Ezequiel 4 - Mam Huehuetenango New Ortography

Xi tma'n Ezequiel qa che okel tzoqpaj aj q'oj ti'j Jerusalén

1Aya xjal, q'intza jun loq', q'onkuxa twitza, ex tz'ib'an kub'a tilb'ilal tnam Jerusalén twitz.

2Che txolb'a'nka qe soldad ti'jele kyuk'ix qe máquina in che ajb'en te xitb'il muro, q'o'nka jun ch'uquj tx'otx' ti'jele muro tu'ntzun kyokx soldad tuj tnam, tu'ntzun tok ke'yin ik tza'n jun tnam txolin ti'j kyu'n aj q'oj.

3Te tib'ajxi q'intza jun piẍ lámina k'uxb'il, q'onkuya kyxole tuk'il tnam, aju lámina jun techal ti'j muro, ex we'kuya twitz tnam lu mer ik tza'n tu'n tok tzoqpaja ti'j. A jlu k'ajb'el te jun techal kye aj Israel.

4Atzun teya koẍekuya tib'aj ttxlaja tuj tnayaja, ex kb'el tq'o'na kyil aj Israel tib'aja. Il ti'j kkoẍeb'ila tib'aj ttxlaja tuj tnayaja tkub'sa'n til tnam tib'aja

5tuj enter 390 q'ij; jun q'ij atzun techal ti'j jun ab'q'i kyil aj Israel.

6Oktzun tjapun b'aj tyemp lu tu'na, kb'el koẍe'ya tib'aj ttxlaja tuj tb'anq'ab'a ex kb'el tq'o'na kyil aj Judá tib'aja tuj enter 40 q'ij, jun q'ij atzun techal ti'j jun ab'q'i kyil aj Judá.

7K'ajetz tke'yina juntl maj tumlal tnam Jerusalén aju tnam txolin ti'j kyu'n aj q'oj; kjawil t-xpaltx'ina tq'ab' tkamiẍa, ex k-yolila te nxele ti'j tnam lu.

8B'intza, ok kk'aletela wu'ne tu'n saqb'aq, tu'ntzun mi tajtz txalpaja tuj juntl pak' okxi kyjapun b'aj qe q'ij b'anin ti'j tu'n tik'x tu'na.

9Te tib'ajxi, q'intza ch'in triw, ch'in sebad, tuk'ix ch'in maysiy ex tuk'ix ch'in avena, ax ikx chenaq' ex tuk'ix xkarbans; smo'n b'aja tkyaqil jlu tuj junx tkub'il, ex ti'jtzun jlu b'inchama twaya. Atzun kxel twa'na tuj enter 390 q'ij ok ttena koẍliya tib'aj ttxlaja tuj tnayaja.

10Kxel twa'na twaya tuj or b'animaj ti'j, ex kxel twa'na mey libr tuj junjun q'ij;

11ax ikx tk'a'ya kxel tk'a'na tuj or b'animaj ti'j ex kxel tk'a'na mey litr a' tuj junjun q'ij.

12Aju wab'j kxel twa'na kb'antel tu'na ti'j sebad, tzq'ajsama tib'aj q'aq' tu'n ttxa xjal otoq tzqij, ex kb'ajel tb'incha'na jatum b'a'n tilwaja kyu'n xjal.

13Ax ikx tzaj tma'n Qman weye kyja': Aju wab'j tz'il ik tza'n jlu, mayo'n tu'n ley tu'n mi'n t-xi wa't, atzun jun techal ti'j kywa aj Israel kxel kywa'n kyuj qe tnam jatum che pol nlajo'ne najchaq, chi Qman.

14Atzun weye xi ntzaq'we'ne: Mi'n Nman Dios, weye atxix tej k'wa'lx qine na'nx tok nmako'ne jun ti'xti tz'il; na'nx t-xi nchyo'ne tchib'jal jun alumaj tajx in kyim ex qa b'yo'n in kub' kyu'n qe txkup te tjaq' k'ul; ex mi jun maj na'nx t-xi nnik'b'e'ne qe chib'j mayo'n tu'n ley.

15Tzaj ttzaq'we'n Qman weye: B'a'n, kxel nq'o'ne amb'il teya tu'n tajb'en ttxa wakẍ tu'na te t-xel ttxa xjal, tu'ntzun ttzq'aj twaya tu'n.

16Te tib'ajxi tzaj tma'n weye: Aya xjal, wu'ne mlay kanun kywa xjal tuj Jerusalén. Malo'n k'eletz kywa, ex kxel kywa'n tuk'il b'is; ax ikx kyk'a a' malo'n k'eletz, ex kxel kyk'a'n tuk'il kyxob'il.

17Mi'n kanun kywa ex kyk'a a', ex kb'ajel kyke'yin tuj kywitz tuk'il kyxob'il. Ex cheb'a kb'ajel kyipun tu'n kynaj tu'n tlaj kyil, chi Qman weye.