Jeremías 33 - Mam Huehuetenango New Ortography

Tqanil tu'n kyten aj Israel juntl maj tuj txub'txaj

1Tzaj yolin Qman tkab'inmaji'n tuk'il Jeremías, tej axtoq tokx tuj pres ttxa'n kype'n qe soldad xq'uqil tja rey, ex tzaj tma'n te kyja':

2Aqine Dios aju b'inchalte tx'otx', b'aj nb'incha'ne ex kub' nq'o'ne tujxix tlugaril, aqine Qman Dios nb'iye, kxel nma'ne jlu teya:

3Kub'sana nwitze ex jaku txi ntzaq'we'ne, ex jaku che'x nma'ne teya qe ti'xti ma'xix kyxilen, aqeju ate' tuj ewaj ex minti' ojtzqi'n tu'na.

4Chi Qman aju Kydios aj Israel kyi'j qe ja ate' tuj Jerusalén ex kyi'j kyja rey te Judá, aqeju ma che kub' tilj tu'n kyajb'en tze' ex ab'j te kykolb'il kyib'e, ex te kyq'ojb'ile kyi'j aj Caldeo,

5aqeju ma jaw kyb'incha'n kyxwetzb'il ti'j tnam tu'ntzun kyok tzoqpaj ti'j: Qe ja lu che nojel tu'n kyximlal kyimni, aqeju che kymel wu'ne tu'n ntx'u'jile xob'ajilxix, porke ma kyaj nkoline tnam lu tu'n tlaj nimxix il ma kyb'incha.

6Ex te tib'ajxi che okel nq'anine ex che b'anixel. Wu'ne che tel tuj txub'txaj ex minti' xob'ajil kyi'j.

7Che ajetz wi'ne aj Judá ex aj Israel tuj tnam jatum o che pon q'i'n, ex kjawil nb'incha'ne juntl maj kytanmi ik tza'n tten nej.

8Che b'ajel nsaqsa'ne ti'j tkyaqil il o kyb'incha wi'je, ex kb'el nnajsa'ne tkyaqil mya b'a'n o kyb'incha tej tjaw kyi'n kyib' wi'je.

9K'okel Jerusalén te jun tzalajb'il, te nimb'il ex ajwalil weye kywitz kykyaqil nasyon ate' twitz tx'otx', ex che tzajel lu'lun qe nasyon tu'n kyxob'il ok kyb'inte tkyaqil b'a'n ex tzalajb'il kxel nq'o'ne kye qeju najlqe tuj Jerusalén.

10Chi Qman: Aqeye in kyma'ne qa tzqij tx'otx' lugar lu, mi jun najl tuj, mi xjal mi alumaj, che chiye. Ax tok qe cay te tnam Jerusalén ex qe tnam ate' tuj Judá minti' at kyuj, mi xjal mi alumaj najl kyuj.

11Ex che b'injtzel juntl maj qe b'itz te ninq'ij, te tzalajb'il, te mejeb'le'n ex tq'ajq'ajel kywi' xjal ok kyul tuj tja Qman tuk'il kyoyaj te aq'b'il chjonte ex in che b'itzan kyja': Kyq'onxe chjonte te Qman aju Tajaw Tkyaqil, porke b'a'n te Qman ex aju tk'ujlalil kukx at te jumajx, che chilo xjal. Axix tok che ajetz wi'ne qe xjal etzan wu'ne, aqeju o che pon q'i'n tuj juntl tnam, tu'n kyul juntl maj tuj tx'otx' lu, tu'ntzun tpon juntl maj tx'otx' ik tza'n tten nej. Aqine Dios in chin q'mante jlu.

12Chi Qman aju Tajaw Tkyaqil in tma'n kyja': Tuj tx'otx' lu, aju o kub' xitj, ex kyuj kykyaqil tnam jatum minti' xjal kyuj mi alumaj, ktzajel ch'iy juntl maj k'ul, ex qe pastor ẍne'l kpol kyi'n kyẍne'l tu'n kywa'n kyuj.

13Ex kyuj qe tnam tuj tiwitz tx'otx', kyuj qe tnam ate' t-xe witz, kyuj qe tnam ate' tuj tx'otx' Néguev, tuj kytx'otx' aj Benjamín, kyuj qe aldey ate' ti'jele tnam Jerusalén ex kyuj qe txqantl tnam te Judá, che okel ke'yin qe pastor in che ajlan kyi'j qe kyẍne'l. Aqine Dios in chin q'mante jlu.

14Chi Qman kyja': Tzul tq'ijlalil tu'n tjapun wu'ne aju yol b'a'n xi ntziyane kye aj Israel ex kye aj Judá.

15Oktzun tjapun tq'ijlalil lu, ok nb'inchaye tu'n tul itz'j jun tiyjil David tz'aqlxix, tu'n t-xi tb'incha'n kyi'j xjal tuj tumelxix tuj tnam lu.

16Tuj tq'ijlalil lu che kletel aj Judá, ex qe aj Jerusalén che anq'il tuj txub'txaj, ex atzun tb'i tnam k'okel kyq'o'n xjal kyja': Tu'n Qman in qo ok te Tz'aqlxix.

17Porke chi Qman: Kukx kjawil nsk'o'ne jun tiyjil David tu'n tokx qe' tuj q'uqb'il te kawb'il kyxol aj Israel,

18ex kukx che jawil nsk'o'ne qe pal tiyjil Leví, kykyaqil q'ij tu'n ttzaj kyq'o'n weye aju oyaj patun in kub', ex tu'n tkub' kypatun oyaj twitz awal te nimb'il te nb'iye ex tu'n ttzaj kyq'o'n txqantl chojb'il weye.

19Tzaj yolin Qman tuk'il Jeremías kyja':

20Aqine Dios kxel nma'ne jlu: Mlayx b'ant tu'n mi tjapun aju nyole o kyaj b'ant ti'j tuk'il q'ij ex tuk'il qonik'an; minti' jun maj mi'nwit jawil q'ij ex minti' jun maj mi'nwit tz'ok qonik'an.

21Ax ikx mlayx b'ant tu'n mi'n tjapun nyole kyaj b'ant ti'j tuk'il nmajene David, tu'n kukx tu'n tjaw nsk'o'ne jun tiyjil tu'n tokx qe' tuj q'uqb'il te kawb'il, ex mlayx b'ant tu'n mi'n tjapun nyole tu'n kyjaw sk'et qe pal tiyjil Leví te ajb'el weye.

22Qe tiyjil nmajene David, kyuk'ix qe pal tiyjil Leví, aqeju in che ajb'en weye, kchmetel kyb'aj wu'ne ik tza'n kyajlal che'w twitz kya'j, ex ik tza'n ttxa tz'a'n ttzi mar; mi a'l jun jaku b'ant tajlante kye.

23Tzaj yolin Qman tuk'il Jeremías ex tzaj tma'n:

24¿Na'nxpe tb'inteya aju yol in kyma'n xjal? Che chi kyja': Ma che el tik'un Qman qe aj Israel ex qe aj Judá, aqeju otoq che jaw t-sk'o'n, che chi. Kyja'tzun ma che el kyik'un qe xjal etzan wu'ne ex in kyma'n qa mya jun nasyon qe;

25pero aqine Dios kxel nma'ne jlu: Ik tza'n o kyaj b'ant ti'j nyole tuk'il q'ij ex tuk'il qonik'an, ex ik tza'n e kub' nq'o'ne qe ley twitz kya'j ex twitz tx'otx',

26ikxtzun mlay che el wik'une qe tiyjil Jacob ex qe tiyjil nmajene David. Kukx che jawil nsk'o'ne qe tiyjil tu'n kykawin kyib'aj qe tiyjil Abraham, Isaac ex Jacob, porke tzul q'aq'an nk'u'je kyi'j ex che ajetz wi'ne jatum otoq che pon q'i'n.