1 Tesalonicenses 5 - Mam Huehuetenango New Ortography

1Atzun ti'j tab'q'iyil ex ti'j tq'ijlalil, mya il ti'j tu'n t-xi ntz'ib'ane kyeye, erman,

2porke b'i'nxix kyu'ne aju tq'ijlalil ok tul Qajaw tzul ik tza'n jun eleq' nnu'l qonik'an.

3Ok kymante xjal: Minti' b'is, b'a'n ta' tkyaqil, che chilo, ex minab'en tzul castiw kyib'aj tu'n kynaj, ik tza'n jun xu'j at tuj k'ixk'oj ok nnu'l itz'j tal; ex mlay che tzoqpaj.

4Atzun kyeye erman, mlay jaw naj kynab'le tuj tq'ijlalil ok tul Qajaw, minab'en tzul ik tza'n nnu'l jun eleq', porke mya tuj qlolj ate'ye.

5Porke kykyaqile te spik'un qeye ex in che b'ete q'ijl; minti' qoklen tuk'il qonik'an ex tuk'il qlolj.

6Kyja'tzun, mi'n qo tan ik tza'n qe txqantl xjal, noq o'kx tu'n qxq'uqin ex tu'n tten qnab'l.

7Porke aqeju in che tan, te qonik'an in che tan, ex aqeju in che k'an q'e'n, te qonik'an in che k'an q'e'n.

8Atzun qe, tenx qnab'l porke in qo b'et q'ijl. Ex tenwt qokslab'l ex qk'ujlalil tu'n tok te kolb'il qe, ik tza'n jun soldad nno'k tq'o'n chikyet k'uxb'il ti'j tu'n tklet. Ex qe'k qk'u'j ti'j ju kolb'il qe tzul, ik tza'n jun soldad tjax tpasb'il k'uxb'il tu'n tklet twi'.

9Porke minti' kub' t-ximan Dios qi'j tu'n ttzaj tq'oj qi'j tu'n tkub' qsentens tu'n; noq o'kx kub' t-ximan tu'n qklet noq tu'n Qajaw Jesucrist.

10Porke o kyim Jesucrist tu'n tchjet qil tu'ntzun qanq'in junx tuk'il, qa itz'x qo' ex qa otoq qo kyim.

11Kyja'tzun, kyq'om kynab'le kyxolxe ex kykyuwsam kynab'le kyxolxe, ik tza'nx in kyb'incha'ne ja'lo.

In tq'o'n Pablo kynab'l erman

12Qo kub'sale kywitze, erman, kynimanxe qeju in che aq'nan kyxole ex nejenel qe kyxole tuj taq'un Qajaw, ex in kyq'o'n kynab'le,

13ex tu'n tten nimxix kyk'ujlalile kyi'j tu'nju in che aq'nan kyxole. Tenx kymojb'ab'l kyib'e kyxolxe.

14Ax ikx qo kub'sale kywitze erman, tu'n t-xi kyq'o'ne kynab'l qeju kyk'i' che aq'nan, ex tu'n t-xi kyq'uqb'a'ne kyk'u'j qeju ch'in kyk'u'j; ex che onine kyi'j qeju minti' kyipun, ex tenx kypasense kyi'j kykyaqil.

15Qa at jun mya b'a'n o b'inchanjtz kyi'je tu'n juntl, ten kykwente ti'j tu'n mi'n taj kyq'o'ne t-xel mya b'a'n; noq o'kx kukx tu'n kyb'inchanteye ju b'a'n kyxolxe ex kye kykyaqil xjal.

16Kukx che tzalaje.

17Mi'n che q'ajene tu'n kyna'ne Dios.

18Kyq'onxe chjonte ti'j tkyaqil, ex atzun tajb'il Dios jlu tu'n kyb'inchanteye, tu'nju okslal qeye ti'j Jesucrist.

19Mi'n kub' kyyuptz'a'ne ju Xewb'aj Xjan.

20Mi'n tz'el kyik'une kyyol qe t-sanjel Dios.

21Kyke'yin b'aje tkyaqil, kytzyume aju b'a'n.

22Kypa'mil kyib'e ti'j tkyaqil mya b'a'n.

23Ex axte Dios aju q'ol qmojb'ab'l qib', axwit tz'el pa'n kyeye tu'n kyajb'ene o'kx te, ex awt kwentin kyeye tuk'ix kyxewe tuk'ix kyanmiye tuk'ix kyximlale, ex minti'wt kypaltile ok tul Qajaw Jesucrist.

24Aju Dios ma txkon kyeye in japunxix tyol, ex ok tb'incha' tkyaqil jlu kyeye.

Jun q'olb'eb'l tu'n Pablo te b'ajsb'il yol

25Erman, che na'ne Dios qi'je.

26Kyq'onxe nq'olb'eb'le kye kykyaqil erman, ex kytz'ub'an el kywitze tu'n tkyaqil kyk'ujlalile.

27Kxel nkyuwsa'ne kyeye twitz Qajaw tu'n tjaw sch'it ju u'j lu kywitz kykyaqil erman.

28Aju t-xtalb'il Qajaw Jesucrist tenwt kyuk'ile. Ikxwitju.