Hebreo 12 - Mam Huehuetenango New Ortography

Qq'o'nk qwitz ti'j Jesús

1Kyja'tzun, qq'onkj tkyaqil iqtz tuk'ix ju il tok qi'jele, qo qelan tuk'il qpasens tuj ju ojqelb'il tkub' qwitz, porke nim kyajlal testiw ate' qi'jele.

2Qq'o'nk qwitz ti'j Jesús aju nejenel qwitz tuj qokslab'l, ex kyaj tz'aqet-xix qokslab'l tu'n, ik'x tu'n twitz crus tu'n tkamb'ante jun tzalajb'il otoq tzaj yek'un te, minti' ok tq'o'n tkwent ti'j tch'ixwi, ex ja'lo ma kub' qe' ttxlaj tq'uqb'il Dios tuj b'anq'ab'aj, jatum in kawin Dios.

3Che ximane ti'j Jesús aju ik'x kyq'oj aj il tu'n. Kyja'tzun mi'n che sikte ex mi'n b'aj kyk'u'je.

4Porke na'nx kywe'xixe tu'n kyq'ojine tuk'il il ex na'nx tik'x kyu'ne ik tza'n te Crist ik'x tu'n ex kyim.

5Ex aju yol ma tzaj q'ma'n kyeye tu'n tok kynab'le, o tzik' tna'l kyu'ne, pero tu'nju k'wa'lb'aj qeye in tzaj q'ma'n ju yol lu, in tma'n tuj Tu'jil:

Nk'wa'l, mi'n tz'el tik'una qa ma kub' kawina tu'n Qman, ex mi'n tzaj b'aj tk'u'ja qa ma tz'ok ilina tu'n.

6Ex ate Qman in che kub' tkawin qeju k'ujla'n qe tu'n, ex in che b'aj tasyalin kykyaqil qeju in che tk'mo'n tu'n kyok te tk'wa'l, chi tuj Tu'jil.

7Tzik'xku kyu'ne ok kykub' kawine tu'n Dios, tu'nju k'wa'lb'aj qeye. Ex ¿atpe jun k'wa'lb'aj minti' in kub' kawin tu'n tman?

8Kykyaqil qe k'wa'lb'aj in che kub' kawin; atzun kyeye qa minti' in che kub' kawine tu'n Dios, myatzun tk'wa'l Dios qeye, sik'aj k'wa'l qeye.

9Ex at juntl tumel, at qe qman tzalu twitz tx'otx', o qo kub' kawin kyu'n ex at kychiyilal tuj qwitz. ¿Yajtzunte Qman Dios tuj kya'j myapelo mas tuj tumel tu'n t-xi qniman, tu'ntzun qanq'in?

10Ax tok o qo kawinjtz kyu'n qman mya nim q'ij ik tza'nx ju kyajb'il; atzunte Dios in qo kub' tkawin tu'n tajb'en qe, tu'ntzun qok xjan ik tza'n te Dios xjan.

11Ax tok, aju kawb'il qe ja'lo minti' in qo tzalaj tu'n, noq o'kx in qo b'isun; ex te tib'ajxi in qo kyaj ten tuj txub'txaj ex in qo b'et tuj tumelxix tu'nju kawb'il qe.

At xob'ajil qa ma tz'el qik'un tyol Dios

12Kyja'tzun, kynuqpinxe kyq'ab'e aju nne'l jilj, ex kykyuwsame kyqane minti' tipun.

13Che b'ete tuj jun b'e jiqun ti'j tu'ntzun mi'n tetz jolpaj kyqane kox, noq o'kx tu'n tb'anix kyqane.

14Tz'ok tililx kyu'ne tu'n tten kymojb'ab'l kyib'e kyuk'il kykyaqil xjal; tz'ok tililx kyu'ne tu'n tel kypa'n kyib'e ti'j tkyaqil mya b'a'n; ex qa minti' ma tz'el kypa'n kyib'e ti'j, mlayx kyile twitz Qajaw.

15Ten kykwente kyi'je, mya yajku at jun kyxole mi'n kanun tuj t-xtalb'il Dios; ten kykwente kyi'je tu'n mi jun kyeye tz'ok ik tza'n tlok' tze' puro k'a, mya yajku tz'ok te jun xitb'il kye txqantl.

16Ten kykwente kyi'je tu'n mi'n tok jun kyeye aj pajil ex tu'n mi'n tok ten tnab'l ti'j ju te twitz tx'otx'; ik tza'n te Esaú, noq tu'n ch'in twa xi tk'a'yin toklen, aju toklen te nej k'wa'lb'aj.

17Porke b'a'n kyu'ne, te tib'ajxi o tajb'etl Esaú tu'n tk'monte ky'iwb'il, aju ky'iwb'il in tzaj q'o'n te nej k'wa'lb'aj, pero minti' tzaj q'o'n te, ex minti' tumel tu'n tch'expet aju otoq b'ant tu'n, maske o qanin ti'j ex jaw oq'.

18Ex mya'tzun ma che pone t-xe witz Sinaí, ik tza'n qe aj Israel, b'a'n tmakonjtz ju witz ex in k'ant q'aq' ti'j, ex at tuj qlolj ex tzaj nim kyq'iq',

19ex o kyb'i xjal in q'ajt chun, ex o kyb'i xjal in yolin Dios. Ex tej kyb'inte xjal in yolin Dios, e kub'san tu'n mi'n tyolin mastl kye,

20porke minti' kyipa tej tyolin Dios kyuk'il. Chi Dios tzaj tma'n: Qa at jun xjal ex qa jun jil ma pon t-xe witz, il ti'j tu'n tok xo't tu'n ab'j ex qa tu'n tok xayut tu'n lans.

21Ex xob'ajilxix aju ok kyke'yin; kyja'tzun tma Moisés: In chin xob'e ex in chin lu'lune.

22Atzun kyeye ja'lo ma che ule t-xe witz Sión, ma che ule tuj ju tnam Jerusalén tb'i, at tuj kya'j, jatum ta' aju Dios itz', ex ma che ule junx kyuk'il anjel nim kyajlal in che tzalaj wen,

23ex ma che ule kyuk'il qe nej k'wa'lb'aj kychmon kyib', aqeju tz'ib'an kyb'i tuj kya'j, ex ma che ule twitz Dios aju in che ok kykyaqil xjal tuj xjel tu'n, jatum ta' kyanmi qe xjal b'a'n ma che ok q'o'n te tz'aqlxix tu'n Dios.

24Ex ma che ule twitz Jesús aju tzaj tx'olb'ante ju ak'aj yol ma kyaj b'ant ti'j tu'n Dios kyuk'ile, ex ma che kanune ti'j tchk'el el chitj, mas b'a'n twitz ju tchk'el alumaj xi tq'o'n Abel.

25Ten kykwente kyi'je tu'n mi'n tel kyik'une Dios aju in yolin quk'il. Porke qa minti' e klet qe xjal el kyik'un tyol Dios tej tyolin kyuk'il twitz tx'otx', pyor qe mlay qo klet qa ma tz'el qik'un Dios aju in tzaj yolin qe ja'lo max tuj kya'j.

26Aju tq'ajq'ajel twi' Dios o yukch tx'otx' tu'n ojtxi; atzun ja'lo ma tzaj ttziyan juntl yol in tma'n: Kyyukchtel juntl maj tx'otx' wu'ne, ex mya noq o'kx tx'otx', ax ikx kya'j kyyukchtel, chi Dios.

27Aju yol lu: Juntl maj, atzun in tma'n tu'n tel q'i'n tkyaqilju b'a'n tyukch, aqeju b'incha'n qe, tu'ntzun kykyaj ten qeju minti' in che yukch.

28Kyja'tzun qq'onx chjonte te Dios tu'nju ma qk'am jun kawb'il mlay yukch, qq'onx chjonte ex qo ajb'en te Dios tu'n ttzalaj qi'j ex tu'n tten tchi tuj qwitz ex tu'n qniman te.

29Porke ate Qdios ik tten ik tza'n jun q'aq' in b'aj tz'e'y tkyaqil tu'n.