Deuteronomio 14 - Mam Huehuetenango New Ortography

1Tk'wa'l Qman Dios qeye. Mi'n b'aj kyqesine kyximlale, ex mi'n tz'el kymatzo'ne ttzmal kywi'ye tib'aj kywitze tu'n tlaj otoq kyim jun xjal,

2porke jun tnam xjan qeye te Qman Dios; ate jaw sk'onte kyeye kyxol kykyaqil xjal twitz tx'otx' tu'ntzun kyoke te jun k'loj xjal etzan tu'n.

Qe txkup saq ex qe tz'il Levítico 11.1-47

3Mi'n txi kychyo'ne jun txkup tz'il, aju mayo'n tu'n ley.

4Atzun qe txkup lu b'a'n tu'n kyxi kychyo'ne: Wakẍ, ẍne'l, chip,

5kyuk'ix kykyaqil wiq masat atzun kyb'i jlu: Ciervo, gacela, gamo, corzo, íbice ex antílope, ex chip ex ẍne'l te tjaq' k'ul.

6B'a'n tu'n kyxi kychyo'ne kykyaqil qe txkup b'a'n che kok'san kywa ex pa'n tten t-xol t-xpak'il kyqan.

7Ex mi'n che'x kychyo'ne qe txkup lu: Chej camey, ẍik ex cuatusa; maske in b'aj kykok'sa'n kywa, pero mya pa'n tten t-xol t-xpak'il kyqan; aqe jlu che okel kyq'o'ne te tz'il.

8Ax ikx qe b'och, maske pa'n tten t-xol t-xpak'il kyqan, pero minti' in b'aj kykok'san kywa; a jlu k'okel kyq'o'ne te tz'il. Mi'n txi kychyo'ne kychib'jal qe txkup lu, ex mi'n tz'ok kymako'ne kyximlal qa otoq che kyim.

9Kyxol qe txkup najl tuj a', b'a'n tu'n kyxi kychyo'ne qeju at kyq'ab' ex at tpwaqil kyi'j,

10ex mi'n che'x kychyo'ne qeju minti' kyq'ab' ex minti' tpwaqil kyi'j; aqe jlu che okel kyq'o'ne te tz'il.

11B'a'n tu'n t-xi kychyo'ne tkyaqil txkaj chyu'j aqeju saq,

12o'kxku qe jlu mi'n che'x kychyo'ne: t'iw, quebrantahuesos, juntl wiq t'iw at ttzi mar,

13milano, tkyaqil txkaj halcón,

14tkyaqil txkaj joj,

15avestrúz, xitx', gaviota, tkyaqil txkaj q'anjan,

16tol, ibis, cisne,

17pelícano, k'utz, somormujo,

18tkyaqil txkaj garza, abubilla ex sotz'.

19Qe tal jil at kyxik', che okel kyq'o'ne te tz'il ex mi'n che'x kychyo'ne,

20ex qe chyu'j saq, b'a'n tu'n kyxi kychyo'ne.

21Mi'n txi kychyo'ne jun txkup tajx kymel, tu'nju aqeye jun k'loj xjal pa'nmaj tu'n Qman Dios; atzun qe stranjer xjal najl kyuj kytanmiye b'a'n tu'n t-xi kychyo'n, ex qa b'a'n tu'n t-xi kyk'ayine kye b'etin xjal.

Mi'n jax kytxko'ne tal chip tujx ta'l tim ttxu'.

Aju xnaq'tzb'il ti'j tlaji'n

22Teyle junjun ab'q'i il ti'j tu'n tel kypa'ne tlaji'n ti'j tkyaqil twitz kyawale kjawil kychmo'ne.

23Kxel kywa'ne tlaji'n k'elel kypa'ne ti'j kytriwoye, ti'j ta'l twitz ky-uvaye ex ti'j kychi'ye aseyt, kyuk'ix kyi'j qe tnejel kyal kywakẍe ex qe tnejel kyal kyẍne'le; che xel kywa'ne twitz Qman Dios tuj lugar kjawil t-sk'o'n te nab'l tb'i, tu'ntzun tb'ant kynimane te Qman te jumajx.

24Ok kykub' ky'iwla'ne tu'n Qman, qa najchaq tu'n t-xi kyi'ne aju tlaji'n otoq tz'el kypa'ne, tu'nju najchaq najl qeye ti'j lugar otoq jaw t-sk'o'n Qman te nab'l tb'i,

25kyk'ayinxe aju tlaji'n, atzun twi' kxel kyi'ne tuj lugar otoq jaw t-sk'o'n Qman.

26Aju pwaq lu k'ajb'el kyeye tu'n tjaw kylaq'o'ne ma chixin noq alkye kyajb'ile: Qa wakẍ, qa ẍne'l, qa ta'l twitz uva ex qa noq alkyexku k'ab'j tx'amsamaj. Atzun kxel kywa'ne twitz Qman Dios noq alkye kyajb'ile, ex kb'antel jun ninq'ij kyu'ne junx kyuk'il qeju ate' tuj kyjaye.

27Mi'n tz'ik kyna'l aj Leví kyu'ne, aqeju najl qe tuj kytanmiye, porke minti' kye kytx'otx' ok kyk'ma te kyetzb'il ik tza'n kyeye.

28Ok tel oxchaq ab'q'i, k'elel kypa'ne aju tlaji'n ti'j twitz kyawale tuj ab'q'i lu, ex kxel kyk'u'ne kyuj qe tnam jatum ate'ye,

29tu'ntzun tajb'en kye aj Leví, aqeju mi'n kyk'am kytx'otx' te kyetzb'il ik tza'n kyeye, tuk'ix kye stranjer xjal aqeju ax najl kyxole, ex tu'n tajb'en kye k'wa'l minti' kyman ex kytxu' ex kye meb'a xu'j. B'a'n tu'n kywa'n ti'j okxi tnoj kyk'u'j wen. Kyja'tzun che b'el ky'iwla'ne tu'n Qman Dios ti'j tkyaqilju kb'antel kyu'ne.