1 Samuel 11 - Mam Huehuetenango New Ortography

Kub' kyi'j aj Amón tu'n Saúl

1Pon Nahas aju rey te Amón kyuk'ix qe t-soldad tuj tnam Jabes tuj tx'otx' Galaad, tu'n kyok tzoqpaj ti'j tnam. Atzun kye xjal najl tuj tnam Jabes xi kyma'n te:

—E tb'ant ti'j jun qyol tuk'ila, ex jaku qo ajb'ene teya.

2Atzunte Nahas aju aj Amón tzaj ttzaq'we'n kye:

—Jaku b'ant ti'j jun nyole kyuk'ile, ex o'kx qa jaku kub' tuj kywitze tu'n tjatz wi'ne jun tb'aq' twitz tuj tb'anq'ab' teyle junjun kyeye, tu'ntzun ttzaj kych'ixwi kykyaqil aj Israel.

3Atzun kye kytijil xjal tuj tnam Jabes xi kytzaq'we'n:

—Q'ontza wuq q'ij amb'il qeye tu'n t-xi qsama'ne qe xjal q'ol tqanil tuj tkyaqil tx'otx' kye aj Israel; qatzun mi a'l jun jaku kolin qi'je, jakutzun txi qq'on qib'e tuj tkwenta.

4E pontzun qe xjal q'malte tqanil tuj tnam Gabaa jatum najltoq Saúl, ex xi kyma'n tqanil lu kye xjal. Kykyaqiltzun qe xjal e ok ten oq'el kyuwxix wen tej kyb'inte jlu.

5Ex lutoq te Saúl kyja' ttzaj, otoq tz'ajtz tuj kojb'il kyuk'ix qe wakẍ q'i'n tu'n, ex xi tqanin kye:

—¿Ti ma b'aj kyi'j xjal? ¿Tiqu'n in che oq'?

Atzun kye xjal xi kyma'n te aju tqanil otoq pon kyu'n qe xinaq tzajni qe tuj tnam Jabes.

6Tejtzun tb'inte Saúl jlu, o noj tu'n tipumal T-xew Dios ex tzajxix nim tq'oj.

7Tzajtzun ti'n Saúl kab'e wakẍ, e kub' tpaẍu'n ex xi tq'o'n kye junjun sanjel tu'n t-xi kyi'n tuj tkyaqil kytx'otx' aj Israel. E je'xtzun qe sanjel ex xi kyma'n kye xjal kyja': Iktzun kb'ajel paẍu'n kywakẍ qe xjal aqeju kyk'i' che ok lpe' ti'j Saúl ex ti'j Samuel tuj q'oj.

Tzajtzun jun xob'ajil ma'xix kyib'aj xjal tu'n Qman; ok kychmon kyib' tuk'il Saúl, mojl taq'pon kyu'n kykyaqil.

8Tej tok ten Saúl q'il kyajlal xjal tuj tnam Bezec, otoq b'aj kychmon kyib' ox syent mil xinaq aj Israel, ex 30 mil aj Judá.

9Ex xi tma'n kye qe xjal otoq che pon q'ol tqanil:

—Kymanxe kye xjal najl tuj Jabes: Nchi'j qo pone te chilkuq'ij ex ok che kletele qu'ne, chi Saúl, che chikuye.

E ajtzun qe xjal ex xi kyma'n tqanil lu kye xjal najl tuj Jabes, atzun kye aj Jabes nimxix o che tzalaj tej kyb'inte ju tqanil lu,

10ex xi kyma'n te Nahas:

—Nchi'j txi qq'on qib'e tuj tkwenta tu'ntzun tb'inchanteya qi'je noq alkye b'a'n tuj twitza.

11Tujtzun juntl q'ij b'aj b'ant kyten qe t-soldad Saúl; tuj ox k'loj e je'l tu'n, ex na'nxtoq tkub' q'ij tej kyokx tzoqpaj tuj tmijil kycampament aj q'oj; ex e kub' b'yo'n aj Amón kyu'n, kukxtoq tok q'oj tej tpon chilkuq'ij. Atzun junjun e kyaj anq'in b'aj kysputun kyib', kyja'tzun mi jun kye aj Amón kyaj ten tuk'in tib' tuk'il juntl.

12Xitzun kyma'n xjal te Samuel:

—¿Alkye qeju e q'mante qa mlay tz'ok Saúl te qrey? Kyq'ontze qe xjal lu tu'ntzun kykub' qb'yo'ne.

13Atzunte Saúl xi tma'n kye:

—Tuj q'ij ja'lo mi jun b'a'n tu'n tkyim, porke ate Qman ma klonte kye aj Israel.

14Ex xi tma'n Samuel kye kykyaqil xjal:

—Qo'qe tuj Gilgal tu'ntzun tqe' tkawin rey ma chixin.

15Kyja'tzun tten, kykyaqil xjal e je'x tuj Gilgal ex ok kyq'o'n Saúl te rey ma chixin twitz Qman. Ex axtzun xi kyq'o'n qe oyaj te mojb'ab'l tib'il te Qman; ex nimxix o tzalaj Saúl wen kyuk'ix kykyaqil xjal aj Israel.