Jueces 4 - Mam Huehuetenango New Ortography

Kub' ti'j Sísara tu'n Débora ex tu'n Barac

1Tkyimlenxitzun Aod, e ok ten aj Israel juntl maj b'inchal mya b'a'n twitz Qman.

2Kyja'tzun tten e je'x tq'o'n Qman qe aj Israel tuj tq'ab' Jabín tu'n tkawin kyib'aj. Ate Jabín jun rey kye aj Canaán in kawintoq tuj tnam Hazor. Aju nejenel kye t-soldad, Sísara tb'i, ex atzun najl tuj tnam Haroset-goím.

3Ate Jabín attoq b'elaj syent tcarwaj k'uxb'il qe, ex tuj winqin ab'q'i e yajlanjtz aj Israel tu'n kyuwxix wen. Maxitzun e ok ten aj Israel kub'sal kywitz te Qman tu'n kytzaj onin tu'n.

4Tuj tq'ijlalil lu, toktoq Débora aju t-sanjel Dios ex t-xu'jil Lapidot te kawil kyxol aj Israel.

5Atzun in kub' qe' Débora tjaq' jun wi' tqan xa'j aju tok tb'i tqan xa'j te Débora, ex atzun in che pon aj Israel b'inchalte ti'j kyxtis tuk'il. Aju lugar lu atzun ta' kyxol tnam Ramá tuk'il tnam Betel, tuj tiwitz tx'otx' kye aj Efraín.

6At jun q'ij xi txokb'aj Barac aju tky'ajal Abinoam tu'n Débora. Ate Barac najltoq tuj tnam Cedes kyxol tiyjil Neftalí, ex xi tma'n Débora te Barac kyja':

—Ate Qman aju Kydios aj Israel in tma'n teya tu'n tb'aj tchmo'na laj mil xinaq kyxol tiyjil Neftalí ex kyxol tiyjil Zabulón, ex kyxi'tzune twi witz Tabor.

7Wu'ne ktzajel wi'ne Sísara aju nejenel kye t-soldad Jabín, tu'n tul tuj tq'ab' xaq Cisón, kyuk'ix qe tcarwaj ex qe t-soldad, tu'ntzun tok tzoqpaj q'ojlel ti'ja. Ex che tzajel nq'o'ne tuj tq'ab'a tu'n tkub' kyi'j tu'na, chi Dios teya, chi Débora.

8—Jaku chinxe pero qa ma txi'ya wuk'ile, ex qatzun mi ma txi'ya, ax mlay chinxe, chi Barac xi ttzaq'we'n.

9—Jacna chinxe tuk'ila, pero ok tkub' kyi'j aj q'oj tu'na mya teya kxel q'o'n nimb'il, porke tuj tq'ab' jun xu'j tzul q'o'n Sísara tu'n Qman tu'n tkub' ti'j, chi Débora, xi ttzaq'we'n.

Xi'tzun Débora tuk'il Barac tuj tnam Cedes.

10E tzajtzun ttxko'n Barac qe tiyjil Zabulón kyuk'ix qe tiyjil Neftalí tuj tnam Cedes, ex b'aj tchmo'n laj mil xinaq tu'n kyxi' q'ojlel tuk'il; ex tuk'ix Débora xi' kyuk'il.

11At jun xinaq aj Quenita Heber tb'i, otoq tz'el tpa'n tib' kyi'j txqantl aj Quenita aqeju tiyjil Hobab aju tji' Moisés. Atzun tkub'sa'ntoq tja, xb'alun ja, niqayin ttxlaj tnam Cedes, ttxlaj tqan k'ol tuj lugar Zaanaim tb'i.

12Tejtzun tb'inte Sísara qa otoq jax Barac aju tky'ajal Abinoam twi witz Tabor,

13b'ajtzun tchmo'n b'elaj syent tcarwaj k'uxb'il kyuk'ix kykyaqil qe t-soldad, ex tzyet b'e kyu'n tuj Haroset-goím tu'n kypon max tuj tq'ab' xaq Cisón.

14Xitzun tma'n Débora te Barac kyja':

—Chux txi'ya, porke ma pon or tu'n ttzaj q'o'n Sísara tuj tq'ab'a tu'n Qman, tu'n tkub' ti'j tu'na, ex ya ma kub' nej Qman twitza.

Ku'tztzun Barac twi witz Tabor kyuk'ix laj mil t-soldad lepcho'k ti'j.

15Tejtzun ttzyet tq'ojin Barac kyi'j, e b'aj sek'paj qe t-soldad Sísara tu'n Qman ex e b'je'l sputj kykyaqil kyuk'ix qe kycarwaj; ax ikx te Sísara ku'tz tuj tcarwaj ex el oq.

16Atzunte Barac kyuk'ix qe t-soldad e ok lpe' kyi'j qe t-soldad Sísara ex kyi'j qe kycarwaj, tu'n kyq'ojin kyi'j, tejxi kypon tuj tnam Haroset-goím. Tuj q'ij lu mi jun t-soldad Sísara kyaj anq'in, kykyaqil e b'aj kyim.

17Atzunte Sísara el oq tu'n tpon tklon tib' max tja Jael aju t-xu'jil Heber aju aj Quenita, porke b'a'ntoq kyten Jabín aju rey te Hazor kyuk'il qeju ate' tuj tja Heber.

18Etztzun Jael kanul ti'j Sísara ex xi tma'n te:

—Tzaja tzalu, tat, tzaja wuk'ile; mi'n xob'a.

Okxtzun Sísara tuja ex kub' tq'o'n Jael jun xb'alun tib'aj.

19Xitzun tqanin Sísara ch'in tk'a' a' te Jael porke attoq nim txqetle'n ti'j; atzunte Jael jaw tjaqo'n ttzi bols tz'u'm jatum k'u'n lech, ex xi tq'o'n te tk'a'; te tib'ajxi kyaj muq'an juntl maj Sísara tu'n.

20Xitzun tma'n Sísara te Jael:

—We'kuya ttzi ja xb'alun, ex qa at jun xjal ma tzul ex qa ma tzaj tqanin teya ¿qape at jun xjal at tzalu?, qa chi: Minti', chikuya.

21Ex otoq sikt Sísara wen, kyja'tzun, b'i'x tzyet tk'u'j tu'n watl. Atzunte Jael tzaj ti'n jun pajb'il, tuk'ix jun piẍ tze' aju in ajb'en te stak tu'n ttzaj qitz'et ttxa'n xb'alun ja ti'j, cheb'atzun pon laq'e' xu'j ttxlaj Sísara, ex aq'pontzun tpajo'n stak t-xe t-ẍkyin ex b'i'x ku'pun twitz tx'otx'. Kyja'tzun tten kyim Sísara.

22Tej in jyontoq Barac ti'j Sísara, etz naj Jael kanul ti'j ex xi tma'n te:

—Tzaja tzalu ex kxel nyek'une teya aju xinaq in jyona ti'j.

Okxtzun Barac tuj ja xb'alun, ex knet Sísara tu'n palch twitz tx'otx', ya otoq kyim, tuk'ix stak xi'yni pajo'n t-xe t-ẍkyin.

23Kyja'tzun tten kub' ti'j Jabín aju rey kye aj Canaán kyu'n aj Israel tuj q'ij lu, noq tu'n tipumal Qman.

24Ex kukx e q'ojin aj Israel ti'j rey Jabín, ex teyle junjun maj mas kyuw e q'ojin ti'j tejxi tnaj kyu'n, kyuk'ix qe t-soldad.