1Attoq jun xinaq Naamán tb'i, nejenel kye t-soldad rey kye aj Siria. Aju xjal lu ma'xix toklen tuj twitz rey ex k'ujla'nxix tu'n, porke ate Qman otoq tzaj onin te tu'n tkub' kyi'j qe aj q'oj kyi'j aj Siria tu'n. Aju xinaq lu kyuw tk'u'j tuj q'oj, ex yab'toq tu'n jun wiq tx'a'k minti' q'anb'il ti'j.
2At jun k'loj soldad kye aj Siria, tej kyxi aj q'ojlel kyi'j aj Israel, tzaj kytzyu'n jun tal txin, ex ok te tmajen t-xu'jil Naamán.
3Aju tal txin lu xi tma'n te t-xu'jil Naamán:
—Noqwit b'a'n t-xi' npatrone tuk'il t-sanjel Dios at tuj Samaria, jaku b'anix tx'a'k ti'j.
4Xi'tzun Naamán tuk'il rey ex xi ttx'olb'a'n aju otoq tma tal txin.
5Atzunte rey kye aj Siria xi ttzaq'we'n:
—B'a'n t-xi'ya, ex jaku txi nsama'ne jun u'j te kyrey aj Israel.
Xi'tzun Naamán; xi ti'n wuq quintal tuk' 50 libr saq pwaq, ex jun quintal tuk' 50 libr q'an pwaq, tuk'ix laj paq xb'alun,
6ex xi ti'n aju u'j te rey kye aj Israel, ex chi in tma'n tuj u'j: Aju til u'j lu tu'n tel tnik'a ti'j qa aqine ma chinx samante Naamán. Aju xjal lu ajun kyxol qeju at kyoklen ntxlaje, ex waje tu'n tb'anix tu'na te jun wiq tx'a'k minti' q'anb'il ti'j.
7Tejtzun tjaw t-sch'i'n rey kye aj Israel aju u'j, el t-sb'it'un t-xb'alun te jun techal ti'j tb'is, ex tma:
—¿Baqa Dios qine, tu'n tel wi'ne tchwinqlal jun xjal, ex qa tu'n tjaw anq'in wu'ne, tu'nju ma tzaj sama'n jun xinaq wuk'ile tu'n tok nq'anine ex tu'n tb'anix tx'a'k ti'j wu'ne? Tz'elx kynik'e ti'j, aju xjal lu in jyon tumel tza'n tten tu'n tul q'ojlel wi'je, chi rey.
8Tej tb'inte Eliseo aju t-sanjel Dios qa otoq tz'el t-sb'it'un rey t-xb'alun ti'j, tu'n tlaj u'j otoq pon sama'n tuk'il, xi t-sama'n jun tqanil te rey kyja': ¿Tiqu'n ma tz'el t-sb'it'un t-xb'aluna ti'ja? E ttzaj ju xinaq lu wuk'ile, ex k'elel tnik' ti'j qa at jun t-sanjel Dios kyxol aj Israel.
9Xi'tzun Naamán tuk'ix tcarwaj ex qe tchej, ex ax kub' we' ttzi tja Eliseo.
10Atzunte Eliseo xi t-sama'n jun t-sanjel tu'n t-xi tma'n te Naamán kyja': Txi'ya, ex tx'jon b'aj tib'a wuq maj tuj nima Jordán, ex aju t-ximlala kb'anixel.
11Tzaj ttx'u'jil Naamán, ik'tzun ex tma:
—Qape k'eletz ju xjal yolil wuk'ile, nchiwe, ex qape kb'el we' tu'n tkub'san wi'je twitz Tdios, ex tu'n tb'aj tmako'n ju ntx'a'ke, ex tejwitlo xb'ant ikju, mawtlo chin b'anixe.
12Mas b'a'n qe nima Abana ex Farfar, aqeju ate' tuj Damasco, kywitz kykyaqil nima at tuj kytx'otx' aj Israel. ¿Myapetzun mas b'a'n awt ẍinxe tx'jol wib'e kyuj qe nima lu tu'n nb'anixe? Chi Naamán.
In q'ojl wen tej tik' tuj lugar lu.
13Ex e pon laq'e' qe tmajen ttxlaj ex xi kyma'n te:
—Tat, noqwit mas kyuwxix jun tumel saj q'ma'n teya tu'n t-sanjel Dios tu'n tb'inchanteya, mawtlo b'ant tu'na. Yajtzun te jlu aju ma tma teya, noq ch'in t-xilen, tu'n ttx'jonte tib'a tuj a' ex b'i'x kb'anixela, che chi majen.
14Xi'tzun Naamán, ex ku'x tlamon tib' wuq maj tuj nima Jordán ik tza'nx otoq tzaj q'ma'n te tu'n t-sanjel Dios, ex aju t-ximlal ik ok ik tza'n t-ximlal jun tal k'wa'l, ex b'i'x b'anix.
15Ate Naamán kyuk'ix kykyaqil xjal uk'in tu'n e je'x tu'n kypon tuk'il Eliseo. Tejtzun kypon tuk'il, xi tma'n Naamán te:
—Ja'lo ma tz'el nnik'e ti'j, tuj tkyaqil twitz tx'otx' minti' juntl Dios at aju axix tok Dios; noq o'kx aju Kydios aj Israel. Kyja'tzun in chin kub'sane twitza tu'n t-xi tk'mo'na jun oyaj wu'ne, aqine ajb'el teya, chi Naamán.
16Atzunte Eliseo xi ttzaq'we'n:
—Kxel nma'ne jun yol axix tok twitz Qman aju in chin ajb'ene te, mlay tzaj nk'mone toyaja.
Maske ela' maj xi tma'n Naamán, ex minti' kub' tuj twitz Eliseo tu'n t-xi tk'mo'n.
17Xitzun tma'n Naamán te:
—Qa ikju, q'ontzniya amb'il weye tu'n t-xi wi'ne kab'e chej kytx'otx' aj Israel, ex mlay kub' npatune qe alumaj ex mlay txi nq'o'ne chojb'il te junxitl dios, noq o'kx te Qman.
18Noq o'kx in chin kub'sane twitz Qman tu'n tkub' tnajsa'n wile ok t-xi' rey aju npatrone tuj tja dios Rimón tb'i tu'n tk'ulun twitz, tzul-lo tzyu'n nq'ab'e tu'n ex oklo chin b'el ẍmeje'ye tuk'il tuj tja tdios; kuchiwt kub' tnajsa'n Qman wile tu'n tlaj jlu, chi Naamán.
19Atzunte Eliseo xi ttzaq'we'n te:
—Q'onku b'eya, mi'n b'isuna.
Kub'tzun b'e tu'n Naamán.
20Tej otoq txi laq'e' ch'in, ate Giezi tmajen Eliseo aju t-sanjel Dios kub' t-ximan: Noq kukx ma tz'aj Naamán aju aj Siria tu'n npatrone, ex minti' ma kyaj ti'n aju oyaj sul ti'n. Kxel nma'ne jun yol axix tok twitz Qman, chin xel qelane tu'n tpon knet wu'ne, qape jaku tzaj tq'o'n jun oyaj weye.
21Xitzun lpe' Giezi ti'j Naamán tu'n tpon knet tu'n; tejtzun tajtz tke'yin Naamán lepchix t-xi' Giezi ti'j, ku'tz naj tuj tcarwaj tu'n tk'monte, ex xi tqanin te:
—¿Ti ma b'aj?
22—Mi'n, minti' jun ti'xti ma b'aj, chi Giezi xi ttzaq'we'n, ex ma chin tzaj sama'ne tu'n npatrone tu'n t-xi nma'ne teya at kab'e ku'xun t-sanjel Dios ma ẍe ul ja'lo, ex ma ẍe tzaj tuj tiwitz tx'otx' kye aj Efraín, kyja'tzun in chin kub'sane twitza tu'n ttzaj tq'o'na ox mil saq pwaq tuk'ix kab'e paq xb'alun, chi Giezi.
23Atzunte Naamán xi ttzaq'we'n:
—B'inchama xtalb'il, q'inxa qaq mil saq pwaq.
Nimxix o kub'san Naamán twitz Giezi tu'n t-xi tk'mo'n, ex ku'x tq'o'n tuj kab'e sak junx tuk'il kab'e paq xb'alun, ex xi tq'o'n kye kab'e tmajen tu'n t-xi kyi'n ex tu'n kykub' nej twitz Giezi.
24Tejtzun kypon twi' tal witz, xitzun tk'mo'n Giezi aju saq pwaq tuj kyq'ab' qe tmajen Naamán, okx tk'u'n tuj tja, ex b'aj tq'olb'en tib' kyuk'il.
25Pontzun Giezi tuk'il Eliseo aju tpatrón, atzunte Eliseo xi tqanin te:
—¿Jatum ma txi aja, Giezi?
—Baqa at jatum ma chinx aje, chi Giezi xi ttzaq'we'n.
26Ex xi tma'ntl Eliseo te:
—Ma tz'el nnik'e ti'j, at jun xinaq xku'tz tuj tcarwaj tu'n tk'monjtza tu'n. Baqa a tq'ijlalil jlu tu'n ttzaj k'met pwaq ex xb'alun, ex baqa a tq'ijlalil jlu tu'n tlaq'et tqan awal ex qa tqan uva, ex qa ẍne'l ex qa wakẍ, ex qa majen xinaq ex qa majen xu'j.
27Kyja'tzun, aju tx'a'k toktoq ti'j Naamán nej, kjawil jlet ti'ja, ax ikx kyi'j qe tiyjila te jumajx, chi Eliseo.
Tejtzun tel tpa'n tib' Giezi ti'j Eliseo, aju t-ximlal otoq noj ti'j tu'n tx'a'k saq ke'yin ik tza'n ttxa che'w.
Who We AreWhat We EelieveWhat We Do
2025 by iamachristian.org,Inc All rights reserved.
