1 Samuel 23 - Mam Huehuetenango New Ortography

E klet qe xjal tuj tnam Keila tu'n David

1At jun q'ij e ok tzoqpaj aj Filisteo ti'j tnam Keila, ex xi kyelq'a'n aju triw k'itzqetoq b'aj xupet tuj. Tejtzun tb'inte David jlu,

2xi tqanin te Qman ex tma:

—¿B'a'npe tu'n nxi'ye q'ojlel kyi'j aj Filisteo?

Atzunte Qman tzaj ttzaq'we'n:

—B'a'n tu'n t-xi'ya porke kb'el kyi'j tu'na tu'n kyklet qe xjal ate' tuj tnam Keila.

3Ex qe xinaq ate' tuk'il David xi kyma'n te:

—Noqpe in qo xob' tzalu tuj Judá, pyortzun qa ma qo'x tuj Keila q'ojlel kyi'j qe soldad aj Filisteo.

4Xitzun tqanintl David juntl maj te Qman, atzunte Qman tzaj ttzaq'we'n:

—Q'onkuya b'e ex txi'ya tuj tnam Keila, ok che xel nq'o'ne aj Filisteo tuj tq'ab'a tu'n tkub' kyi'j tu'na.

5Xi'tzun David kyuk'ix qe xinaq ate' tuk'il, tu'n kypon tuj tnam Keila; atzun e ok tzoqpaj kyi'j aj Filisteo ex kub' kyi'j kyu'n, ex e ok te kyajwil qe alumaj. Kyja'tzun tten e klet qe xjal ate' tuj tnam Keila tu'n David.

6Tuk'ixtoq Abiatar aju tky'ajal Ahimelec otoq pon oq tuk'il David tuj Keila, ex q'i'n jun tkapiẍay pal tu'n.

7Tej t-xi q'ma'n te Saúl qa atoq ta' David tuj tnam Keila, kub' t-ximan kyja': Ax Dios ma tzaj q'onte te tuj nq'ab'e tu'n tkub' ti'j wu'ne, ex tu'nx ma tz'okx tq'on tib' tuj jun tnam at tlamel ex at pasador ti'j, chi Saúl.

8Te tib'ajxi e tzaj ttxko'n Saúl kykyaqil qe t-soldad tu'n kyxi' tuj tnam Keila, ex tu'n tb'aj kytxolb'an kyib' ti'jele tnam tu'ntzun ttzyet David kyu'n kyuk'ix qe xinaq ate' tuk'il.

9Ex tej tb'inte David qa kyja'toq tok tzoqpaj Saúl ti'j, xi tma'n te pal Abiatar tu'n ttzaj ti'n aju kapiẍay in ajb'en kyu'n pal, tu'ntzun tok ten qanilte te Qman alkye tu'n tb'ant tu'n.

10Tmatzun David:

—Aya Qman Dios aju Kydios aj Israel, aqine tmajena, b'a'n wu'ne taj Saúl tu'n ttzaj tzalu tuj Keila tu'n tb'aj t-xitun tnam noq tu'n nlaje.

11¿Axpe tok tzul Saúl jyolte weye ik tza'n o nb'iye? ¿Chin xelpe q'o'ne kyu'n qe xjal aj Keila tuj tq'ab'? Aya Qman Dios aju Kydios aj Israel, in chin kub'sane twitza tu'n ttzaj tma'na weye, aqine tmajena.

Atzunte Qman tzaj ttzaq'we'n:

—Ax tok tzul Saúl.

12Xitzun tqanin David:

—¿Qo xelpe q'o'ne tuj tq'ab' Saúl kyu'n qe xjal tuj Keila, aqine kyuk'ix qe xinaq ate' wuk'ile?

Atzunte Qman tzaj ttzaq'we'n:

—Che xel q'o'ne kyu'n tuj tq'ab' Saúl.

13Ik'tzun David tuj tnam Keila kyuk'ix qe xinaq ate' tuk'il, b'alo at qaq syent kyb'aj, ex noq in che b'etje' kyuj qe lugar. Tejtzun tb'inte Saúl qa otoq tzik' oq David tuj tnam Keila, ya minti' xi' jyolte te.

Pon David tuj jun lugar minti' kynajb'il xjal tuj

14Axtzun kyaj ten David najal tuj junjun lugar te tkolb'il tib' kywi witz tuj Zif tuj lugar minti' kynajb'il xjal tuj, ex maske tkyaqil q'ij in jyontoq Saúl ti'j David, minti' taq' Dios amb'il tu'n tknet tu'n.

15Tejtzun tel tnik' David ti'j qa otoq tz'etz Saúl jyolte te tu'n tkub' tb'yo'n, ax kyaj ten tuj lugar Hores tuj Zif, tuj lugar minti' kynajb'il xjal tuj.

16At jun q'ij xi' Jonatán aju tky'ajal Saúl ke'yilte David tuj lugar Hores, tu'n t-xi tkyuwsa'n te tu'n o'kx tu'n tok qe' tk'u'j ti'j Dios.

17Ex xi tma'n te:

—Mi'n xob'a, ex mlay kneta tu'n nmane Saúl. Kpol jun q'ij aya k'okel te rey kyxol aj Israel, atzun weye chin okele te jun xjal mas ma' toklen ttxlaja. A jlu ya b'a'n tu'n nmane.

18Kyajtzun b'ant ti'j jun kyyol kykab'il, ex a Dios ok kyq'o'n te testiw ti'j kyyol. Te tib'ajxi ajtz meltz'aj Jonatán, atzunte David ax kyaj ten tuj lugar Hores.

19Ex qe xjal najl tuj tnam Zif e je'x tuj tnam Gabaa q'malte te Saúl:

—Lu David in ewan tuj qtx'otx'e, tuj junjun lugar te tkolb'il tib' at twi witz Haquila tuj lugar Hores, aju tkub' tuj tnayaj q'ij tuj lugar minti' kynajb'il xjal tuj.

20Kyja'tzun, qa taja Tat Rey, b'a'n tu'n t-xi'ya, ex jaku txi qq'o'ne tuj tq'ab'a.

21Atzunte Saúl tzaj ttzaq'we'n:

—Awt Dios ky'iwlante kyeye, tu'nju ma tzaj q'aq'an kyk'u'je wi'je.

22Ja'lo chin kub'sale kyeye tu'n kyxi'ye jyolte te jatum ta' ex jatum in tewan tib', ex alkye o lonte te ma chixin, ex b'i'n wu'ne jawni twitz tu'n t-sb'un.

23Cheb'a kyke'yinxe kykyaqil lugar jatum nno'kx tewan tib', ex kyajtz meltz'aje wuk'ile q'malte jun tqanil cabalxix tu'ntzun nxi'ye kyuk'ile. Qatzun ax tok max ta' tuj kytx'otx'e, kxel njyo'ne kyxol kykyaqil tiyjil Judá, chi Saúl.

24E ajtzun meltz'aj qe aj Zif tu'n kypon tuj kytanmi, ex te tib'ajxi xi lpe' Saúl kyi'j. Atzunte David kyuk'ix qe xinaq tuk'il otoq che pon tuj lugar Maón tb'i, aju lugar minti' kynajb'il xjal tuj, aju tkub' tuj chq'ajlaj tuj tnayaj q'ij te tzqij tx'otx'.

25Atzunte Saúl kyuk'ix txqantl xjal tuk'il kub' b'e kyu'n tu'n tjyet David kyu'n. Tej tpon tqanil tuk'il David ti'j jlu, ku'x naj kyxol qe nmaq pik kykub' tuj lugar Maón tb'i, aju lugar minti' kynajb'il xjal tuj. Tejtzun tb'inte Saúl, xi' tuj lugar Maón tu'n tok lpe' ti'j David tu'n tkub' tb'yo'n.

26Ate Saúl kyuk'ix qe xinaq ate' tuk'il in che b'ettoq ti'j jun pak' witz, atzunte David ex qe tuk'il ti'j juntl pak' witz in che qelan wen tu'n kyel oq twitz Saúl. Tej otoq b'aj kytxolb'an kyib' qe t-soldad Saúl ti'j David ex kyi'j qeju ate'toq tuk'il, ex ch'ixtoq kytzyet kyu'n,

27pon jun xjal q'olte jun tqanil tuk'il Saúl ex tma:

—Jurat naj taj meltz'aja Tat Rey, porke ma che okx aj Filisteo q'ojlel tuj qtx'otx'.

28Xitzun tkolin Saúl tu'n tok lpe' ti'j David, ex xi' tu'n tok tzoqpaj kyi'j aj Filisteo. Kyja'tzun aju lugar lu ok tb'i: Aju matij pik jatum o tzoqpaj.

29Tb'ajlenxitzun jlu xi' David najal tuj lugar te tkolb'il tib' tuj lugar En-gadi.