1Ok in jaw we' Dios kyi'j qe aj q'oj ti'j, b'i'x in che el sputj tu'n; ex qeju in che ik'un te b'i'x in che el oq twitz;
2in che kub' naj qe ik tza'n sib' tuj kyq'iq', in che el a'yix qe ik tza'n xkab' nno'kx q'ot tuj q'aq'; kyja'tzun tten in che naj qe xjal mya b'a'n twitz Dios.
3Atzun kye qeju tz'aqlxix in che tzalaj qe; in che noj tu'n tzalajb'il twitz Dios ex in che t'ikpaj tu'n tzalajb'il.
4Che b'itzane te Dios, che b'itzane tu'n tjaw nimset tb'i; kynimsa'n jawe aju in b'et tib'aj muj. Che tzalajxe ti'j Qman. Che tzalajxe twitz.
5Ate Dios najl tuj tja xjan, ate mamb'aj kye qe k'wa'l minti' kyman ex kytxu' ex kolol kyi'j qe meb'a xu'j;
6In tzaj tq'o'n Dios jun lugar jatum tu'n kynajan qeju kyjunalx ate'; in che etz ttzoqpi'n qeju kyokx pres ex in xi tq'o'n tzalajb'il kye; atzun kye qeju mib'an che b'in ok che najal tuj tx'otx' mib'an tzaj awal tuj.
7Nman Dios, tej tkub' neja kywitz qe xjal etzan tu'na ex tej tb'eta tuj lugar minti' kynajb'il xjal tuj,
8jaw lu'lun tx'otx', tzaj jb'al twitz kya'j, aju witz Sinaí jaw lu'lun twitz Dios, aju Dios kye aj Israel.
9Nman Dios, tu'na tzaj nimxix jb'al tu'ntzun tok juntl maj tipun aju tzqij tx'otx' etzan tu'na.
10Qe xjal etzan tu'na axtzun e kub' ten tuj, atzun teya Nman Dios, noq tu'n t-xtalb'ila xi tq'o'na kye qe meb'a aju at tajb'en kye.
11Tzaj tq'o'n Qman jun tnej yol ex nimku xu'j e ok ten q'malte tqanil:
12E je'l oq qe rey kyuk'ix qe kysoldad. Qe xu'j otoq che kyaj ten ja b'aj kysipan aju otoq tz'el q'i'n kye aj q'oj,
13atzun kyeye akux koẍl qeye tuj kype'n ẍne'l, ok ttx'otx'il saq pwaq kyi'j qe t-xik' paloma. Ex ok ttx'otx'il q'an pwaq mas tb'anil kyi'j qe ttzmal.
14Tejtzun kyel oq qe rey tu'n Dios aju Tajaw Tkyaqil, saq ok twi witz Salmón tu'n.
15Ma' kywa'l qe witz tuj tx'otx', ex ma'xix kyjawsa'n.
16Aqeye witz ma' kywa'le, ¿tiqu'n in tzaj tlo'ch kyk'u'je ti'j ju witz jaw t-sk'o'n Dios tu'n tnajan twi'? Atzun knajal Qman te jumajx.
17Tuj milin ate' qe tcarwaj Dios te q'ojb'il; tzaj twi' witz Sinaí kyuk'ix qe tcarwaj ex ul tuj tja.
18Nman Dios, ma jaxa twi' jun witz ma' twa'l, ma che jax ti'na qe pres; o tk'ama chojb'il tzaj kyq'o'n xjal, ex kyuk'ixpe qe xjal mib'an che niman tzaj kyq'o'n chojb'il teya Nman, tu'ntzun tnajana kyxol.
19Nimanxwit Qman aju Qdios ex klol qe, tu'nju teyle junjun q'ij in xi ti'n aju qiqatz.
20Ate Qman Dios b'a'n kolin, ex jaku qo klet tu'n te kamik,
21kb'el tpa'n Dios kywi' aj q'oj ti'j, tuk'ix kywi' qeju kukx kyb'inchan il.
22O tma Qman kyja':
Ok k'ajetz wi'ne tuj tx'otx' Basán; ok k'ajetz wi'ne tuj mar ma' t-xe',
23tu'ntzun tnoj kyi'j tqana tu'n kychk'el qe aj q'oj ti'ja ex tu'n t-xi kyk'a'n qe ttx'ya'na.
24Nman Dios, aya Ndiose ex Nreye, tuj tjaya xjan q'ancha'l qe xjal txolin kyten in kub' kyik'sa'n ninq'ij te nimb'il teya.
25Nejni qe b'itzal ex lepchix qe q'ajtzal chnab', ex tuj xolb'aj kyku'x qe tal q'apoj nno'k kyq'ajtza'n qe tampor ch'in.
26Kyq'onxe chjonte kykyaqile te Qman Dios. Kyq'onxe chjonte te kykyaqile aqeye aj Israel.
27Nejni Benjamín kywitz, aju mas ch'in, kyuk'ix nimku nejenel kye tiyjil Judá, kye tiyjil Zabulón ex kye tiyjil Neftalí.
28Nman Dios, yek'untza tipumala ik tza'n o tb'inchaya qi'je ojtxi.
29Max tuj tjaya ma' twa'l tuj Jerusalén, jatum in pon q'i'n oyaj teya kyu'n qe rey,
30kawinxa tnam Egipto, aju ik tten ik tza'n qe txkup ate' tjaq' tqan ajlaj, ex ik tza'n qe tor ex qe tal tor tx'u'j qe, e tkub' kymansin kyib' twitza ex e ttzaj kyi'n saq pwaq; sputun ela qe xjal o'kx kyaj ti'j q'oj.
31Tuj Egipto che tzajel qe nejenel; kjawil kyyek'un kyq'ab' aj Etiopía twitz kya'j tu'n kyna'n Dios.
32Che b'itzane te Dios aqeye tnam tuj tkyaqil twitz tx'otx', kyb'itzanxe b'itz te Qman,
33aju in b'et twitz kya'j, aju kya'j at te jumajx. Kyb'inxe tq'ajq'ajel twi', aju tq'ajq'ajel twi' nimxix tipumal.
34Tz'elx kynik'e ti'j tipumal Dios; aju tajwalil tkub' kyib'aj aj Israel, aju tipumal in japun kanun twitz kya'j.
35Ma'xix t-xilen Dios tuj tja xjan; aju Kydios aj Israel in tzaj tq'o'n kyipumal qe xjal etzan tu'n.
Nimanxwit tb'i Dios.
Who We AreWhat We EelieveWhat We Do
2025 by iamachristian.org,Inc All rights reserved.
