Proverbios 10 - Mam Huehuetenango New Ortography

Qe tnejel yol o che q'manjtz tu'n Salomón.

1Atzun qe tyol Salomón jlu:

Aju k'wa'lb'aj at tnab'l, jun tzalajb'il jlu te tman; atzunju k'wa'lb'aj minti' tnab'l, jun b'is jlu te ttxu'.

2Aju q'inumab'l mya tuj tumel in knet, mlayx tz'ajb'en te xjal, atzunju xjal in b'et tuj tumelxix, in klet twitz kamik.

3Aju xjal tz'aqlxix, mlay kyaj tkolin Qman tu'n mi'n twa'n, atzunju xjal b'inchal mya b'a'n, nno'k tmayo'n Qman ti'j ju in pon tk'u'j ti'j.

4Aju xjal tk'i' tz'aq'nan, tal meb'a xjal k'okel; atzunju in aq'nanxix wen, ktel tq'inumab'l.

5Aju xjal at tnab'l, in jaw tchmo'n tawal ok tul tq'ij, ex aju noq in tan ok tul tq'ij twitz tawal, ktzajel tch'ixwi.

6Aju xjal tz'aqlxix, ky'iwla'n tu'n Qman Dios, atzunju xjal b'inchal mya b'a'n, txolin ti'j tu'n mya b'a'n.

7Aju xjal tz'aqlxix, kukx ktzajel na'n tb'inchb'en b'a'n; atzunju b'inchal mya b'a'n, jurat k'ik'el tna'l kyu'n xjal.

8Aju xjal at tnab'l, in xi tniman aju xnaq'tzb'il in tzaj q'o'n te, ex aju in yolin ti'j yol minti' tnab'l, knajel.

9Segurxix ta' aju in b'et tuj tumelxix; atzunju xjal nne'l txalpuj ti'j b'e b'a'n, che elel qe tb'inchb'en mya b'a'n tuj q'ancha'l.

10Aju xjal in kub' t-xmutz'i'n jun tb'aq' twitz tu'n tyek'unte qa mya ax tok aju in tma'n, in tzaj ti'n mya b'a'n tib'aj; ex aju xjal in yolin ti'j yol minti' ttxolil, kb'el tcastiw.

11Qe tyol ju xjal tz'aqlxix in kyq'o'n chwinqlal, atzunju xjal b'inchal mya b'a'n, txolin ti'j tu'n mya b'a'n.

12Aju xjal nne'l tik'un tuk'il, noq q'oj in tzaj ti'n, atzunju xjal at tk'ujlalil, in kub' tnajsa'n tkyaqil mya b'a'n in b'ant kyu'n xjal.

13Aju tyol xjal at tnab'l, ojtzqib'l in tq'o'n, atzun teju minti' tnab'l, kxel jato'n jun tze' ttzal ti'j.

14Qe xjal at kynab'l in xi kyk'u'n kyojtzqib'l, atzunju kyyol qe xjal minti' kynab'l in tzaj xitb'il tu'n.

15Aju tq'inumab'l ju xjal q'inun, atzun kolil ti'j, atzunju xjal meb'a, ax tmeb'yil in tzaj q'inte mya b'a'n ti'j.

16Aju tkamb'ab'l jun xjal tz'aqlxix, atzun chwinqlal, atzunju xjal mya b'a'n, il in tkamb'a'n.

17Aju xjal in tb'i'n xnaq'tzb'il, in b'et tuj b'e te chwinqlal; atzunju xjal minti' in xi tb'i'n, kyja' in xi' tuj b'e in pon tuj najen.

18Aju xjal in q'ojl ti'j tuk'il ex in kub' tewan, nik'al yol te; ex aju xjal si'mil yol minti' tnab'l.

19Aju xjal in yolin ti'j nim yol, jaku tzpet ti'j; atzunju xjal in jak'unte ttzi' at tnab'l.

20Aju tyol xjal tz'aqlxix ik tten ik tza'n saq pwaq tb'anilxix; atzunju t-ximb'etz xjal b'inchal mya b'a'n minti'x tajb'en.

21Qe tyol xjal tz'aqlxix in ajb'en te jun xnaq'tzb'il kye nimku, atzunte xjal minti' tnab'l, in naj tu'nju minti' tojtzqib'l.

22Aju ky'iwb'il tu'n Qman, atzun in q'onte q'inumab'l ex minti' in tzaj ti'n jun b'is junx tuk'il.

23Aju xjal minti' tnab'l in tzalaj ti'j ok tb'inchante mya b'a'n; atzunte xjal at tnab'l in tzalaj ti'j ju tnab'l at.

24Aju mas in xob' xjal b'inchal mya b'a'n ti'j, axtzunju in tzaj ti'j, atzunte xjal tz'aqlxix in tk'mo'n aju tajb'il.

25Ik tza'n xkyaqinpaẍ in tzaj ex jurat nnik' naj, iktzun in kub' naj aju b'inchal mya b'a'n, atzunju xjal tz'aqlxix kyjel ten te jumajx.

26Ik tza'n vinagr nno'kx t-xe qe' b'ix in tzaj chyo'n tu'n, ex ik tza'n in xi' sib' tuj qwitz, iktzun nne'la ju xjal ky'aj teju samalte te.

27Aju xjal in niman te Qman kxel laq'e' tuj tq'ij, atzun kye qe b'inchal mya b'a'n, k'okel laq'e' tuj kyq'ij.

28Aju in ayon ju xjal tz'aqlxix ti'j, atzun tzul q'onte tzalajb'il te, ex aju in ayon ju b'inchal mya b'a'n ti'j, mlay tk'am.

29In kolin Qman kyi'j qeju in kyb'incha'n b'a'n, ex qeju b'inchal mya b'a'n in che naj tu'n.

30Aju xjal tz'aqlxix mlay tzik' yukun tuj tlugar, atzunju xjal b'inchal mya b'a'n, mlayx ten twitz tx'otx'.

31Aju xjal tz'aqlxix in yolin ti'j yol at tnab'l. Atzunju xjal jumajx tq'on tib' tuj mya b'a'n, b'i'x kmayetel tu'n tyolin.

32Aju xjal tz'aqlxix in yolin ti'j yol txub'txaj tb'inx; atzunte xjal b'inchal mya b'a'n o'kx in yolin ti'j yol mya tuj tumel.