1Che b'itzane te Dios tuk'il tzalajb'il aqeye najl tuj tkyaqil twitz tx'otx';
2che b'itzane tu'n tjaw kynimsa'ne tb'i tb'anilxix; kyq'onxe chjonte te ex kynimsa'n jawe tb'i.
3Kymanxe te Dios kyja': Ma'xix kyxilen qe tb'inchb'ena. Noq tu'n tipumala ma'xix che b'el tz'aq twitza qe aj q'oj ti'ja.
4Kykyaqil xjal che b'el ẍmeje' k'ulul twitza, ex che b'itzal tu'n tjaw nimsa'n tb'iya.
5Kytzaje ke'yilte aju taq'unb'en Dios, aqeju b'inchb'en ma'xix kyxilen o tb'incha kyi'j qe xjal:
6Aj tzqij mar tu'n, ax ikx e jik'x qe qxe'chel tuj nima Jordán tu'n kyqan; qo tzalajxix ti'j Dios.
7In kawin te jumajx tuk'il tipumal; tok tkwent kyi'j qe nasyon tu'ntzun mi'n tjaw kyi'n kyib' kyi'j qeju mib'an che b'in.
8Kykyaqile aqeye txqantl nasyon kyq'onxe chjonte te Qdiose, che b'itzane tu'n tjaw nimset tb'i.
9Porke noq tu'n kukx itz'x qo'; ex tu'n minti' ma qo jaw tz'aq.
10Qman Dios, ma qo ok tq'o'na tuj malb'il, ma qo b'aj t-saqsa'na ik tza'n saq pwaq.
11Ma qo tzyete tu'na tuj k'ob'il; ex ma kub' tq'o'na jun iqtz alxix qib'aje.
12Xi tq'o'na amb'il tu'n tkub' qi'je kyu'n aj q'oj; mer ik tza'n ma qo ik'e tuj a' ex tuj q'aq', ex te b'ajsb'il ul ti'na qo'ye tuj jun lugar tb'anilxix.
13Ok chin okexe tuj tjaya ex che b'el npatune qe oyaj twitza; kyja'tzun kjapunel wu'ne aju yol o txi ntziyane,
14aju yol xi ntziyane teya tej atintoqe tuj xob'ajil.
15Che b'el npatune tib'aj t-altara qe alumaj ulni kynab'l; ex che xel nq'o'ne teya qe tor ex qe tman chip tuk'ix t-sib'el ẍne'l.
16Kytzaje kykyaqile aqeye in che xob' twitz Dios. Kyb'intze, kxel nma'ne kyeye aju ma tb'incha weye.
17Jaw tq'ajq'ajel nwi'ye tu'n nkub'sane twitz, ex jaw nnimsa'ne tb'i.
18Noqwit at nximb'etze mya b'a'n, minti'wtlo ma chin tzaj b'i'ne tu'n Qman;
19pero ma chinx b'i'ne tu'n ex ma tzaj tb'i'n nna'j Diose.
20Nimanxwit te Dios, minti' ma tz'el tik'un nna'j Diose ex minti' ma kub' t-xk'a'yin tk'ujlalil weye.
Who We AreWhat We EelieveWhat We Do
2025 by iamachristian.org,Inc All rights reserved.
