Job 9 - Mam Huehuetenango New Ortography

1Tzyettzun tyolin Job ex tma:

2B'a'n wu'ne ax tok jlu, mlay txi tma'n jun xjal qa minti' til twitz Dios.

3Qa at jun xjal taj tz'ok ten yolil tuk'il Dios tu'n tklonte tib', kyxol jun mil tyol Dios mi jun jaku tzaq'wet tu'n.

4Ate Dios ma'xix tipumal ex nimxix tnab'l, ¿alkye jun jaku kub' twab'an tib' twitz ex jaku tzoqpaj?

5Tu'n tq'oj Dios in che tzaj yukch qe witz; in che kub' t-xitun ex minti' b'a'n kyu'n alkye otoq yukunte kye.

6Tu'n Dios in tzaj lu'lun tx'otx' ex in che b'aj yukch qe tq'uqb'il tu'n.

7Qa ma tma Dios tu'n mi tjawil q'ij, ax mlay jawil, ex qa ma tma kye che'w tu'n mi tk'ant kyspik'umal, ax mlay che k'ant.

8Mi jun onin ti'j tej t-xi tlik'pu'n kya'j ex in b'et tib'aj mar in pulin wen.

9Ate b'aj b'inchante qe che'w tuj k'lojin: Jun k'loj Osa Mayor kyb'i, juntl k'loj Orión kyb'i ex juntl k'loj Pléyades kyb'i, ex jun k'loj che'w ate' tuj tnayaj q'ij.

10Nimxix tb'inchb'en Dios in b'ant ma'xix t-xilen, ex mi a'l jun jaku tz'el tnik' ti'j.

11Qa ma tz'ex Dios nwitze mlay wile; k'ik'el takl wi'je ex mlay nna'ye.

12Qa at jun ti'xti nne'l tetzan, ¿alkye jun jaku tz'ok mayonte te ti'j? ¿Alkye jun jaku txi qanin te: ¿Ti in tb'incha'na, chiwt?

13Qa in tzaj tq'oj Dios mlayx chewix tk'u'j jurat naj; twitz kb'el kymansin kyib' qeju mojl kyyol tuk'il Rahab, aju nintz txkup at tuj mar.

14¿Tza'ntzun tten tu'n tknet yol wu'ne tu'n taj nmojtza'ne Dios?

15Maske minti' in b'ant il wu'ne twitz Dios, pero mlay b'ant ttzaq'wet wu'ne; ate Dios jwes wi'je, o'kx jaku txi nqanine tu'n ttzaj q'aq'an tk'u'j wi'je.

16Qa ma tzaj ntxko'ne ex qa ma tzaj ttziyan tu'n tul, pero mlay txi nnimane qa jaku che tzaj tb'i'n qe nyole.

17Jakulo tzaj t-sama'n kyq'iq' jb'al tu'n nk'ixb'isanjtze tu'n, ex jakulo tz'ok tq'o'n mas ẍil wi'je noqx gan.

18Jakulo tzaj nimxix b'is wi'je tu'n, ex mlaylo tzaj tq'o'n amb'il tu'n tjatz nxewe.

19Qa ma qo yolin ti'j alkye mas at tipumal, ax tok ate Dios at mas tipumal; qa qajb'il tu'n tok tuj xjel, ¿alkye ktzajel txkonte te tu'n tul?

20Maske minti' wile, pero ax ntzi'ye kq'malte qa at wile ex mya b'a'n qine.

21Maske minti' wile, pero minti' tajb'en jlu weye; ma b'aj nganiye tu'n wanq'ine.

22Tkyaqil junx ta'. Atzun jlu ximan wu'ne: In che naj tu'n Dios qe xjal at kyil, ax ikx qeju minti' kyil.

23Qa minab'en ma tzaj jun k'ixb'isab'l kyib'aj xjal ex qa ma che kyim qeju minti' kyil, noq in jaw tze'n Dios ti'j ju nnik'x kyu'n.

24In kyaj tq'o'n qe nasyon tuj kyq'ab' xjal mya nimal Dios qe, ex nno'k tmaqsi'n kywitz qe jwes. Qa mya tu'n Dios in b'ant jlu, ¿al u'ntzun?

25Aju nq'ijlalile ojqelxix tel, ex na'nx tok nke'yine aju ttxub'txajal.

26In ojqelanxix tel, ik tza'n qe barc kyuw che b'et, ik tza'n jun t'iw in xi lipan ti'j tkanb' tu'n ttzyet tu'n.

27Qa ma kub' nximane tu'n tik' tna'l nb'ise ex tu'n t-xi nyek'une nwitze in tzalaj,

28tkyaqil k'ixk'oj nna'jtz meltz'aj sek'pul weye, porke b'a'n wu'ne mlay txi tniman Dios qa minti' wile.

29Qatzun at wile tuj twitz Dios, noqxlo gan tu'n tjaw wipuman wib'e.

30Maske tz'el ntx'jo'ne nq'ab'e tu'n jabón, ex maske tz'el njaqu'ne tu'n ta'l tza'j,

31jakulo chinx t-xo'n Dios tuj sob'an, ex axpelo nxb'alune jaku tz'el ik'unte weye.

32Noqwit xjal te Dios ik tza'nx qine, jakwitlo tz'aj ntzaq'wene, ex jakwitlo txi nma'ne te tu'n qxi'ye tuk'il twitz jun jwes tu'n t-xi b'incha'n qi'je.

33Noqwit at jun jwes qxole tu'n tkawin qib'aje qkab'ile,

34tu'n tmayet Dios tu'n, tu'n mi'n kukx tkub' ncastiwoye tu'n, ex tu'n mi'n kukx ttzaj tq'o'n xob'ajil wi'je,

35ex jakulo chin yoline tuk'il minti' nxob'ile, ex jakulo txi nma'ne te qa minti' wile.