjaqo'n tlamel ja tu'ntzun t-xi ti'ntl tb'e, o til lu t-xu'jil palch kub' ttzi ja, kykub'sa'n qe tq'ab' tib'aj tmarkil ja.
28Xitzun tma'n te:
—Chux we'ktza ex qo'tzun.
Atzunte xu'j minti' tzaj ttzaq'we'n. Jawtzun ti'n t-ximlal xu'j ex jax tq'o'n tib'aj jun tbur, ex tzyet b'e tu'n tu'n t-xi' tja.
29Tejtzun tpon tja, tzaj ti'n jun kchil ex b'aj tpaẍu'n t-ximlal qtzan t-xu'jil, te kab'laj piẍ ela tu'n ex xi t-sama'n tuj tkyaqil tx'otx' kye aj Israel.
30Kykyaqil qeju e ke'yinte jlu o kyma:
—Atxix tej kyetz aj Israel tuj Egipto, na'nx tilwaj ex na'nx tb'ant jun maj ikju ik tza'n jlu. B'a'n tu'n qximan ti'j ex tu'n tb'ant ti'j alkye kb'antel qu'n ti'j jlu, che chi.
Who We AreWhat We EelieveWhat We Do
2025 by iamachristian.org,Inc All rights reserved.
