1Kyimtzun Samuel ex kykyaqil aj Israel ok kychmon kyib' tu'n kyoq' ti'j tkyimlen. Ax ku'x kymaqu'n tuj ttanmi, tuj tnam Ramá. Te tib'ajxi xi' David tuj lugar Parán, aju lugar minti' kynajb'il xjal tuj.
David ex aju xu'j Abigail2Attoq jun xinaq najl tuj lugar Maón, puro q'inun, attoq ox mil t-ẍne'l ex jun mil tchip. Aju tq'inumab'l atzun ta'toq tuj lugar Carmel, ex otoq pon tu'n tel kytzmal qe t-ẍne'l.
3Aju xinaq lu Nabal tb'i, atzun tzajni jlet tiyjil ti'j Caleb. Puro tx'u'j twi Nabal ex mya b'a'n tmod, atzunte Abigail aju t-xu'jil, puro b'a'n ke'yin ex at tnab'l.
4Maxtoq ta' David tuj lugar minti' kynajb'il xjal tuj tej tb'inte qa otoq pon Nabal tuj lugar Carmel tu'n tel kytzmal qe t-ẍne'l,
5xitzun t-sama'n David laj ku'xun ex xi tma'n kye tu'n t-xi kyq'o'n jun q'olb'eb'l te Nabal,
6ex tu'n t-xi kyma'n te aju yol lu: Kuchiwt b'a'n ta'ya kyuk'ix qeju ate' tuj tjaya ex qe txqantl xjal ate' ttxlaja.
7Ma nb'iye in matzona kytzmal qe t-ẍne'la. B'a'n tu'na a ate' qe tpastora tzalu quk'ile tuj Carmel, ex atxix tej kyul, b'ajx qo ok tene b'inchal jun mya b'a'n kyi'j ex b'ajx tz'el q'i'n jun ti'xti kye.
8B'a'n tu'n t-xi tqanina jlu kye qe tmajena ex tzul kyma'n teya qa ax tok. Kyja'tzun in chin kub'sane teya tu'n kytzaj t-xtalina qe ku'xun lu, porke ma che pon tuj jun q'ij te tzalajb'il, ex tu'n ttzaj tq'o'na kye noq alkye at tuk'ila tu'n tajb'en te kye ex te weye, aqine ik tza'n jun tk'wa'la, che chikuye, chi David.
9E je'xtzun t-sama'n David qe ku'xun tuk'il Nabal ex xi kyma'n tkyaqil jlu te. Ex ax e kub' ten ayol ti'j ju ttzaq'web'l.
10Atzunte Nabal xi ttzaq'we'n:
—¿Alkye nno'k David? ¿Alkyeju tky'ajal Isaí? Tuj tq'ijlalil ja'lo nim majen nib'an kyel oq ti'j kypatrón.
11¿Baqa ktzajel wi'ne aju wab'j, k'ab'j ex chib'j, aju ma b'ant tten wu'ne kye nmajene matzol kytzmal nẍne'le, tu'n t-xi nq'o'ne kye xjal minti' b'i'n wu'ne jatum ẍe tzaj?
12E ajtzun meltz'aj qe ku'xun otoq che'x t-sama'n David, ex tej kypon tuk'il xi kyma'n tkyaqil aju otoq tma Nabal.
13Xitzun tma'n David kye qe xinaq ate' tuk'il:
—Kyk'alonke kyspadiye kyk'u'je.
Tzajtzun kyi'n qe xinaq kyspad ex ok kyk'alo'n kyk'u'j, ax ikx te David tb'incha ikju, e je'xtzun kyaje syent xinaq tuk'il, atzun juntl kab'e syent ax e kyaj ten kwentil tkyaqilju at kye.
14At jun tmajen Nabal xi' tuk'il Abigail aju t-xu'jil Nabal q'malte te kyja':
—Max tuj lugar minti' kynajb'il xjal tuj, e tzaj t-sama'n David junjun t-sanjel q'olb'elte qpatrone; atzun te kyuw xi' tyol kyi'j.
15Aqeju xinaq lu puro b'a'n kymod quk'ile. Tej xqo tene junx kyuk'il tuj kojb'il, minti' jun mya b'a'n o kyb'incha qi'je ex mi jun ti'xti el kyi'n qeye.
16Noqpe o ok kwentine kyu'n kyuk'ix qe ẍne'l q'ijl ex qonik'an.
17Ex tu'nju puro plojxix tmod tchmila, mlay qo'x yolin tuk'il. Ximana ti'j alkye kb'antel tu'na, ex ax tok tzul jun mya b'a'n ti'j ex kyi'j qeju ate' tuj tja, chi majen.
18Jurat naj tzaj ti'n Abigail kab'e syent pan, kab'e tz'u'm nojni tu'n ta'l twitz uva, jwe' ẍne'l txo'nmaj twitz q'aq', jwe' arrob tb'aq' triw tx'ilsa'maj, jun syent lob'j b'incha'maj ti'j twitz uva tzqij tuj piẍun tten, ex kab'e syent lob'j b'incha'maj ti'j twitz higo tzqij ax tuj piẍun tten, ex ok tk'alo'n ti'j kyk'u'j qe bur.
19Ex te tib'ajxi xi tma'n kye qe tmajen:
—Kykub' nej kyeye tu'n wok lpe'ye kyi'je.
Minti'toq b'in tchmil ti'j jlu.
20Jaxtzun Abigail tib'aj jun bur ex tuj ewaj tzyet b'e tu'n, tu'n tku'x tk'u'j witz. Yajxi ch'intl xi tke'yin kyja' ttzaj David kyuk'ix qe xinaq tuk'il, xitzun laq'e' jatum ate' qe.
21Atzunte David in ximantoq ti'j kyja': Ax tok noqx gan ma tz'ok nkwentine tkyaqilju at te Nabal tuj lugar minti' kynajb'il xjal tuj, ex minti' jun o tz'el elq'a'n ti'j tkyaqilju at te; weye o nb'inchaye b'a'n te, atzun te ma tb'incha mya b'a'n wi'je.
22Awt Dios kub' q'onte ncastiwoye qa na'nxtoq kykub' b'aj kykyaqil qe xinaq tiyjil Nabal wu'ne ok tkub' q'ij nchi'j, chi David.
23Tejtzun tilwaj David tu'n Abigail, ku'tz naj tib'aj bur ex kub' ẍmeje' t-xe tqan max tejxi tpon takl tib'aj twitz twitz tx'otx', te jun techal te nimb'il te,
24ex xi tma'n te:
—Tat, wib'aje q'onkuya ju mya b'a'n lu, ex chin kub'sale twitza tu'n kytzaj tb'i'na qe nyole aju kxel nma'ne teya.
25Mi'n tz'ok tq'o'n tkwenta ti'j aju in tb'incha'n Nabal, ex plojxix tmod ik tza'nx t-xilen ju tb'i tok Nabal, ex ax tok minti' tnab'l. Tkyaqilju in tb'incha'n puro mya b'a'n tu'nju minti' tnab'l. Aqine ajb'el teya minti' o wile tej kypon t-sama'na qe ku'xun,
26maske ikju, ax Qman minti' ma taq' amb'il teya tu'n t-xi'ya ex tu'n kykub' tb'yo'na qe xjal tu'n t-xelin tu'na tu'n texa tajb'ila. Ikwit che ok kykyaqil aj q'oj ti'ja tu'n Qman ik tza'n te Nabal; ax ikx qeju kyaj tu'n kyb'inchante mya b'a'n ti'ja.
27Ja'lo in chin kub'sane teya, aju oyaj ma tzul wi'ne b'a'n tu'n tkub' sipet kyxol qe xinaq in che b'et tuk'ila,
28ex tu'n tkub' tnajsa'na aju wile aqine ajb'el teya. Kpol jun q'ij aya k'okel te rey tu'n Qman, ex qe tiyjila kukx che kawil te jumajx, porke mya noq tu'nxa nne'tza q'ojlel, noq o'kx tu'n Qman sama'na, ex tuj tkyaqil tanq'ib'la minti' jun ti'xti mya b'a'n kb'ajel ti'ja.
29Qa at jun ma tz'ok lpe' ti'ja ex taj tu'n tkub' b'yo'na tu'n, mlay kub'a ex ax Qman aju Tdiosa kwentil teya. Che elex tlajo'n Qman qe aj q'oj ti'ja; ik che temb'il ik tza'n in xi xo't jun tal ab'j tu'n jun xob'l.
30Kyja'tzun, ok tjapun tkyaqilju tyol Qman o tma ti'ja ex ok tok q'o'na tu'n te rey kyxol aj Israel,
31minti' b'is ti'ja, porke minti' ma che kub' qe xjal minti' kyil tu'na ex minti' ma xelin tu'na aju mya b'a'n ma kyb'incha xjal ti'ja. Oktzun tb'inchante Qman aju b'a'n ti'ja, b'i'x chin tzaj tna'na, aqine ajb'el teya, chi Abigail.
32Atzunte David xi ttzaq'we'n:
—Nimanxwit tb'i Qman aju Qdios aj Israel qo', aju ma tzaj samante teya ja'lo kanul wi'je,
33ax ikx teya, ky'iwla'nxwita tu'nju tz'aqlxix qe tyola, ex tu'nju ma chin ok tmayo'na tu'n mi'n nxi'ye b'yol kye qe xjal, ex tu'n tb'ant jlu wu'ne tu'n wexe wajb'ile.
34Ex kxel nma'ne jun nyole axix tok twitz Qman aju Qdios aj Israel qo', aju ma chin ok mayo'na tu'n tu'n mi'n tok nb'incha'ne jun mya b'a'n ti'ja, ex noqwit minti' sul naja kanul wi'je, ya ok tkub' q'ij nchi'j, miwtlo jun xinaq itz'x, aqeju ate' ttxlaj Nabal, chi David.
35Xitzun tk'mo'n David aju q'i'n tu'n Abigail ex xi tma'n te:
—B'a'n tu'n taja tjaya ex mi'n b'isuna, porke ma nb'iye aju tyola ex ma nb'inchaye aju ma tzaj tqanina weye.
36Tejtzun tpon meltz'aj Abigail jatum ta'toq Nabal, o til lu Nabal in ik'sante jun nintz wa'n ik tza'n twa jun rey. Nimtoq in tzalaj Nabal ex otoq chyo'n twi'. Kyja'tzun minti' xi tma'n Abigail aju otoq b'aj, ex maxitzun xi tma'n te juntl q'ij.
37Tej t-sqix tuj juntl q'ij ex tej otoq tz'el q'e'n tuj twi Nabal, xi tma'n Abigail te tkyaqilju otoq b'aj, ex b'i'x tzaj jun ataque ti'j Nabal ex ya minti'tl yukch.
38Tb'ajlenxitzun laj q'ij, k'ixb'isanjtz Nabal tu'n Qman ex b'i'x kyim.
39Tejtzun tb'inte David qa otoq kyim Nabal tma:
—Nimanxwit tb'i Qman, tu'nju a ma tz'ok q'onte t-xel ti'j ju mya b'a'n tb'incha Nabal wi'je, ex ma chin ok mayo'ne tu'n tu'n mi'n nb'inchanteye jun mya b'a'n, ex ma tb'incha tu'n, ax tib'ajx Nabal tu'n tkub' tz'aq aju tb'inchb'en mya b'a'n, chi David.
Te tib'ajxi e je'x t-sama'n David junjun tmajen tu'n t-xi kyma'n te Abigail qa tajb'iltoq David tu'n tok Abigail te t-xu'jil.
40Tejtzun kypon qe tmajen David tuj Carmel tu'n kyyolin tuk'il Abigail, xi kyma'n te:
—Ma qo tzaj sama'ne tu'n David tuk'ila, ex taj tu'n toka te t-xu'jil.
41Kub'tzun ẍmeje' Abigail max tejxi tpon takl tib'aj twitz twitz tx'otx' te jun techal te nimb'il, ex tma:
—Noq jun ajb'el te David qine, ex jaku tz'el ntx'jo'ne kyqan qe tmajen.
42Tb'ajlenxi tma'n jlu, jurat naj b'aj tb'incha'n tten ex jax tib'aj jun bur; oktzun lpe' kyi'j qeju otoq che tzaj t-sama'n David, junx kyuk'il jwe' tmajen xu'j; ex kyja'tzun tten o moje' tuk'il David.
43Ax ikx otoq moje' David tuk'il Ahinoam aju aj Jezreel, ex kykab'il e ok te t-xu'jil.
44Atzunte Saúl otoq txi tq'o'n ju tme'jel Mical tb'i, aju t-xu'jil David, te juntl xinaq Palti tb'i, tky'ajal Lais aju aj Galim.
Who We AreWhat We EelieveWhat We Do
2025 by iamachristian.org,Inc All rights reserved.
