1 Reyes 17 - Mam Huehuetenango New Ortography

Tqanil tu'n Elías ti'j koresma

1Atzunte Elías aju aj Tisbe aju at tuj tx'otx' Galaad, xi tma'n te Acab: Kxel nma'ne jun yol axix tok twitz Qman aju Kydios aj Israel aju in chin ajb'ene te: Tuj kab' ox ab'q'i ja'lo mlay tzaj jb'al ex mi tq'ab' che'w, maxitzun ktzajel jb'al ok t-xi nma'ne.

2Tzaj yolin Qman tuk'il Elías ex tma kyja':

3Texa tzalu ex kyja' t-xi'ya tuj tjawitz q'ij, ewanx tib'a tuj tq'ab' xaq aju tok tb'i Querit aju tkub' jlajxi nima Jordán tuj tjawitz q'ij.

4Atzun kk'ala a' tuj tq'ab' xaq lu, ex o txi nma'ne kye qe joj tu'n t-xi q'a'kj twaya kyu'n.

5Tb'inchatzun Elías ik tza'nx o tma Qman te, xi'tzun tuj tq'ab' xaq Querit jlajxi ju nima Jordán, ex axtzun kyaj ten.

6Pontzun q'i'n twa ex tchi' kyu'n qe joj te prim ex te qale, ex atzun o k'an a' tuj tq'ab' xaq.

7Ex tej tel ch'intl q'ij, aj tzqij tq'ab' xaq porke minti' jb'al o tzaj tuj tkyaqil tx'otx' kye aj Israel.

Pon Elías tuk'il jun xu'j aj Sarepta

8Xitzun tma'n Qman te Elías:

9We'ktza ex txi'ya tuj tnam Sarepta niqayin ttxlaj tnam Sidón, ex atzun tkyaj tena najal ma chixin. Ma txi nma'ne te jun meb'a xu'j najl tuj lugar ma chixin tu'n ttzaj q'o'n twaya tu'n.

10Jawtzun we' Elías ex xi' tuj tnam Sarepta. Tej tokx tuj ju tnam o til jun meb'a xu'j in q'in si'. Tzaj ttxko'n ex xi tma'n te:

—B'inchama xtalb'il, q'intza ch'in a' tuj jun vas te nk'a'ye.

11Kyja'toq t-xi' xu'j q'ilte tej tajtz txko'n juntl maj tu'n Elías, ex xi tma'n te:

—B'inchama xtalb'il, tuk'ix jun piẍ pan q'intza.

12Atzunte xu'j xi ttzaq'we'n te:

—Kxel nma'ne jun yol axix tok twitz Qman aju Tdiosa: misikyer pan b'animaj wu'ne. Noq o'kx jun yub' arin atx tuj jun ẍoq', ex tuk'ix ch'in chib'j aseyt atx tuj jun xar, ex atzun til in chin q'ine ch'in si', tu'n nxi'ye tzq'ajsalte te twa wale ex te weye. Kb'ajel qwa'ne jlu, ex te tib'ajxi qo kymele tu'n we'yaj, ex minti'tl atx.

13Atzunte Elías xi ttzaq'we'n:

—Mi'n xob'a. Txi'ya b'inchalte ju ma tmaya. Ex tnejel b'inchama jun tal wab'j te weye ti'j arin ma tmaya ex q'intza weye, te tib'ajxi b'inchama juntl te teya ax ikx te tala.

14Porke ma tzaj tma'n Qman aju Kydios aj Israel kyja': Mlay kub' b'aj naj aju arin tku'x tuj ẍoq', ax ikx aju chib'j aseyt tku'x tuj xar; maxi kb'el b'aj okxi ttzaj jb'al tu'n Qman tib'aj tx'otx' lu.

15Xi'tzun ju xu'j ex tb'incha ik tza'nx otoq tma Elías. Ate xu'j kyuk'ix qeju ate' tuj tja ex tuk'ix Elías, cabal o kanun kywa te nim q'ij.

16Minti' kub' b'aj naj arin tuj ẍoq', ax ikx ju chib'j aseyt tuj xar; o japun ik tza'nx otoq tma Qman te Elías.

17Otoq tz'el q'ij, tzyet tal meb'a xu'j tu'n yab'il; kyuwxix aju yab'il ok ti'j ex o kyim.

18Xitzun tma'n ju meb'a xu'j te Elías:

—Aya t-sanjel Dios, ¿ti tq'oja wi'je? ¿Mape tzula wuk'ile noq tu'n ttzaj tna'na wile ex tu'n tkyim wale?, chi xu'j.

19—Q'ontza tala tzalu wuk'ile, chi Elías xi ttzaq'we'n.

Eltzun ti'n Elías aju tal k'wa'l twi tqan meb'a xu'j, ex jax ti'n tuj tcuart jatum najltoq, ex kub' tkoẍb'a'n twi twatb'il.

20Jawtzun tq'ajq'ajel twi' kyuw, ex xi tma'n te Qman: Aya Nman Dios, ¿maj tuk'ix ju meb'a xu'j lu ma tzaj tq'o'na jun b'is ti'j, aju jatum in chin posadiyine, ex lu ma kyim tal tu'na?

21Te tib'ajxi jlu kub'tzun mutze' Elías ox maj tib'aj tal q'a, jaw tq'ajq'ajel twi' kyuw ex xi tma'n te Qman: Aya Nman Dios, in chin kub'sane twitza tu'n tul tnab'l tal q'a lu tu'na.

22Tzajtzun ttzaq'we'n Qman aju tqanb'etz Elías, ex ul tnab'l tal q'a.

23Jawtzun ti'n naj Elías aju tal q'a, ku'tz ti'n tuj tcuart ma twi ja, xi tq'o'n te ttxu', ex xi tma'n te:

—Ke'yintza, aju tala ma tzul tnab'l.

24Atzunte xu'j xi ttzaq'we'n:

—Ja'lo ma tz'el nnik'e ti'j ax tok aya jun t-sanjel Dios, ex aju in tma'na ax tok a Qman in q'mante teya.