1Nman Dios, b'intza aju tq'ajq'ajel nwi'ye ok njaw ayayane; chin tkloma kywitz qe aj q'oj wi'je xob'ajilxix qe.
2Chin tewanxa kywitz qe xjal in b'aj kyximan mya b'a'n wi'je tuj ewaj; chin tkloma tuj kyximb'etz qe xjal mya b'a'n,
3aqeju ik tten kyaq' ik tza'n spad b'anin ttzi' wen, ex qe kyyol in che k'ixb'i xjal kyu'n mer ik tza'n plech in tzaj xo'n kyi'j xjal.
4Max tuj kyewb'il in tzaj kytzoqpi'n qe kyplech kyi'j qeju minti' kyil; noq minab'en in tzaj kytzoqpi'n ex minti' in tzaj t-xob'il kyi'j.
5In kynimarin kyib' kyxolx tu'n kyb'inchante mya b'a'n; in b'aj kyximan tu'n tkub' kyq'o'n qe k'ob'il tuj ewaj, ex in kub' kyximan qa mi a'l jun in ke'yinte kye,
6ex qa mi a'l jun jaku b'aj tke'yin ju kyb'inchb'en mya b'a'n.
Ex aju nne'l tnik' kyi'j qe t-ximb'etz xjal tujxi tanmi, kb'ajel tke'yin tkyaqil jlu.
7Ok che k'ixb'isetel tu'n Dios kyu'n qe plech, ex noq minab'en che okel k'ixb'isa'n;
8ok che b'el tz'aq tuj kyex kyyol, ex qeju che ke'yilte kye che okel ten xmayil kyi'j.
9Kykyaqiltzun xjal che xel q'onte nimb'il te Dios ex che okel ten yolil ti'j taq'unb'en; ex k'elel kynik' ti'j aju o tb'incha.
10Qe xjal tz'aqlxix che tzalajel ti'j Qman ex kqeb'el kyk'u'j ti'j, ex kykyaqil xjal tz'aqlxix ok che tzalajel.
Who We AreWhat We EelieveWhat We Do
2025 by iamachristian.org,Inc All rights reserved.
