1Kyxol tiyjil Benjamín attoq jun xinaq ma' toklen kyxol xjal, Cis tb'i, tky'ajal Abiel, atzunte Abiel tky'ajal Zeror; atzunte Zeror tky'ajal Becorat, ex atzunte Becorat tky'ajal Afía.
2Attoq jun tky'ajal Cis, Saúl tb'i, otoq tz'ok ku'xun ex tb'anilxix ke'yin. Misikyer juntl aj Israel ik tza'n te, mi a'l juntl in pon twa'l ik tza'n te, noq o'kx in japun kywa'l twi' t-semil.
3At jun q'ij e je'x tzpet qe ttxu tbur Cis, ex xi tma'n te tky'ajal aju Saúl tb'i:
—B'incham ttena ex txi'ya jyol kye bur. Ex uk'inx jun tuk'ila kyxol qe majen xinaq.
4Xi'tzun Saúl ex ik' aj tuj tiwitz tx'otx' kye aj Efraín ex tuj lugar Salisa, ex minti'x e knet qe bur tu'n. Ax ikx ik' aj tuj lugar Saalim tb'i, ex tuj kytx'otx' aj Benjamín, ax ikx minti' e knet tu'n.
5Tej kypon tuj lugar Zuf tb'i, xi tma'n Saúl te majen aju uk'in tu'n:
—Qo aj meltz'aj, mya yajku in b'isun nmane qi'j, ex b'alo minti'tl in b'isun kyi'j qe ttxu bur.
6Atzunte majen xi ttzaq'we'n:
—Tuj tnam lu at jun t-sanjel Dios, ex puro niman kyu'n kykyaqil xjal, ex tkyaqilju in tzaj tma'n in japun. Qo' tuk'il, b'alo jaku tzaj tma'n qe alkye b'e tu'n t-xi qi'n.
7Xi ttzaq'we'n Saúl:
—Qo', ex ¿titzun ch'in kxel qi'n teju xinaq lu? Minti'tl wab'j tuj qpa. Minti' jun ti'xti b'a'n tu'n t-xi qq'o'n te t-sanjel Dios.
8Xitzun ttzaq'we'n majen:
—At jun tal saq pwaq wuk'ile. Jaku txi qq'o'n te t-sanjel Dios tu'ntzun ttzaj tma'n qe alkye b'e tu'n t-xi qi'n.
9(Tuj tq'ijlalil ojtxi, qa at jun aj Israel tajb'il tu'n t-xi tqanin jun t-xjel te Dios, in xi tma'n: Qo' tuk'il ju xjal b'a'n nab'in tu'n Dios, che chi; porke aju tok tb'i ja'lo “t-sanjel Dios”, atzun ojtxi “jun xjal b'a'n nab'in tu'n Dios” tb'i.)
10—E tb'ant ik tza'n ma tmaya, qo'tzun tuk'il, chi Saúl.
Kub'tzun b'e kyu'n kykab'il tu'n kyxi' tuj tnam jatum najltoq t-sanjel Dios,
11ex tej matoq in che jax twitz jawl tjaq' tnam, ok kyk'ulb'an kyib' kyuk'il junjun txin kyja' kyxi' q'il a', ex xi kyqanin kye:
—¿Ape ta' ju xjal b'a'n nab'in tu'n Dios tuj lugar lu?
12Atzun kye txin tzaj kytzaq'we'n:
—Atzunju, ex max ta' ma jawnix. Tz'ok tililx kyqane, yake ma tzul tuj tnam lu tu'n t-xi tq'o'n jun chojb'il tib'aj altar tjax twi witz.
13Ok kypone ma chixin knetel kyu'ne, na'nxtoq t-xi wa'l tuj lugar te k'ulb'il. Mlay che ok ten xjal wa'l qa na'nxtoq tpon, porke a in kub' ky'iwlante chojb'il. Te tib'ajxi jlu che okeltzun ten xjal wa'l, aqeju otoq che tzaj txko'n. Kyja'tzun, kyxi'ye ja'lo, porke a or jlu jaku knet kyu'ne, che chi txin.
14E jaxtzun b'et tu'n kyjapun tuj tnam ex tej ch'ixtoq kykanun tuj tnam, kyja' ttzaj Samuel tuj b'e q'i'n kyu'n tu'n t-xi' tuj lugar te k'ulb'il.
15Te ewtoq, tej na'nxtoq tpon Saúl, otoq tzaj tma'n Qman te Samuel:
16Ax or jlu nchi'j tzul nsama'ne jun xinaq tuk'ila, tzajni tuj kytx'otx' tiyjil Benjamín, ex atzun jlu k'okel tq'o'na toklen te kawil kyib'aj aj Israel aqeju etzan wu'ne. Atzun jlu ok klolte kye tjaq' kykawb'il aj Filisteo, porke ma tzaj tz'e'y nk'u'je kyi'j qe xjal etzan wu'ne. Aju tq'ajq'ajel kywi' tu'n ta'w k'ixk'oj ma japun wuk'ile, chi Dios te Samuel.
17Tejtzun tilwaj Saúl tu'n Samuel tzaj tma'n Qman te: Atzunju xinaq lu aju xi nma'ne teya. Atzun jlu k'okel te kawil kyxol qe xjal etzan wu'ne.
18Tej kyokx ttxa'n tnam, xi laq'e' Saúl tuk'il Samuel, ex xi tma'n te:
—B'inchama xtalb'il, yek'untza weye jatum ta' tja ju xjal b'a'n nab'in tu'n Dios, chi Saúl.
19—Aqine ju xjal b'a'n nab'in tu'n Dios. Nejkuya nwitze tu'n qjax tuj lugar te k'ulb'il ex jaku wa'na wuk'ile ja'lo ma chixin. Ex nchi'j te prim kxel ntzaq'we'ne tkyaqilju taja tu'n ttzaj t-xjelina weye, ex kxel nq'o'ne amb'il teya tu'n tkub' b'e tu'na.
20Aqeju ttxu tburra, ma b'ant-xi ox q'ij kyxilen naj, mi'n b'isuna kyi'j, porke ma che knet. Ax ikx tkyaqilju mas tb'anil at kye aj Israel k'okel te teya, ex te kye qeju ate' tuj tjaya, chi Samuel.
21Xitzun ttzaq'we'n Saúl:
—Pero tiyjil Benjamín we qin, aju mas tal ch'in kyxol txqantl k'loj kyiyjil aj Israel. Ex mya noq o'kx jlu, ax ikx qeju at t-xilen nmane kyuk'il, mas ch'in kyoklen kywitz txqantl xjal kyxol tiyjil Benjamín. ¿Tiqu'ntzun in tzaj tma'na tkyaqil jlu weye?
22Tzajtzun q'i'n Saúl tu'n Samuel tuk'ix tmajen, e je'xtzun ti'n ma tuja, ex xi tq'o'n ju lugar mas b'a'n te kye twitzju kye txqantl xjal otoq che txket tu'n, ex b'alo 30 kyb'et qe xjal ate'toq.
23Xitzun tma'n Samuel teju b'inchal chib'j:
—Q'intza chib'j aju xi nq'o'ne teya ex xi nma'ne teya tu'n tel tpa'na.
24Tzajtzun ti'n naj ju b'inchal chib'j junka tkux chib'j ex xi tq'o'n te Saúl, ex xi tma'n Samuel te Saúl:
—Aju chib'j lu pa'maj te teya wu'ne. Chux chyo'na, ex tej ẍe tzaj ntxko'ne qe xjal, ma tz'el npa'ne jlu tu'n tajb'en te tchi'ya ja'lo, chi Samuel.
O wa'n Saúl tuk'il Samuel tuj q'ij lu.
25Tej kyku'tz tuj ju lugar te k'ulb'il, e ul tuj tnam ex ok ten Samuel yolil tuk'il Saúl ma twi ja.
26Tujtzun juntl q'ij atx qwitz e jaw we', ex tej ttzaj t-xe kya'j ku'tz txko'n Saúl twi ja tu'n Samuel, ex xi tma'n te:
—We'ktza tu'n t-xi tlajo'ntl tb'eya q'i'n.
Jawtzun we' Saúl. Te tib'ajxi etz tuj cay tuk'ix Samuel,
27ex tej ch'ixtoq kyku'pun ttxa'n tnam, xi tma'n Samuel te Saúl:
—Q'manxa te tmajena tu'n t-xi' nej, ex atzun teya, ayon jurata nej, ex il ti'j tu'n t-xi nma'ne teya aju o tma Dios weye.
Who We AreWhat We EelieveWhat We Do
2025 by iamachristian.org,Inc All rights reserved.
