Proverbios 21 - Mam Huehuetenango New Ortography

1Ik tten t-ximb'etz rey tuj tq'ab' Qman ik tza'n jun a' in b'et, in xi ti'n Qman noq jatum taj tu'n t-xi ti'n.

2Tuj twitz xjal qa b'a'n tkyaqilju in tb'incha'n, ex ate Qman in b'aj ke'yinte t-ximb'etz xjal, qa b'a'n ex qa mi'n.

3Aju xjal in tb'incha'n ju tz'aqlxix ex in b'et tuj tumel, mas ma' t-xilen jlu tuj twitz Qman kywitz qe chojb'il.

4Aju xjal jawni twitz ex in jaw tniman tib', ex aju t-ximb'etz xjal b'inchal mya b'a'n, tkyaqil jlu il tuj twitz Qman.

5Aju xjal nej in kub' ten ximal ti'j alkye tu'n tb'ant tu'n, b'a'n nne'l te te, atzunju xjal noq t-xo'n tib' ti'j jun ti'xti ex minti' in kub' ten ximal ti'j qa b'a'n, ktzajel meb'ayil ti'j.

6Aju tq'inumab'l xjal in knet noq tu'n nik'aj yol, jurat in kub' naj ex jun k'ob'il jlu te te tu'n tkyim.

7Qe xjal b'inchal mya b'a'n ok che najel tu'nx ju kytx'u'jil, tu'nju minti' kyajb'il tu'n kyb'inchante aju tz'aqlxix.

8Aju b'e q'i'n tu'n xjal b'inchal mya b'a'n puro ẍo'k ti'j ex minti' ttxolil; atzun qe xjal minti' kyil in che b'et tuj tumelxix.

9Mas b'a'n tu'n tnajan jun xinaq tjunalx tuj jun tal galer, twitzju tu'n tnajan tuj jun matij ja tuk'il jun xu'j jawni q'ojl.

10Aju xjal b'inchal mya b'a'n o'kx in ximan ti'j tu'n tb'inchante mya b'a'n, ex minti' in tb'incha'n jun xtalb'il ti'j jun tuk'il.

11Ok tkub' tcastiw jun xjal b'a'n xmayin, atzun k'okel tnab'l ju xjal minti' ch'in b'a'n tu'n; atzunju xjal at tnab'l, k'okel mastl tojtzqib'l ok tok kawin.

12Ate Dios tz'aqlxix in b'aj tke'yin aju in b'inchanjtz tuj tja xjal mya b'a'n; ex in che'x tq'o'n qe xjal mya b'a'n tuj xitb'il kye.

13Aju xjal minti' in xi tb'i'n tkub'sb'il jun xjal meb'a, ax ikxtzun te mlay tzaj tzaq'we'n ok tok ten qanil onb'il.

14Aju oyaj in xi q'o'n tuj ewaj, in chewix ju q'oj ma' t-xilen tu'n.

15Aju xjal tz'aqlxix in tzalaj ti'j qa in xi b'incha'n kyi'j xjal tuj tumelxix, ex atzun kye xjal mya b'a'n, in tzaj xitb'il kyi'j.

16Aju xjal minti' in b'et tuj tumel, max kpol we' kyxol qe kyimni.

17Aju xjal o'kx tok tk'u'j ti'j achb'il ktel tuj meb'ayil, ex aju xjal o'kx tok tk'u'j ti'j vin ex ti'j perjum mlay tz'ok te q'inun.

18Aju xjal b'inchal mya b'a'n ex sb'ul kb'ajel k'ixb'isa'n te t-xel ju xjal tz'aqlxix ex b'a'n tmod.

19Mas b'a'n tu'n qnajan tuj lugar minti' kynajb'il xjal tuj, twitzju tu'n qanq'in tuk'il jun xu'j tx'u'j twi' ex jawni q'ojl.

20Tuj tja ju xjal at tnab'l at q'inumab'l ex nimku at te, atzunju xjal minti' tnab'l in b'aj tnajsa'n tkyaqilju at te.

21Aju xjal nno'k tilil tu'n tu'n tb'et tuj tumel ex tu'n tten tk'ujlalil in knet chwinqlal tu'n, nno'k q'o'n te tz'aqlxix ex in tk'mo'n nimb'ilte.

22Aju xjal at tnab'l nno'k tzoqpaj ti'j jun tnam at nim tipun, ex in che b'aj t-xitun qe ja te kykolb'il kyib' xjal aju q'uql kyk'u'j ti'j.

23Aju xjal tok tkwent ti'j tyol mlay tz'okx tq'o'n tib' tuj b'is.

24Xmayil tb'i ju xjal jawni twitz ex in jaw tniman tib'.

25Aju xjal ky'aj in kyim tu'nju in pon tk'u'j ti'j nimku ex tk'i' tz'aq'nan;

26tkyaqil q'ij in pon tk'u'j ti'j nimku. Atzunju xjal tz'aqlxix, in xi tq'o'n kotzb'aj ex minti' in kub' t-xk'ayin.

27Ik'un tu'n Qman aqeju chojb'il in xi kyq'o'n qe xjal b'inchal mya b'a'n, pyortzun qa in xi kyq'o'n tuk'il kyximb'etz mya b'a'n.

28Aju testiw nik'al yol knajel; atzunju xjal in kub' tb'i'n jun yol, ax ikx in xi ttzaq'we'n.

29Aju xjal b'inchal mya b'a'n in tyek'un mer ik tza'n b'a'n ta'; atzunju xjal b'a'n tmod, segur ta' ti'j ju in tb'incha'n.

30Maske nim kynab'l xjal ex nim kyojtzqib'l ex mejor che ximan, pero mlay che xkye' ti'j Dios.

31Ate xjal in b'ant tten chej tu'n tu'n t-xi' tuj q'oj, ex tu'n Qman in che kamb'an xjal tuj q'oj.