2 Samuel 23 - Mam Huehuetenango New Ortography

Qe mankb'il tyol David

1Atzun qe mankb'il tyol David jlu:

Ate David aju tky'ajal Isaí ex aju xinaq jaw nimsa'n tu'n Dios, aju rey jaw t-sk'o'n Tdios Jacob ex aju mejor b'itzan kyxol aj Israel, chi in tma'n kyja':

2Aju T-xew Qman in yolin wuk'ile ex aju tyol at tuj ntzi'ye.

3Aju Kydios aj Israel ma yolin; aju Kolol kyi'j aj Israel ma tma weye kyja': Aju rey in kawin kyib'aj xjal tuj tumelxix ex at tchiylal Dios te tu'n tkawin kyib'aj xjal,

4ik k'okel ik tza'n ju spik'un in jawil qoptz'aj te prim, ik tza'n t-spik'umal q'ij te jun prim minti' muj twitz kya'j, in ch'iy cha'x k'ul tu'n tik'lenxi jb'al, chi Dios ma tma weye.

5Kyja'tzun kyuw che tel qe wiyjile ti'j Dios; tu'nju o kyaj b'ant ti'j jun tyol wuk'ile te jumajx, puro nak'u'n tten ex mlay naj. Ktzajel tq'o'n ju kolb'il weye ex ktzajel tq'o'n tkyaqilju wajb'ile.

6Atzun kye kykyaqil b'inchal mya b'a'n che okel ik tza'n ch'i'x k'ul minti' tajb'en, ex mi jun jaku tzaj tzyunte te tu'n tq'ab'.

7Qa at jun xjal taj tu'n tjaw ttzyu'n, il ti'j tu'n tajb'en jun k'uxb'il tu'n ex qa jun tqan lans; k'okex q'o'n ch'i'x k'ul tuj q'aq' tu'ntzun tb'aj tz'e'y te jumajx, chi David, b'aj tma'n.

Qe t-soldad David kyuw kyk'u'j tuj q'oj

8Atzun kyb'i qe t-soldad David jlu aqeju kyuw kyk'u'j tuj q'oj: Ate Is-boset aju aj Hacmonita nejenel kye ox xinaq mas kyuwxix kyk'u'j tuj q'oj, at jun maj kub' tb'yo'n wajxaq syent xinaq tu'n tlans.

9Te tib'ajxi Is-boset, atzun Eleazar aju tky'ajal Dodo aju aj Ahohita, ex ajun tok te tajlal kyxol qe ox xinaq mas kyuwxix kyk'u'j. O ten tuk'il David tuj lugar Pasdamim tej tok kychmon kyib' aj Filisteo ma chixin tu'n kyq'ojin, ex atzun kye aj Israel otoq che el oq,

10atzunte Eleazar ax kyaj we', ex ok ten b'yol kye aj Filisteo tejxi kysikt qe tq'ab', ex minti' el ttzoqpi'n spad tuj tq'ab'. Tuj q'ij lu, tu'n Qman kub' kyi'j nimku aj q'oj. E oktzun lpe' qe soldad ti'j Eleazar o'kx tu'n tel kyi'n tkyaqil ti'xti kye aj q'oj otoq che kyim.

11Te tib'ajxi Eleazar, atzun Sama aju tky'ajal Age aju aj Ararita. Tej tok kychmon kyib' aj Filisteo tuj lugar Lehi tuj jun kojb'il awa'n tqan lentejas tuj, aqe aj Israel e je'l oq kywitz,

12atzunte Sama kub' we' tuj kojb'il ex o kolin ti'j tu'n mi'n ttzyet tx'otx' lu kyu'n aj q'oj, ex e kub' qe aj Filisteo tu'n. Kyja'tzun ok jun q'oj ma'xix kyu'n ex kub' kyi'j aj q'oj kyu'n noq tu'n Qman.

13At jun maj tuj tq'ijlalil tej tjaw chmet twitz awal, at ox kyxol qeju 30 xinaq kyuwxix kyk'u'j tuj q'oj e je'x tu'n kypon tuk'il David tuj toy' xaq Adulam. Attoq txqan soldad aj Filisteo otoq che kub' ten tuj chq'ajlaj Refaim.

14Atzunte David attoq tuj lugar te tkolb'il tib' tej kykub' ten txqan soldad aj Filisteo tuj Belén,

15ex tma David kyja': Noqwit at jun saj q'onte a' te nk'a'ye, aju tku'x tuj xoch tkub' ttzi tlamel tnam Belén.

16Kyja'tzun, aqeju ox xinaq kyuwxix kyk'u'j tuj q'oj e okx tuj campament kye aj Filisteo ex jatz kyi'n a' tuj xoch tkub' ttzi tlamel tnam Belén, ex xi kyi'n tu'n tpon tuk'il David. Ex minti' xi tk'a'n David, noq o'kx kub' tqo'n ik tza'n jun oyaj te Qman,

17ex tma: Nman, mlay txi nk'a'ne a' lu, ex mer ik tza'n aku kychk'el qe xinaq lu xi kyoyin tej ẍe'x aj lolte a', chi David. Ex minti'x xi tk'a'n.

Atzun jlu o b'ant kyu'n qeju ox xinaq kyuwxix kyk'u'j tuj q'oj.

18Ate Abisai aju terman Joab ex tal Sarvia, nejenel kye 30 xinaq kyuwxix kyk'u'j tuj q'oj. At jun maj ok tzoqpaj kyi'j ox syent xinaq, ex tu'nju tlans q'i'n e kub' tb'yo'n. Kyja'tzun el tqanil ti'j qa mas kyuw tk'u'j tuj q'oj kywitz qeju 30 xinaq,

19ex o tk'am mas nimb'il te kywitz qe txqantl ex ok te nejenel kye. Ex minti' o pon ik tza'n qeju ox te tnejel.

20Ate Benaía aju tky'ajal Joiada atzun najltoq tuj tnam Cabseel, ex ate xinaq lu kyuwxix tk'u'j tuj q'oj o tb'incha nimku b'inchb'en ma'xix kyxilen. Ate Benaía kub' b'yonte kab'e tky'ajal Ariel aju aj Moab. At jun q'ij tej tkub' nim ttxa che'w o ku'x tuj jun toy' jul, ex tujx toy' jul lu kub' tb'yo'n jun b'alun.

21Ax ikx kub' tb'yo'n jun aj Egipto ma'xix twa'l, q'i'ntoq jun lans tu'n: Ok tzoqpaj Benaía ti'j tuk'il jun tze', el ti'n ju tlans tuj tq'ab' ex kub' tb'yo'n tu'nx ju tlans.

22Tu'nju tb'inchb'en Benaía lu aju tky'ajal Joiada, el tqanil ti'j qa mas kyuw tk'u'j tuj q'oj kywitz qeju 30 xinaq kyuwxix kyk'u'j tuj q'oj;

23ex o tk'am mas nimb'il te kywitz qe txqantl, ex minti' o pon ik tza'n qeju ox te tnejel. Ex ok tq'o'n David te nejenel kyxol qeju xq'uqil te.

24Kyxol qeju 30 xinaq kyuwxix kyk'u'j tuj q'oj, atzun qe jlu ate'toq: Asael aju terman Joab; Elhanán aju tky'ajal Dodo aju aj Belén;

25Sama aju aj Harod; Elica ax aj Harod;

26Heles aju aj Paltita; Ira aju tky'ajal Iques aju aj Tecoa;

27Abiezer aju aj Anatot; Mebunai aju aj Husah;

28Salmón aju aj Ahohita; Maharai aju aj Netofa;

29Heled aju tky'ajal Baana ax aj Netofa; Itai aju tky'ajal Ribai aju aj Gabaa, aju at tuj kytx'otx' tiyjil Benjamín;

30Benaía aju aj Piratón; Hidai aju at ttzi tq'ab' xaq at tuj Gaas;

31Abi-albón aju aj Arbatita; Azmavet aju aj Bahurim;

32Eliaba aju aj Saalbonita; Jonatán jun kye qeju tky'ajal Jasén;

33Sama aju aj Ararita; Ahíam aju tky'ajal Sarar ax aj Ararita;

34Elifelet aju tky'ajal Ahasbai aju aj Maaca; Eliam aju tky'ajal Ahitofel aju aj Gilo;

35Hezrai aju aj Carmel; Paarai aju aj Arbita;

36Igal aju tky'ajal Natán aju aj Soba; Bani aju aj Gad;

37Selec aju aj Amón; Naharai aju aj Beerot, ex iqalte ju maqb'il in ajb'en te Joab aju tal Sarvia;

38Ira aju aj Jatir; Gareb ax aj Jatir;

39ex tuk'ix Urías aju aj Heteo. Japun jun tajlal te 37 tu'n tkyaqilx.