Nehemías 6 - Mam Huehuetenango New Ortography

Kub' kyximan jun k'loj xjal tu'n kyok tzoqpaj ti'j Nehemías

1Tejtzun kyb'inte Sanbalat, Tobías, Gesem aju aj Arabia, ex txqantl aj q'oj qi'je, qa otoq jaw nb'incha'ntle muro ex otoq maqset tkyaqil jatum b'a'n tu'n kyoktz aj q'oj, (o'kxku qe tlamel na'nxtoq kyok b'aj nq'o'ne),

2ul kysama'n Sanbalat ex Gesem jun tqanil wuk'ile tu'n tpon qchmon qib'e kyuk'il tuj jun aldey tuj chq'ajlaj Ono tb'i. Ex aju mer kyximb'etz tu'n kyb'inchante mya b'a'n wi'je.

3E je'xtzun nsama'ne qe sanjel q'malte kye kyja': Minti' amb'il wi'je ex at nim waq'une ilxix ti'j tu'n tb'ant, kyja'tzun mlay chinxe; jaku we' aq'untl qa ma chinxe jatum in kyma'ne tu'n npone, nchiye kye.

4Kyaje maj ul kysama'n ax tqanil lu wuk'ile, ex ax tzaq'web'l aj nq'o'ne ik tza'nx otoq txi nma'ne nej.

5Ul t-sama'n Sanbalat tjwe'yin maj jun tmajen q'olte ax tqanil lu tz'ib'an tuj jun u'j jaqo'maj.

6Chi in tma'n tuj u'j kyja': In b'et tqanil kyxol txqantl nasyon, ax ikx in tma'n Gesem qa ax tok, qa aya ex qe xjal Judiy in che ximane ti'j tu'n tjaw kyi'n kyib'e ti'j rey ex tu'ntzunju ma jaw kyb'incha'ne muro ti'jele tnam, ax ikx in kyma'n qa aya taja tu'n toka te rey,

7ex ma tz'ok tq'o'na kyoklen qe t-sanjel Dios tu'n t-xi kyma'n kye xjal aj Jerusalén qa at rey tuj Judá. Mya yajku b'injtz tqanil lu tu'n rey Artajerjes, kyja'tzun b'a'n tu'n ttzaja tu'n qyolin o'kx qe, chi Sanbalat tuj u'j.

8Atzun weye aj nsama'ne tzaq'web'l ex xi nma'ne te qa mya ax tok aju in tma'n, ex qa noq tu'nx otoq jaw jlet jlu tuj tnab'l.

9Atzun kye o che jyon tumel tu'n qok sek'pu'ne kyu'n; tuj kyximb'etz qa tu'n ttzaj b'aj qk'u'je, tu'ntzun mi'n tpon b'aj aq'untl qu'ne, atzun weye xi nma'ne te Dios kyja': Nman Dios, chin tonintza tu'n tpon b'aj aq'untl wu'ne.

10Te tib'ajxi inxe tja Semaías aju tky'ajal Delaía ex tal tchman Mehetabel; otoq tz'okx tlamon tib' tuj tja ex tzaj tma'n weye: Qo okx tuj tja Dios ex che eletz qlamo'n qe tlamel, porke tuj aq'b'il lu che ul xjal b'yolte teya.

11Atzun weye xi ntzaq'we'ne: ¿B'a'npe tu'n tel oq jun xinaq ik tza'n qine tu'n tokx tklon tib' tuj tja Dios tu'n mi'n tkub' b'yo'n? Mlay chinx oqe tuj tja Dios, nchiye te.

12Ax ikx el nnik'e ti'j, mya tu'n Dios otoq tzaj q'ma'n ju yol lu te; tzaj tma'n ikju tu'nju otoq tk'am pwaq tu'n Sanbalat ex Tobías;

13xi kyq'o'n xjal pwaq lu te, tu'ntzun wok xob'tzane kyu'n ex tu'n nb'inchane il twitz Dios. Noqwit o nb'inchaye ikju, owtlo che yolin mya b'a'n wi'je ex owtlo chin ele tuj nch'ixwiye kyu'n.

14Nman Dios: Na'ntza aju ma kyb'incha Sanbalat ex Tobías. Ax ikx mi'n tzik' tna'l tu'na aju ma tb'incha Noadías wi'je, aju xu'j ok tq'on tib' te t-sanjela, ex qe txqantl xjal ok kyq'on kyib' te t-sanjela, aqeju o kyajb'e tu'n ttzaj b'aj nk'u'je kyu'n.

15B'aj b'ant muro tuj 25 tajlal xjaw Elul tb'i, ex 52 q'ij xi ti'n tu'n tb'aj b'ant.

16Tej kyb'inte aj q'oj qi'je, ex qe xjal ate' kyuj qe nasyon ate' qi'jele qa otoq b'aj b'ant muro qu'ne, tzaj nim kyxob'il ex b'i'x naj kynimb'il kyib', porke el kynik' ti'j qa aju aq'untl lu otoq b'ant noq tu'nju onb'il tu'n Dios.

17Tuj enter 52 q'ij lu, nim u'j ul t-sama'n Tobías kyuk'il xjal Judiy ma' kyoklen, ax ikx qe xjal Judiy xi kysama'n ela' u'j tuk'il Tobías,

18porke nim xjal Judiy otoq moje' kyyol tuk'il Tobías, porke ate Tobías otoq tz'ok te tji' Secanías aju tky'ajal Ara, ex aju tky'ajal Tobías, aju Johanán tb'i, otoq moje' tuk'il tme'jel Mesulam aju tky'ajal Berequías.

19Kukx in che pon aj xjal q'malte weye qa b'a'n tmod Tobías, ax ikx in che'x aj q'malte tuk'il Tobías aju in chin yoline ti'j. Atzunte Tobías nim u'j ul t-sama'n wuk'ile tu'n ttzaj b'aj nk'u'je tu'n.