Isaías 22 - Mam Huehuetenango New Ortography

Aju yol o q'manjtz ti'j ju ktzajel ti'j Jerusalén

1Aju yol o q'manjtz ti'j ju attoq ttzajel ti'j chq'ajlaj tkub' t-xe witz jatum in tzaj yolin Dios kyuk'il qe t-sanjel.

¿Ti ma b'aj, tu'nju nib'an kyjax kykyaqil xjal kywi' qe ja?

2Aya tnam noq in che jaw tilj qe xjal tuja ex nim tq'ajq'ajel in q'ajt tuja, nim in tzalaja kyi'j achb'il: Qe xjal e kyim tuja, mya tu'n spad e kub' b'yo'n, mya tuj q'oj e kyim.

3Kykyaqil qe nejenel ate' tuja ma che el oq ex minti' jun plech ma txi xo'n kyi'j. Kykyaqil xinaq ate' tuja ma che'x oq najchaq, ex kyuk'ix qe ma che tzyet.

4Kyja'tzun ma txi nma'ne: Kypa'mil kyib'e wi'je, waje tu'n njaw oq'e kyuwxix wen; mi'n che ok tene q'uqb'alte nk'u'je, tu'n tlaj aju xitb'il ma tzaj ti'j ntanmiye.

5Porke ma tzaj tma'n Qman aju Tajaw tkyaqil: Kpol jun q'ij tu'n kyjaw tilj qe xjal, tzul xitb'il kyi'j ex b'i'x knajel kynab'l tuj chq'ajlaj tkub' t-xe witz jatum in tzaj yolin Qman kye t-sanjel. In che kub' xitun qe muro tok ti'jele tnam; in pon tq'ajq'ajel kywi xjal max twi witz.

6Ma b'ant kyten kyplech aj Elam, ex kyokxsa'n qe kyuj kycarwaj, ex kyjax qe kyib'aj qe chej cabay; qe aj Kir ma b'ant kyten kymaqb'il aju in ajb'en kyu'n tuj q'oj.

7Qe kytx'otx'e chq'ajlaj ex tb'anilxix, nojni qe kyu'n qe carwaj, ex qe xjal kyjax kyib'aj chej ma che ok tzoqpaj kyi'j qe tlamel tnam.

8Minti'tl jatum tu'n kyklonte kyib' aj Judá.

Tuj q'ij lu nno'k kyke'yine jatum k'u'n qe ub'l tuj ja b'inchamaj ti'j tze' te tjaq' chk'ul,

9ex ma kyile nimku tpa'xil muro tok ti'j tnam Ttanmi David tb'i, ex ma ku'x kynojsa'ne tu'n a' aju tank tku'tz kub'ni,

10b'aj kyke'yine kyten qe ja ate' tuj Jerusalén ex b'aj kyxitune junjun tu'n tkyuwset ju muro.

11Kyxol kykab'il muro kub' kyb'incha'ne jun tank te tkub'il a', aju a' in tzaj tuj ttx'aqan tank, ex minti' ok kyq'o'ne kywitze ti'j Dios aju b'inchante tkyaqil jlu ex ximamaj tu'n atxix ojtxi.

12Tuj q'ij lu ma che txkonjtze tu'n Qman aju Tajaw Tkyaqil, tu'n kyok tene oq'el ex tu'n kyb'isune, tu'n tel kyk'o'ẍine ti'j kywi'ye ex tu'n tok kyq'o'ne kyxb'alune ch'i'x kywitz te jun techal te k'ixk'oj.

13Atzun kyeye ma tz'ok kyq'o'ne aju q'ij lu te achb'il ex te tzalajb'il, ma kub' kyb'yo'ne qe wakẍ ex qe ẍne'l, ma che chyo'ne chib'j ex ma che k'ane vin ex ma kymaye kyja': Qo wa'n ex qo k'an, porke nchi'j qo kyim, che chitzune.

14Ex kub' tyek'un tib' Qman nwitze, aju Tajaw tkyaqil, ex tzaj tkyuwsa'nxix weye kyja': Che kymele ex mlayx kub' nnajsa'ne aju kyile lu, chi Qman aju Tajaw Tkyaqil.

Aju yol o q'manjtz ti'j ju mayordom tuj tja rey

15Tzaj tma'n Qman weye, aju Tajaw Tkyaqil, chi kyja': Txi'ya ke'yilte Sebna aju mayordom tuj tja rey, ex q'manxa te kyja':

16¿Ti nb'aj teya tzalu, ex alkye ma tzaj q'onte amb'il teya tu'n tjaw tb'incha'na jun pantyón tzalu, ex tu'n tjaw tb'incha'na jun tpantyona twi' jun pik ma' tjaw, ex tu'n tokx tlaku'na toy' tu'n tojlana tuj ok tkyima?

17K'elex xo'na tu'n Qman tuj jun lugar najchaq wen, ik tza'n in tb'incha'n jun xinaq nimxix tipun. Ktzyetela tu'n tuk'il tipun.

18Kb'ajel to'lina tu'n ik tza'n jun pelot, ex kxel xo'na tu'n tuj jun tx'otx' ma'xix wen. Max knajela ma chixin, maxtzun che pol we' qe tcarwaja ma chixin, aqeju nim in tzalaja kyi'j, ex k'okela te ch'ixb'il tuj tja rey aju tpatrona.

19Aqine chin elel q'inte teya ti'j toklena, k'elel wi'ne aju taq'una.

20Atzun q'ij lu ktzajel ntxko'ne nmajene Eliacim aju tky'ajal Hilcías;

21k'okel nq'o'ne t-ẍjo'wa ti'j, tuk'ix k'alb'il tk'u'ja, aju in ajb'en te nimb'il teya, ex kxel nq'o'ne aju toklena te. K'okel ik tza'n jun mamb'aj te kye qeju najl tuj Jerusalén ex te kye aj Judá.

22Kb'el nq'o'ne tal tja David tib'aj t-semil; aju ja kjaqetel tu'n, mi a'l jun xjal jaku tz'ex lamonte, ex aju tlamel ja kyjel tlamo'n, mi a'l jun xjal jaku jaqet tu'n.

23Ik k'okel ik tza'n jun q'uqb'il te nimb'il te kye qeju ate' tuj tja tman. Kkyuwsetel wu'ne tuj tlugar, ik tza'n jun tze' otoq tz'okx pajo'n tuj loq'.

24Ex ti'j che okel yob'it kykyaqil qeju ma'xix kyoklen ate' tuj tja tman, kyuk'ix qe txqantl tiyjil ex tuk'ix tkyaqil txkaj tkub'il k'ab'j kok' qe, ik tza'n qe laq ex qe xar.

25Tuj q'ij lu k'eletz tz'aq ju tze', aju otoq tz'okx pajo'n tuj jun lugar segurxix, k'eletz b'aqo'n ex k'elel tz'aq, ex kykyaqil qe ti'xti otoq che ok yob'an ti'j che b'el pax. Atzun jlu in tma'n Qman aju Tajaw Tkyaqil.