Proverbios 12 - Mam Huehuetenango New Ortography

1Aju xjal in tzalaj ok tkub' kawin, nab'l in tk'ujla'n, atzunju xjal tk'i' tu'n tkub' kawin, minti' tnab'l.

2Aju xjal b'a'n tmod in tk'mo'n t-xtalb'il Qman, atzunju xjal mya b'a'n t-ximb'etz, tkub' t-sentens tu'n.

3Minti' kyuwsab'l te xjal tu'nju mya b'a'n in b'ant tu'n, atzun qe xjal tz'aqlxix kyuw kyten ik tza'n jun tze' nim tlok'.

4Aju xu'j b'a'n tmod, jun tzalajb'il jlu te tchmil, atzunju xu'j mya b'a'n, b'i'x in naj tchmil tu'n.

5Qe xjal tz'aqlxix o'kx tok kyximb'etz ti'j ju tz'aqlxix; atzun qe xjal b'inchal mya b'a'n o'kx in che ximan tu'n kysb'un.

6Qe kyyol xjal b'inchal mya b'a'n, jun k'ob'il jlu tu'n kynaj xjal tu'n; atzun kyyol qe xjal tz'aqlxix, in che klet xjal tu'n.

7Qe xjal b'inchal mya b'a'n che b'el tz'aq ex b'i'x che najel, atzun qe kyiyjil xjal tz'aqlxix kukx che kyjel ten te jumajx.

8In jaw nimsa'n xjal ik tza'nxju tojtzqib'l at, atzun teju minti' tnab'l noq o'kx nne'l ik'un.

9Mas b'a'n tu'n qok q'o'n te ch'in qoklen ex at jun ajb'el qe, twitzju tu'n qjaw nimsa'n ex minti' qwa.

10Aju xjal tz'aqlxix in che ok tkwentin qe talun, atzunju xjal b'inchal mya b'a'n minti' in tz'e'y tk'u'j kyi'j talun.

11Aju xjal in aq'nan twitz tx'otx' at nim twa; atzunju minti' tnab'l o'kx in xi tq'on tib' tu'n tb'inchante aju minti' tajb'en.

12Aju xjal b'inchal mya b'a'n in tzyet tu'nx ju mya b'a'n in pon tk'u'j ti'j; ex atzun qe xjal tz'aqlxix kyuw kyten ik tza'n jun tze' nim tlok'.

13Aju xjal b'inchal mya b'a'n in b'aj t-sakun tib' tujx ju yol in xi tnik'an, atzunju xjal tz'aqlxix b'a'n nne'x tuj ju yajb'il te.

14Tu'nju yol b'a'n in yolin xjal ti'j in tk'mo'n nim b'a'n, ex in tk'mo'n chojb'il ti'j tb'inchb'en.

15Aju xjal minti' tnab'l, tuj twitz qa b'a'n tkyaqilju in tb'incha'n, atzunju xjal at tnab'l in xi tniman qe consej.

16Aju xjal minti' tnab'l jurat in tzaj tq'oj; atzunju xjal at tnab'l minti' nno'k tq'o'n tkwent ti'j ju mya b'a'n in b'inchanjtz ti'j.

17Aju testiw axix tok tyol in tchik'b'a'n ju ax tok; atzunju testiw nik'al yol in tkyuwsa'n aju mya ax tok.

18At xjal in k'ixb'isan ti'j juntl kyu'n qe tyol, atzun kyyol qe xjal at kynab'l nno'k te q'anb'il kye txqantl.

19Aju xjal in yolin ax tok kukx ktel te jumajx, atzunju xjal nik'al yol mya nim q'ij ktel.

20At sb'ub'l tuj tanmi xjal in ximan ti'j tu'n tb'inchante mya b'a'n ti'j juntl, ex at tzalajb'il kye xjal nno'k tilil kyu'n tu'n kyten xjal tuj tzalajb'il.

21Aju xjal tz'aqlxix mlay tzaj jun mya b'a'n ti'j, atzunte xjal b'inchal mya b'a'n ktzajel nim mya b'a'n ti'j.

22Ik'un tu'n Qman qe xjal nik'al yol, ex in tzalaj kyi'j qeju in che yolin axix tok.

23Aju xjal at tnab'l minti' in b'aj tyolin qa at tojtzqib'l, atzunju xjal minti' tnab'l, tu'nx tyol in tyek'un qa minti' b'a'n tu'n.

24Aju xjal puro sek' ti'j taq'un k'okel te nejenel kye txqantl; atzunju xjal ky'aj kukx kyjel tjaq' tkawb'il juntl.

25Tu'n tlaj b'is, b'i'x in tzaj b'aj tk'u'j xjal; ex tu'nju yol b'a'nxix, in jaw tzalaj.

26Aju xjal tz'aqlxix in ajb'en tu'n t-xi t-ẍaqlun tuk'il, atzun qe xjal b'inchal mya b'a'n in che el tzpet ti'j b'e.

27Aju xjal b'a'n kamb'an ex qa ky'aj, mlay tzyet tkanb', atzunju xjal sek' tnab'l, knetel nim tq'inumab'l.

28Aju kyb'e qe xjal tz'aqlxix atzun in pon tuj chwinqlal, ex minti' kamik tuj kyb'e.