Nehemías 4 - Mam Huehuetenango New Ortography

Xmayb'il kyu'n aj q'oj

1Tej tb'inte Sanbalat in qo b'inchantoqe juntl maj muro ti'jele tnam, tzaj nim tq'oj ex ttx'u'jil ex ok ten xmayil kyi'j qe xjal Judiy,

2ex xi tma'n kye qe tuk'il ex kye qe soldad te Samaria kyja': ¿Ti nb'aj kye qe txunyab' Judiy? ¿Che chipetzun qa kxel q'ot amb'il kye tu'n t-xi kyq'o'n chojb'il te Kydios juntl maj? ¿Ex baqa tuj junx q'ij kb'antel aq'untl kyu'n? ¿Baqa ti'j kytza'jil ab'j o che b'aj tz'e'y che b'antel juntl maj qe ab'j kyu'n? Chi Sanbalat.

3Wa'ltoq Tobías aju aj Amón ttxlaj Sanbalat ex xi tma'n ju yol lu: Aju muro nib'an tjaw kyb'incha'n juntl maj, qa ma jax jun wech twi', b'i'xlo jaku kub' xitj tjaq'.

Aju tna'j Dios Nehemías

4In oktzun tene na'l Dios ex xi nma'ne kyja': Qman Dios: B'intza aju kyxmayb'il xjal qi'je. B'inchama ax tu'n tkub' tz'aq kyxmayb'il kyib'aj; kuchiwt che kub' tz'aq tuj kyq'ab' aj q'oj kyi'j, ex b'a'nwt kyxi q'i'n pres tuj juntl tnam.

5Mi'n kub' tnajsa'na kyb'inchb'en mya b'a'n ex mi'n kub' tnajsa'na kyil; tu'nju ma che ok ten ik'lelte kye qeju in che aq'nan tu'n tjaw b'inchet juntl maj muro ti'jele tnam.

Aju xob'tzab'l kyu'n aj q'oj

6Lajo'nxtoq aq'untl qu'ne tu'n tjaw b'inchet juntl maj muro ti'jele tnam, ex otoq mijin muro tu'n tb'inchet, ex aqe xjal nim kygan tu'n kyaq'nan.

7Ex tej kyb'inte Sanbalat, Tobías, qe aj Arabia, qe aj Amón ex qe aj Asdod, qa kukxtoq tok aq'untl ti'j muro ti'jele tnam, ex ch'ixtoq kyb'aj maqet qe toy' muro jatum b'a'n tu'n kyokx xjal tujxi tnam Jerusalén, tzaj nimxix kyq'oj,

8ex kykyaqil qe jlu moje' kyyol tu'n kyok tzoqpaj q'ojlel ti'j tnam Jerusalén ex tu'n ttzpet qnab'le kyu'n.

9Atzun qeye o ok tene na'l Dios ex e kub' qq'o'ne qe xq'uqil tu'n kykwentin q'ijl ex qonik'an, tu'ntzun qklete tuj kyq'ab' aj q'oj.

10Atzun kye aj Judá o kyma': Ch'ix tb'aj kyipun qeju in che iqan tu'nju nimxix ttx'aqan ab'j; ax ikx qeye mlay qo xkye'ye ti'j tu'n tjaw qb'incha'ne juntl maj muro ti'jele tnam.

11Ex in kyma'ntoq aj q'oj qi'je kyja': Noq minab'en e qok tzoqpaj kyi'j tu'n kykub' qu'n, tu'ntzun twe' aq'untl.

12Ex qe xjal Judiy, aqeju najlqe niqayin kytxlaj aj q'oj qi'je, ela' maj e ul q'malte qeye qa at kyokel tzoqpaj aj q'oj qi'je tuj tkyaqil pak'.

13Xitzun nma'ne kye kykyaqil k'loj xjal judiy at kyxilen kyxolx, tu'n kykub' ten ti'jxi muro te tnam, t-xe'yile muro ex kyuj qe lugar na'nxtoq kyb'aj maqet, ex tu'n t-xi kyi'n kyspad, kylans, ex kyxob'l plech.

14Tej tel nnik'e ti'j qa in che xob'toq, in kub' we'ye ex xi nma'ne kye qe xjal ma' kyoklen, kye qe kawil ex kye txqantl xjal: Mi'n che xob'e kywitz aj q'oj. Kyna'ntze, ate Qman at nimxix tipumal ex xob'ajilxix. Kyq'onk kyipune tu'n kykolpet qe kyxjalile, qe kyky'ajale, qe kyme'jele, qe kyxu'jile ex qe kyjaye, nchiye kye.

15Tejtzun kyb'inte qe aj q'oj qi'je qa otoq tz'el qnik'e ti'j kyximb'etz ex otoq b'aj tzpet kyximb'etz tu'n Dios, qkyaqiltzune o aq'nane juntl maj tu'n tjaw b'inchet muro, ex teylex te junjun ok ten aq'nal ti'j ttarey.

16Tujxtzun q'ij lu, mijku xinaq aqeju ate' wuk'ile e aq'nan ti'j aq'untl, atzun mijtl list e kub' ten tuk'il kylans, kymaqb'il in che ajb'en tuj q'oj, kyxob'l plech ex kychikyet k'uxb'il. Qe nejenel xi kykyuwsa'n kye qe xjal aj Judá tu'n tten kyipun.

17Qe xjal in che aq'nan ti'j muro ex qe iqal iqtz kukx e iqan, ex tu'n junx kyq'ab' e aq'nan, atzun juntl kyq'ab' q'i'n spad tu'n.

18Kykyaqil qeju in che aq'nan, toklex kyspad kyk'u'j, atzunju q'ajtzal chun ax wa'l kub' ntxlaje.

19Otoq txi nma'ne kye qeju ma' kyoklen ex kye qe kawil ex kye txqantl xjal kyja': Aju aq'untl lu ma'xix ex najchaq poninb'aj, atzun qe qpa'n qib' tuj k'lojin najchaq qxol,

20kyja'tzun, ok kyb'inteye jatum ok tq'ajt chun, jurat che tzaje quk'ile tu'n qten junx, ex ate Qdios k'onil qi'j tu'n tkub' kyi'j aj q'oj qu'n, nchiye kye.

21Atzun jlu b'ant qu'ne tej qaq'nane, in tzyet qu'ne ok ttzaj t-xe kya'j ex in we' okxi ttzaj qlolj, ex mij xjal q'i'n lans kyu'n tuj kyq'ab'.

22Ax ikx xi nma'ne kye xjal kyja': Teyle junjun xinaq tu'n tkyaj ten te qonik'an tuj Jerusalén junx tuk'il ju onil te, tu'ntzun kyxq'uqin te qonik'an, ex tu'n kyaq'nan q'ijl.

23Aqine ex qe xjal at nxilene kyuk'il, qe onil, ex qe soldad uk'in wu'ne, minti' el qi'ne qxb'alune, noq o'kx ok qxi'ye chil, ex teylex te junjun q'i'n tlans tuj tq'ab'.