1 Reyes 6 - Mam Huehuetenango New Ortography

Jaw tb'incha'n Salomón tja Dios 2 Crónicas 3.1-14

1Tej otoq b'ant kyaje syent tuk'il 80 ab'q'i kyetzlen aj Israel tuj Egipto, ex tuj tkyajin ab'q'i ttzyetlen tkawin Salomón kyxol aj Israel, tuj xjaw Zif tb'i, aju tkab'in xjaw te ab'q'i, tzyet aq'untl tu'n Salomón tu'n tjaw b'inchet tja Dios.

2Aju tja Dios jaw tb'incha'n rey Salomón, 30 var tnuqb'il, ex laj var tuj t-ẍkyin, ex olaj var twa'l.

3Aju tnuqb'il twitz tja Dios laj var ik tza'nxju tuj t-ẍkyin, ex jwe' var twitz.

4E kyaj tq'o'n Salomón qe tventanil tja Dios xawk'in kyoy'.

5Ex ti'jx kyoxil pak' tkajonil tja Dios e b'aj tb'incha'n qe tal cuart; tza'nx ti'jele cuart matij, ax ikx ti'jele cuart Mas Xjanxix.

6Aju tnejel kol ja te kab' var tuk' mey tuj, atzun tkab'in kol ja te ox var tuj; ex aju toxin kol ja, ox var tuk' mey tuj; ex tu'n jlu ok najyin tpimil tkajonil tja Dios, tu'ntzun mi kyokx ten qe tqul ja ti'j tkajonil tja Dios.

7Tej tb'inchet tja Dios e ajb'en qe ab'j otoq che b'aj xpe'lin wen, kyja'tzun, tej tb'ant ju ja minti' martiy o q'ajt, ex mi achwel, ex mi juntl makb'il k'uxb'il.

8Aju ttzi' tal cuart tuj tnejel kol atzun ta' tuj tumlal tnayaj q'ij, ex at jun b'e kolokol ex sutpi'n tjaw, tu'n kyjapun xjal tuj tkab'in ex tuj toxin kol ja.

9Tejtzun tb'ant tja Dios tu'n Salomón, tkyaqil tze' jax twi ja puro wi'ten.

10Ex e jaw tb'incha'n qe cuart ti'jele tja Dios, ex teyle junjun kol ja te kab' var tuk' mey twa'l, ex aju kyqul tal ja e jax q'o'n, puro wi'ten qe ex noq e pon take' ti'j tkajonil tja Dios.

11Tzajtzun yolin Qman tuk'il Salomón ex tma kyja':

12Ti'j ju ja lu aju nib'an tb'ant tu'na, waje tu'n t-xi nma'ne jun nyole teya: Qa ma b'eta ik tza'nx in tma'n nleye ex nxnaq'tzb'ile, ex qa ma che japun nmandamyente tu'na, ex qa ma tb'inchaya ik tza'nx in kyma'n, kjapuneltzun wu'ne aju yol xi ntziyane ti'ja te David aju qtzan tmana;

13ex ax chin tele kyxol aj Israel, ex mlay che kyaj nkoline qe xjal etzan wu'ne, chi Dios.

14Kyja'tzun tten japun b'aj tkyaqil aq'untl ti'j tja Dios tu'n Salomón.

15Ok tq'o'n qe tz'lom wi'ten twitzile ja te tujxi, xi qe' twitz tx'otx' ex japun b'aj tjaq' k'a's, ex kub' tq'o'n tz'lom tzaj twitz tx'otx' tuj ja.

16Ax ikx b'aj tb'incha'n jun cuart max t-xe'pun tja Dios te laj var tnuqb'il, ex ok tq'o'n tb'i ju cuart lu Lugar Mas Xjanxix, ex b'aj tq'o'n tz'lom tujile, xi'x qe' twitz tx'otx' ex japun b'aj tjaq' k'a's.

17Aju tnejel cuart te tja Dios tkub' twitz ju Lugar Mas Xjanxix, ex winqin var tnuqb'il.

18Twitzile ja te tujxi ok tq'o'n tz'lom wi'ten kyok kyilb'ilal b'ech twitz, tuk'ix tilb'ilal twitz tze' tb'anilxix ke'yin. Tkyaqil jlu puro wi'ten, minti' jun ab'j o kyaj ten q'ancha'l.

19B'aj tb'incha'n Salomón ju Lugar Mas Xjanxix tuj tja Dios tu'n tokx k'u'n kax k'ub'l tley Dios tuj.

20Aju tnuqb'il ju Lugar Mas Xjanxix laj var, ex aju tuj t-ẍkyin ax laj var, ax ikx ju twa'l ax laj var. Ex b'aj tlo'tzin tujile cuart lu tu'n q'an pwaq tb'anilxix, ax ikx aju altar b'inchamaj ti'j tze' wi'ten b'aj tlo'tzin ti'jele tu'n q'an pwaq.

21Ax ikx ok tlo'tzin q'an pwaq tb'anilxix tujile tja Dios tuk'ix tuj Lugar Mas Xjanxix, ex kyxoltzun ju Lugar Mas Xjanxix tuk'il ju Lugar Xjan kub' tq'o'n qe caden q'an pwaq kytx'otx'il.

22Tkyaqil tuj tja Dios b'aj tlo'tzin tu'n q'an pwaq, ax ikx ju altar aju tkub' twitz ju Lugar Mas Xjanxix.

23Ex b'aj tb'incha'n Salomón kab'e tilb'ilal querubín, tze' olivo qe, ex e okx tq'o'n tuj Lugar Mas Xjanxix. Teyle junjun jwe' var twa'l.

24Aju kyxik', kab' var tuk' mey tqan junjun. Ex aju tqan kyxik' tu'n kykab'il pak', jwe' var.

25Qe kab'e tilb'ilal querubín lu junx ta' echb'in kye; ax jwe' var tqan t-xik' jun, ax ikx juntl, ex junx ta' b'inchb'en kye.

26Aju kywa'l ax jwe' var junjun.

27E okxtzun tq'o'n Salomón tuj Lugar Mas Xjanxix lik'un kyten qe kyxik', kyja'tzun, aju t-xik' jun max ponin twitz jun pak' ja, ax ikx te juntl, max ponin twitz juntl pak' ja, atzun juntl pak' ttxa'n kyxik' tmojb'an tib' tuk'il te juntl tuj tmij Lugar Mas Xjanxix.

28B'aj tlo'tzin Salomón q'an pwaq kyi'j qe tilb'ilal querubín,

29ax ikx twitz tkyaqil tkajonil tja Dios te tujxi, tza'nx ju Lugar Xjan, ax ikx ju Lugar Mas Xjanxix, e b'aj tb'incha'n qe tilb'ilal querubín kyuk'ix kyilb'ilal tqan xa'j ex kyilb'ilal b'ech.

30Ax ikx kub' tlo'tzin q'an pwaq kyib'aj tz'lom aqeju kykub' twitz tx'otx' tuj tja Dios, tza'nxix tuj Lugar Xjan ax ikx tuj Lugar Mas Xjanxix.

31Te tlamel ttzi ja teju Lugar Mas Xjanxix, tz'lom tze' olivo ok tq'o'n, ex qe tmarkil te jwe' pak' tten kytxlaj.

32Kab'e piẍ tlamel e ok, tz'lom tze' olivo qe, ex e b'aj tb'incha'n qe tilb'ilal querubín kywitz, kyuk'ix kyilb'ilal tqan xa'j ex kyilb'ilal b'ech; ex b'aj tlo'tzin q'an pwaq kyi'j kykyaqil qe tilb'ilal lu.

33Ax ikx ajb'en tze' olivo te kyaje kytxlaj te tmarkil ttzi ja teju Lugar Xjan.

34Atzun qe kab'e tlamel ja lu tz'lom tzaj qe ex te kab'e piẍ junjun; in che jaqet ex in che lamet.

35Kywitz qe tlamel ja lu e ok tb'incha'n qe tilb'ilal querubín, kyuk'ix tilb'ilal tqan xa'j ex kyilb'ilal b'ech, ex b'aj tlo'tzin q'an pwaq kyi'j.

36Ax ikx b'aj tb'incha'n jun muro ti'jele ttxa'n pe'n tkub' twitz tja Dios; te ox txol ab'j xpe'limaj qe ex jun txol viga wi'ten xi' tib'aj.

37Tuj tkyajin ab'q'i toklen Salomón te rey, tuj xjaw Zif tb'i, atzun tkub' qe' t-simyentil tja Qman;

38ex tujtzun tjunlajin ab'q'i toklen te rey, tuj xjaw Bul tb'i, aju twajxaqin xjaw te ab'q'i, atzun tb'aj b'ant tkyaqil aq'untl ti'j tja Dios, ik tza'nx otoq b'ant ti'j nej. Tuj wuq ab'q'i o b'ant tja Dios tu'n Salomón.