1Tej otoq tz'elxi nim tyemp tej t-xi tq'o'n Qman ojlab'l kye aj Israel kywitz qe aj q'oj ate' kyi'jele ex ate Josué otoq tijin wen,
2e tzaj ttxko'n Josué kykyaqil aj Israel, kyuk'ix qe kytijil xjal, kyuk'ix qe nejenel, kyuk'ix qe jwes ex kyuk'ix qe xjal ma' kyoklen, ex xi tma'n kye kyja':
—Weye ma chin tijine ex ma tz'el nim ab'q'i wu'ne.
3Ma kyile tkyaqilju ma tb'incha Qman kyi'j kykyaqil tnam aqeju jaw kyi'n kyib' kyi'je, ex ate Qman ma tz'onin kyi'je tuj q'oj.
4Tu'n swert ma kub' nsipane tkyaqil tx'otx' lu kyxol kykyaqil k'loj kyiyjile. Ma kub' nsipane aju tx'otx' ma tzyet, tuk'ix ju tx'otx' na'nx ttzyet, xi'ynix ttzi nima Jordán tuj tjawitz q'ij ex ponin b'aj max ttzi Nintz mar tuj telex q'ij.
5Che elex tlajo'n Qman kykyaqil qeju najl tuj tx'otx' lu; atzun kyeye che etzale ti'j ik tza'nx o tzaj ttziyan Qman Dios.
6Kyq'onke tilil tu'n tjapun kyu'ne tkyaqil aju in tma'n tuj libro te tley Moisés, ex mi'n tz'el kypa'n kyib'e ti'j ju in tma'n.
7Mi'n b'aj kysmon kyib'e kyuk'il qe xjal te txqantl nasyon ate' kyxole. Mi'n che k'ulune kywitz qe kydios ex mi'n che ajb'ene kye; mi'lpe tzaj kyna'ne kyb'i qe kydios, ex mi'n tz'ajb'en kyb'i kyu'ne te kyuwsab'l jun yol.
8Kukx che lpeke ti'j Qman Dios, ik tza'nx in b'ant kyu'ne ja'lo.
9Kywitze ma che ex tlajo'n Qman qe nasyon matij ex nimxix kyipun, ax ikx ja'lo mi jun in kub' twab'an tib' kywitze.
10Noq tu'n junx xinaq kyxole jaku tz'el oq jun mil xinaq, porke ate Qman in onin kyeye tuj q'oj ik tza'nx o tzaj ttziyan.
11Ten nim kykwente kyi'je tu'n kyk'ujlanteye Qman Dios.
12Ex qa ma tz'el kypa'n kyib'e ti'j Dios, ex qa ma b'aj kysmon kyib'e kyuk'il qe xjal ma che kyaj ten kyxole, ex qa ma che jaw moje'ye kyuk'il qe xu'j ate' kyxol qe xjal lu,
13axix tok mlay che ex tlajo'n Qman qe xjal lu kyxole, noq o'kx che kyjel tq'o'n ik tza'n jun k'ob'il ex ik tza'n jun tramp tu'n kykub' tz'aqe tuj, ex ik tza'n jun asyal tu'n t-xi jato'n ttzal kyi'je, ex ik tza'n jun ch'i'x tuj tb'aq' kywitze okxi kyb'aj naje twitz ju tx'otx' tb'anilxix aju ma txi q'o'n kyeye tu'n Qman Dios.
14Weye ya ch'ix nkyime, ex wajb'ile tu'n telxix kynik'e ti'j tu'n tkyaqil kyanmiye ex tu'n tkyaqil kyk'u'je ax tok ma japun tu'n Qman tkyaqilju b'a'n o tzaj ttziyan. Minti' jun yol aju o tzaj ttziyan miwt ma japun tu'n.
15Ex ik tza'nx ma japun tkyaqilju b'a'n tu'n Qman, aju o tzaj ttziyan, ax ikxtzun ktzajel ti'n tkyaqil txkaj mya b'a'n kyib'aje, okxi kyb'aj naje twitz tx'otx' tb'anilxix, aju ma txi tq'o'n kyeye,
16qa mi'n ma japun kyu'ne aju yol ma kyaj b'ant ti'j tu'n Qman kyuk'ile. Ex qa ma che'xe k'ulul kywitz junxitl dios, ex qa ma che kub' ẍmeje'ye kywitz, ktzajel tq'oj Qman kyi'je, ex jurattzun che najele tu'n twitz tx'otx' tb'anilxix aju ma txi tq'o'n kyeye, chi Josué.
Who We AreWhat We EelieveWhat We Do
2025 by iamachristian.org,Inc All rights reserved.
