Génesis 35 - Mam Huehuetenango New Ortography

Kub' ky'iwla'n Jacob tu'n Dios tuj Betel

1Tzaj tma'n Dios te Jacob kyja': We'ktza ex tjaxa najal tuj Betel. B'inchan jawa jun altar nwitze ma chixin, aqine Dios aju kub' tyek'un tib' twitza tej tel oqa twitz ttzika Esaú, chi Dios.

2Xitzun tma'n Jacob kye kykyaqil qeju ate'toq tuj tja ex kye kykyaqil qeju ate'toq tuk'il, chi kyja': Kyi'metze kykyaqil tilb'ilal nno'k kydiosine, aqeju e tzaj kyi'ne tuj junxitl tx'otx', che chine tuj a', ex kych'expu'n ele kyxb'alune.

3Qo'qe tuj Betel. Atzun kjawil nb'incha'ne jun altar twitz Dios, aju o tz'onin wi'je tej atintoqe tuj xob'ajil, ex o b'et wuk'ile noq jatumchaq o chin b'ete, chi Jacob.

4E je'xtzun kyq'o'n te Jacob kykyaqil qe tilb'ilal nno'k kydiosin, aqeju otoq tzaj kyi'n tuj junxitl tx'otx', kyuk'ix qe tuj ẍkyinb'aj. E ku'x tmaqu'n Jacob tjaq' jun wi' tze' k'ol niqayintoq ttxlaj tnam Siquem.

5Tej kyik' tuj lugar lu, tzaj tq'o'n Dios nim t-xob'il kyi'j xjal ate'toq kyuj txqantl tnam kyi'jele, ex minti' e jo'k lpe' q'ojlel kyi'j qe tky'ajal Jacob.

6Ul Jacob tuj tnam Luz, kyuk'ix kykyaqil qe xjal uk'intoq tu'n, ex Betel juntl tb'i tnam lu, atzun ta' tuj Canaán.

7Jawtzun tb'incha'n jun altar, El-betel tb'i lugar lu ok tq'o'n, tu'nju atzun kub' tyek'un tib' Dios twitz tej tel oq twitz ttzik.

8Atzun kyim Débora, aju xu'j otoq tz'ok kwentin te Rebeca, ex ku'x maqu'n tjaq' jun wi' tze' k'ol tjaq' tnam Betel. Alón-bacut tb'i lugar lu ok tq'o'n Jacob.

9Tajtzlenxi Jacob tuj Padan-aram kub' tyek'un tib' Dios twitz juntl maj, ex kub' tky'iwla'n.

10Tzaj tma'n te kyja':

Jacob tb'iya, atzun ja'lo mi'n tz'ok q'ma'ntl tb'iya Jacob. Texju ja'lo Israel tb'iya k'okel, chi Dios, ex Israel tb'i Jacob ok tq'o'n.

11Tmatl Dios te kyja':

Aqine Dios aju at tipumal tu'n tb'ant tkyaqil tu'n. Chmet-x nim tb'aja ex chmet-x nim tiyjila. Ti'ja k'elel jun nasyon ex nimku tnam, ex kyxol qe tiyjila che elel jlet qe rey.

12Aju tx'otx' o txi nq'o'ne te Abraham ex te Isaac, axju kxel nq'o'ne teya, ex te tib'ajxi kxel nq'o'ne kye tiyjila, chi Dios.

13Ik'tzun Dios tuj lugar jatum otoq yolin tuk'il Jacob.

14Tzaj ti'n Jacob jun ab'j, jaw twalb'a'n te jun techal jatum kub' ten Dios yolil tuk'il, kub' tqo'n aseyt ex ta'l twitz uva tib'aj, te jun aq'b'il chjonte te Dios,

15ex Betel tb'i lugar lu ok tq'o'n, jatum otoq yolin Dios tuk'il.

Tej tkyim Raquel

16Te tib'ajxitzun e ik' tuj Betel. Tej ch'ixtoq kyul tuj Efrata ul itz'j juntl tal Raquel, ex pen el k'wa'l ti'j.

17Tej toktoq tuj k'ixk'oj mas kyuwxix, xi tma'n b'etx'lon te kyja': Mi'n xob'a. Xinaq juntl tala ma tzul itz'j, chi b'etx'lon.

18Ch'ixtoq tkyim Raquel ex tej ch'ixtoq tjaw b'aj t-xew, Benoni tb'i tal ne' ok tq'o'n; atzunte Jacob aju tman ne', Benjamín tb'i ok tq'o'n.

19Kyja'tzun tten kyim Raquel ex ku'x maqu'n ttxlaj b'e aju in pon tuj Efrata, aju Belén tb'i tok ja'lo.

20Jaw twalb'a'n Jacob jun ab'j te jun techal tib'aj tmuqb'il Raquel. Atzunju techal lu in tyek'un jatum ku'x maqu'n Raquel, ex ax ta' ja'lo.

21Ik'tzuntl Israel ex o tentl max ti'jxi Migdal-edar.

22Tej najltoq Israel tuj tx'otx' lu, at jun maj xi' Rubén ex kub' tan tuk'il Bilha aju t-xu'jil tman. O tb'i Israel jlu.

Qe tky'ajal Jacob 1 Crónicas 2.1-2

Kab'laj kyb'et tky'ajal Jacob.

23Qe tky'ajal e tzaj ti'j Lea, atzun qe jlu: Rubén aju tnejel tky'ajal Jacob, tuk'ix Simeón, Leví, Judá, Isacar ex Zabulón.

24Qe tky'ajal e tzaj ti'j Raquel, atzun qe jlu: José ex Benjamín.

25Qe tky'ajal e tzaj ti'j Bilha aju tmajen Raquel, atzun qe jlu: Dan ex Neftalí.

26Qe tky'ajal e tzaj ti'j Zilpa aju tmajen Lea, atzun qe jlu: Gad ex Aser. Kykyaqil qe jlu tky'ajal Jacob qe, aqeju e ul itz'j tuj Padan-aram.

Tej tkyim Isaac

27Ul Jacob ke'yilte Isaac aju tman tuj tnam Mamre, ex ax juntl tb'i tnam lu Arba ex qa Hebrón. Atzun otoq anq'in Abraham tuk'ix Isaac.

28O anq'in Isaac tu'n tkyaqil, 180 ab'q'i.

29Tej otoq tijin Isaac wen jaw b'aj t-xew, kyim ex pon kyuk'il qtzan t-xe'chel. Okxtzun maqu'n tu'n Esaú ex Jacob aqeju tky'ajal.